The Definitive Guide to Living in the Capital , Cairo , Egypt

مطعم وكافيه «راسبري – Raspberry» من الأماكن اللي نحب نروحها لما تطلب
معانا نأكل أكلة حلوة ونقعد في مكان هادئ نسبيًا نشتغل فيه لوجود إنترنت Wi-Fi هناك، على الرغم من أن نظام وجو المحل
والمنيو بتاعه شبه مطعم “سبكترا” و”روستري” بشكل كبير، إلا
أننا بـ نحس بجو مختلف فيه.

زيارتنا متكررة للمكان هناك، لكن
آخر مرة رحنا كان طقم الجرسونات اتغير شوية، حسينا بغربة للحظة في المكان لكن
سرعان ما بدأنا ندخل فى الموود أول ما مسكنا المنيو وبدأنا نشوف هـ نأكل إيه.

بدأنا بالشوربة اللي كانت حلوة
وسخنة، طلبنا شوربة كريمة بالفراخ (9.99 جنيه) وشوربة كريمة الطماطم بنفس السعر،
بعدها طلبنا كطبق رئيسي تشيكن رول (54.99 جنيه) معاه بطاطس مهروسة وخضار سوتيه، كل
حاجة كانت حلوة جدًا والفراخ الملفوفة باللي جواها كان تحفة ماعدا أن الصوص بتاع
الفراخ كان ملحه زيادة شوية، كمان جربنا تشيكن كوردون بلو (نفس السعر) وأخذنا
معاها مكرونة فيتوتشيني بصوص أبيض وبطاطس محمرة، برضه كان حلو لكن للأسف كانت
المكرونة مش مستوية قوي.   

زجاجة المياه الحجم الكبير بـ
6.99 جنيه، ولو عاوز تشرب حاجة بعد الأكل الاختيارات عندك كثيرة من أول المشروبات
الباردة للساخنة للغازية، اختارنا شوكولاتة ساخنة (9.99 جنيه) كويسة لكن
الشوكولاتة محتاجة تُخفف بلبن لأن الشوكولاتة فيها ثقيلة، وأوريو كوكي شيك (14.99
جنيه) وكان حلو.

مدير المطعم لفرع المهندسين اللي
كنا فيه سلم علينا –ولقيناه بـ يعمل كده مع كل ترابيزة- وسألنا أخبار الأكل إيه،
قلنا له على موضوع المكرونة اللي ما كانتش مستوية والملح الزيادة في الصوص وكان
مهتم جدًا أنه يسمعنا ويتناقش معانا، وكمان قدم لنا ولرواد المطعم منيو التوصيل
مختومة من “الشركة الدولية المصرية للمطاعم” عليها عرض أنك ممكن تحصل
على خصم 10% لمدة 3 شهور على الحساب إن شالله رحت أكلت كل يوم (لكن مرة واحدة في
اليوم) وبـ يكتب لك على المنيو في جزء الخصم تاريخ بدء وانتهاء العرض، المطعم له
فرع ثاني في مدينة نصر لكن العرض ده ساري على فرع المهندسين فقط.