The Definitive Guide to Living in the Capital , Cairo , Egypt

ريفيو وتصوير: رنا شرف

وهو مين اللي مابيحبش الأرز باللبن؟ الأكلة العظيمة اللي بيعشقها كل المصريين، واللي مرتبطة في أذهاننا كلنا بمحلات الكشري اللي بتقدم الأكلة المصرية الشعبية الشهيرة وبعدها نطلب الحلو أرز باللبن، ده غير إن الأرز باللبن أكلة بنعملها في بيوتنا لما بنكون فرحانين، يعني أكلة مرتبطة بالسعادة.. ولو أنت بتحب الأرز باللبن والعاشورا، فالريفيو ده علشانك.

يمكن نكون كلنا سمعنا عن حلواني صابر، وفيه مننا جربه، سواء في الإسكندرية في الصيف أو في القاهرة.

مؤخرًا، قررنا نروح “صابر” فرع المهندسين، واستمتعنا هناك بأطباقه المبهجة، جربنا الأرز باللبن الكلاسيكي السادة، وده سعره 12 جنيه، وكان معمول زي ما الكتاب بيقول.

جربنا كمان أرز باللبن فول أوبشن، أيوة هو اسمه كده! وده عبارة عن أرز باللبن وقشطة ومكسرات، والطبق فعلًا ممكن نعتبره وجبة متكاملة زيها زي العشا أو الغدا، الطبق مشبع جدًا، وحلو قوي ومعمول باحترافية كبيرة، وده سعره 24 جنيه.

جربنا كمان العاشورا، كانت حلوة وخفيفة وطعمها تحس إنه بيتي، وسعرها 12 جنيه.. ياااه فكرتنا بالطبق اللي كانت جدتنا بتعمله زمان في موسم عاشوراء.

يمكن أكتر حاجة ضايقتنا، هي إن المكان مافيهوش صالة للأكل، يعني هتاخد طلبك وأنت تتعامل بنفسك بقى، سواء هتاكله في العربية أو وأنت ماشي في الشارع.

لكن من ناحية تانية، عجبنا جدًا إن المكان فيه أطباق حلوة كتير وسعرها معقول، زي المشمشية والآيس كريم وحاجات أكتر.