The Definitive Guide to Living in the Capital , Cairo , Egypt

كافيهات
سينزيو

سينزيو: رول القرفة اللذيذ في سيتي ستارز

  • سيتي ستارز، الدور الأول
  • مخبوزات وحلويات
  • 9 صباحاً - منتصف الليل -
تم التقييم بواسطة
Basma Mostafa
قيم
قيم الآن
سينزيو: رول القرفة اللذيذ في سيتي ستارز

ريحة لفائف
القرفة أو السينامون رول وهو لسّه مخبوز وطالع من الفرن طازه تقدر تخللي أحسن واحد
بـ يعمل ريچيم يبَوَظ كل حاجة عشان خاطر قطمتين تلاتة من الرول. رغم إن «سينزيو»
بـ ينقصه الحلاوة والريحة الناعمة المفحفحة اللي بـ تبقى كافية إنها تجذب الناس من
على بعد أميال، لكن برضه رول القرفة بتاعه لذيذ وطِعِم جداً.

في
الدور الأول في مول سيتي ستارز اللي في مصر الجديدة، هـ تلاقي «سينزيو» جنب «فدركرز»
على طول. الديكور بتاع «سينزيو» ألونه برتقالي في أحمر فاقع، يعني صعب قوي تعَدّي
عليك من غير ما تشوفها، حتى لو انت وسط أزحم مول فيكي يا كايرو. الخدمة هناك ودودة
ولطيفة جداً، وتجربة حلوياته اللي مليانه بالسعرات الحرارية هـ تخليك دايماً عايز
ترجع له من وقت للتاني عشان تجربها تاني وتالت.

لمّا
رُحنا هناك، كنا احنا الزباين الوحيدين اللي موجودين في «سينزيو»، ومن حسن حظنا إن
السبب ما كانش إن أكله وحش. بس بما إن إحنا الوحيدين اللي كُنا هناك فـ الويترز
كانوا مركزين معانا جداً، وده كان مخلينا مش عارفين ناخد راحتنا قوي.

كبداية،
طلبنا الـ «ميني كراميل بيكارول –
Mini-Caramel Pecaroll» (14.99 جنيه) وده كان عبارة عن رول القرفة التقليدي غرقان بصوص
الكراميل والكريم تشيز، ومتغطي بالجوز المحمص. ورغم إن الـ ميني ده المفروض إنه
النسخة المصغرة من الحجم العادي بتاع «الكراميل پيكارول»، لكن برضه كان كفيل لوحده
إنه يدينا طاقة غير طبيعية من كتر السكر اللي فيه.

من أول ما الأوردر بتاعنا نزل على الترابيزة وإحنا كنا
شاكين إنه يكون طازه؛ العجينة كانت ناشفة شوية ومش بـ تدوب في البق زي العادي بتاع
رول القرفة. بعد كده شكوكنا إتأكدت لمّا الشوكة الپلاستيك إتقسمت نصين وإحنا بـ
نحاول نقَطَعُه.

المنيو بتاعهم متوفر فيه كمان رول القرفة اللي على اسم
المحل «سينزيو» (15.99 جنيه)، وده عبارة عن عجينة رول القرفة مخبوزة مع القرفة
والسكر البني، ومتغطية بصوص الكريم تشيز.

ومن باب الفضول بس جربنا برضه الـ «ميني سناكس – Mini Snacks» (13.99 جنيه)، وده عبارة عن خمس قطع صغيرة جداً من
رول القرفة على قد القطمة. وأحسن حاجة إنكم تطلبوا صوص مختلف لكل قطعة من الخمس
قطع، شيكولاتة، كراميل، كريم تشيز، فراولة وراسبري. لو عايز تجرب حاجة صغيرة من كل
نوع يبقى الـ «ميني سناكس» هو أحسن إختيار لك، حتى كمان مش بـ يبقوا تُقال قوي على
المعدة.

لو
حاسس إنك عايز حبة سكر زيادة، ممكن تطلب إضافة صوص الكريم تشيز، الكراميل، الشيكولاتة
والجوز، وأي إضافة من دول بـ 2.99 جنيه
.

ولو نفسك في آيس كريم مع الحلويات
بتاعتك، هـ تلاقي كمان في «سينزيو» تلاجة الأيس كريم بتاع «موڤينپيك –
Movenpick». الأسعار بـ تبدأ من 10 جنيه لبولة الأيس كريم الواحدة، 18 جنيه
للبولتين، و26 جنيه للتلات بولات.

«سينزيو» كمان بـ يقدم مشروبات باردة وسُخنة.
الإختيارات فيها إسبريسو، سموذي الفواكه، وعصاير فريش. إحنا طلبنا عصير فراولة
فريش (9.99 جنيه) وكمية الفراولة اللي فيه ماكُناش حاسين إنها كافية، ومع ذلك كان
فيه شوية مزازة حلوة.

رغم إن شعار «سينزيو» “أحلي طعم
لرول القرفة على الأرض” مُبالغ فيه حبتين، لكن برضه مش هـ تندم لو أكلت هناك.
مين عارف؟ جايز في الآخر تدمن رول القرفة بتاعهم.

نصيحة 360

لو انتم مجموعة كبيرة وهـ تطلبوا من «سينزيو»، يبقى إسألوا عن مجموعات التوفير بتاعتهم اللي بـ يبقى فيها 4 رول قرفة بـ 47.99 جنيه، إنما لو اشتريتوا كل واحد لوحده هـ تبقى قطعة رول القرفة الواحدة بـ 15.99 جنيه.

أحسن حاجة

رول القرفة في «سينزيو» بـ يبقى مناسب جداً للفطار.

أسوأ حاجة

على عكس العادي في العالم كله، رول القرفة بتاع «سينزيو» ماينفعش يبقى هو الحلو بعد الأكل، لإنك بعد ما تاكله هـ تحس إنك عايز تِحَدَق.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح