The Definitive Guide to Living in the Capital , Cairo , Egypt

من فترة للثانية بنحب نجرب الأماكن اللي زورناها قبل كده علشان نتأكد من أنها لسه محافظة على مستواها وده اللي حصل، لما زرنا ذا فور فات ليدز في الزمالك. المكان صغير مش كبير بس كأنه علبة سحرية كبيرة أول ما تدخل جواها بتلاقي أرض الكوكيز في وشك وجبل من أنواع الكيك اللذيذة غير التارت اللي بأنواع مميزة زي الـ pumpkin tarte وأنواع تانية كتير.

حبينا نجرب الحاجات الجديدة بجبينا علبة صغيرة فيها 4 قطع bites  للكيك، القطعة بـ 6 جنيه، صحيح حجمهم صغير، بس طعمهم جميل. جبنا واحد ريد فلفت كانت طازة ومنعشة، مافيهاش غلطة، وواحدة salted caramel  ماعجبتناش قوي لأنها كانت ناشفة شوية، وشكوليت شيبز مع براونيز كانت حلوة جدًا ودسمة لعشاق الشوكولاتة، لكن الإبداع الحقيقي كان في قطعة الجنزبيل ginger bite مافيش كلام يوصف حلاوتها وقرمشتها لدرجة أننا ندمنا أننا جبنا منها قطعة واحدة بس، كانت تحفة فعلًا ومنعشة والكريمة عليها تجنن.

بعد كده شفنا تارت ليمون ماقدرناش نقاومها، جبنا قطعة بـ 15 جنيه، لازم نعترف بداية إننا بنعشق الليمون، ومش بنتهاون في أي حاجة معمولة به علشان هو فعلًا بيحلي أي حاجة يتحط عليها فما ينفعش تبوظها، والمفاجأة بالنسبة لنا أن التارت كانت رائعة مظبوط جدًا، خفيفة وهشة  ومتوازنة مش مززة ولا مسكرة وعليها طبقة أيسنج سكر بالليمون تجنن، مش زي اللي بيكون طعمها وحش في التورتة لأ دي كانت فعلًا تاخد عقلك، مع كوباية نسكافيه الصبح، وتبدأ يومك بأنتعاش ماحصلش.

أما بقى ملكة المكان واللي نقدر نقور عليها فعلًا اللي كلت الجو هي ” الكوكيز” محطوطة جنب الكاشير ولو ماسألتش عليها مش هتاخد بالك منها، الواحدة بـ 11:30 جنيه، شكلها كبير ممكن تخدعك أن مافيهاش قطع شوكولاتة كتير، بس مع أول قضمة هتدوب في التفاصيل، مبدأيًا هي طريقة جدًا لدرجة تجنن، طازة وطرية ومليانة قطع سميكة من الشوكولاتة، لما فتحناها لاقينا أن العجينة بتكون سميكة فبتخبي قطع الشوكولاتة، لكن عن الطعم كان حكاية، إحنا بعد أول واحدة كان نفسنا نلف ونرجع ونأخد العدد الموجود كله.

خلصت تجربتنا في ذا فور فات ليدز بس أكيد أكيد مش هتكون زيارتنا الأخيرة.