The Definitive Guide to Living in the Capital , Cairo , Egypt

كافيهات
دينا كانتينا

دينا كانتينا: كب كيك وحلويات غربية في التجمع الخامس

  • سكاي مول
  • مخبوزات وحلويات
  • 8 صباحاً - 11 مساءً -
تم التقييم بواسطة
Waleed Abuarab
قيم
قيم الآن
دينا كانتينا: كب كيك وحلويات غربية في التجمع الخامس

كان آخر حاجة نتوقعها في الكام سنة الأخيرة أننا نشوف في القاهرة منافسة شديدة بين محلات الكب كيك وتفنن كل منها في تقديم مذاقات وأشكال مختلفة لمنتجاتها، عمل عروض وأسعار تنافسية بهدف خلق شعبية للمكان، شعبية للـ “كب كيك”! غريبة مش كدة؟ لكن في النهاية دي حاجة كويسة وما عندناش مانع نشوف كل حاجة جديدة في القاهرة ونكتب عنها ونشجع الناس أنها تجربها، وإحنا ما ننكرش أننا من مدمنين الكب كيك وأي حلويات فيها شوكولاتة كثير وتوت أحمر. يعني بسهولة تقدروا تخمنوا إحنا إيه اللي جذبنا لمحل «دينا كانتينا – Dina Cantina».

موجود داخل مول الداون تاون في التجمع الخامس في الدور الأرضي، محل رقيق بألوان وردية و Theme ظريف واخد من ألوان الحلويات اللي بـ يعرضها، ومساحتها من الداخل مش كبيرة، وفيه ثلاجات عرض للتورتات والكب كيكس وغيرها من الحلويات، المعاملة هنا ممتازة وراقية جدًا، خد راحتك وأنت بـ تتفرج وبـ تسأل عن كل حاجة معروضة وهـ تلاقي حد بـ يساعدك وبـ يشرح لك بمنتهى الصبر.

واحدة الكب كيك هنا غالية شوية، أغلى من أي محل كب كيك تاني شوفناه في القاهرة، يعني لو هي بـ 15 جنيه في «نولا» أو «كرامز» هي هنا بـ 17.50 جنيه، بس ممكن تأخذ عبوة فيها 6 قطع أو 12 قطعة بأسعار أقل شوية “زي الجملة كدة” يعني مثلًا Box of 12 زي ما بـ يقولوا بـ يبقى بـ 155 جنيه، وطبعًا بـ تختار القطع اللي أنت عايزها من تشكيلة فيها أكثر من 40 نوع من الكب كيك. جربنا مذاقات مختلفة زي التوت والكريمة وزبدة الفول السوداني والتشيز كيك والمالتيزرس وطوفي الموز والـ m&m والقرفة. بس مافيش حاجة كانت بروعة الـ Chocolate Paragon  وهي فعلًا الشكل النموذجي لكب كيك الشوكولاتة زي اسمها ما بـ يقول. قوام الشوكولاتة فيها ممتاز وسكرها مضبوط قوي، بعكس الكيت كات بالشوكولاتة البيضاء اللي كانت مسكرة بزيادة وماقدرناش نكملها. لكن في النهاية الكب كيكاية الواحدة هنا بـ تقوم بالواجب وهـ تشبعك جدًا لأنها غنية بالطعم والخامات وطازجة جدًا ودي أهم حاجة.

بعيدًا عن الكب كيك «دينا كانتينا» بـ يعمل تورتات المناسبات اللي مطبوع عليها الصورة وبـ تتكلف من 240 لحد 400 جنيه، وبـ تتزين حسب رغبتك، والعينات اللي كانت في العرض كان شكلها مغري قوي وألوانها خطيرة، وهـ تحتاج تتصل بيهم أو تروح بنفسك علشان تحدد طلبك وتحجز قبلها بيومين أو يوم على الأقل.

وفي الثلاجة كان فيه عدد من تورتات الآيس كريم (110 جنيه) وتورتات الشوكولاتة والبلاك فوريست (260 جنيه) وفيه مجموعة حلويات تانية مناسبة أكثر للأطفال زي الكوكيز (7 جنيه) وأنواع مختلفة من الكاندي والطوفي.

حبينا الطعم ومن قبله شكل المحل في «دينا كانتينا» ومتوقعين له نجاح وانتشار أكبر في الفترة اللي جاية وأنه يبقى منافس قوي في ساحة الكب كيك في مصر.

نصيحة 360

لو عايز حاجة تتعمل لك مخصوص "Custom" اتصل بهم من الساعة 9 الصبح لحد 5 المغرب. وزور موقعهم على الانترنت.

أحسن حاجة

كل ما له علاقة بالشوكولاتة في «دينا كانتينا»، وأشكال تورتات المناسبات.

أسوأ حاجة

الأسعار مش قليلة، وده هـ يأثر على موضوع المنافسة ده.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح