The Definitive Guide to Living in the Capital , Cairo , Egypt

بقى لنا فترة، وكل رمضان تظهر موضة جديدة في الحلويات الشرقية؛ مرة كنافة بالمانجو، ومرة بالنوتيلا، وأخيرًا اختراع الريد فيلفيت بأي نوع من أنواع الحلويات الشرقية. وغير أن بـ يبقى فيه شبه إجماع بين أصحاب المحلات على موضة السنة دي، ده كمان بـ نلاقي كل مكان عامل الاختراع الخاص به كنوع من التميز.

المهم، قررنا أننا نروح "ذا باتر هاف & كو – The Batter Half & Co." في الزمالك علشان نعرف هم وصلوا لإيه في موضوع الحلويات الرمضانية المبتكرة، بالرغم من أن معظم الأنواع المعروضة – سواء بالقطعة/ الكوب أو الحجم الكبير – منقسمة لموضتين: الشوكولاتة والريد الفيلفيت ومن كل نوع مجموعة من الحلويات المعمولة بطرق مختلفة.

من الشوكولاتة قررنا أننا نجرب تارت الكنافة (22.86 جنيه)، ومن الريد فلفيت جربنا بسبوسة Dome بـ (18.11 جنيه)، كنافة ريد فيلفيت (23.81 جنيه)، وأرز باللبن (23.81 جنيه) علشان لو الاختراعات دي فشلت نلاقي حاجة نواسي بها نفسنا.

تارت الكنافة بالشوكولاتة، عبارة عن قطعة مربعة مكونة من طبقات كنافة وشوكولاتة، وإحنا بـ نشتريها أكد لنا القائم على خدمة البيع أنها معمولة من النوتيلا، ولكن لا شكلها ولا طعمها يوحي بكده، بالرغم من خيبة آمالنا في أن مافيش فيها نوتيلا، إلا أن التارت في مجمله طعمه حلو، ولو أننا كنا نتمنى تكون كمية طبقة الشوكولاتة متناسبة مع حجم طبقة الكنافة السميكة.  

البسبوسة دوم من اسمها عبارة عن قبة من عجينة البسبوسة المشبعة باللون الأحمر مزينة بكريمة الجبنة، وتحت القبة دي فيه كنافة، للوهلة الأولى حسينا أن بسبوسة الريد فيلفيت فيها حاجة غلط، طعمها لا طعم بسبوسة عادية ولا طعم ريد فيلفت كيك، بعد عدة تجارب ثانية فضل عندنا نفس إحساس انعدام الطعم، فكرة وجود الكنافة كحشو للقبة، كان ممكن يضيف نوع من التوازن مع نعومة البسبوسة، ولكن للأسف الكنافة كانت رطبة وكميتها قليلة لدرجة أننا شكينا أنها دخلت بالغلط.

ثاني اختراع من اختراعات الريد فيلفيت، وهو الكنافة بالريد فيلفيت؛ الحلو عبارة عن كوب فيه طبقات من الكنافة، ريد فيلفيت كيك وكريمة الجبنة، لغاية دلوقت ما قدرناش أننا نستطعم الاختراع ده، لأنه بالنسبة لنا أن كل حاجة من دول حلوة لوحدها في المطلق؛ ما بينهمش أي رابط يخلينا نحبهم على بعض، بالرغم من أن الريد فلفيت وكريمة الجبنة كانوا ممتازين، إلا أن الكنافة كانت رطبة ومالهاش أي نكهة تميزها.

آخر حاجة ذقناها من ذا باتر هاف & كو كانت الأرز باللبن، ده كان أحلى حاجة أكلناها في تجربتنا كلها، كل شيء مثالي في كوب الأرز باللبن بحبات الفستق اللي بـ تزينه من فوق، من أول القوام وكمية الأرز حتى ضبطة السكر وكمية المكسرات، عيبه الوحيد أن الكوب صغير قوي.

بالرغم من أن معظم الاختراعات اللي ذقناها المرة دي ما عجبتناش، إلا أننا بـ نعترف أن فيه اختراعات ثانية طعمها بـ يبقى رائع ويستاهل يتجرب، وسواء بـ تختلف أو بـ تتفق على ابتكار حلويات جديدة، عدد الأماكن اللي ممكن تختار منها النوع اللي يناسبك في القاهرة كبير.