The Definitive Guide to Living in the Capital , Cairo , Egypt

كافيهات
فريسكو – Fresco

فريسكو: بيكري جديد بجودة تنافس وأسعار معقولة في أرض الجولف

  • 49 ش حسن أفلاطون - متفرع من شارع النزهة - أرض الجولف
  • مخبوزات وحلويات
تم التقييم بواسطة
Angie El Batrawy
قيم
قيم الآن
فريسكو: بيكري جديد بجودة تنافس وأسعار معقولة في أرض الجولف
في يوم هادئ فى مكتب كايرو 360 اتصلوا بنا يدعونا نروح نزور البيكري الجديد اللى افتتحوه فى شارع متفرع من النزهة بأرض الجولف، وعدناهم بالزيارة وكتابة مقال نقدي كمان.. لكن بطريقتنا.. طريقة المخابرات الكايرو360ية.
من غير ترتيب مسبق معاهم زرنا المكان بعد المكالمة بكام يوم وفى وقت مبكر من اليوم.. المكان من بره هادئ وغالب عليه اللون البيج وفيه ستائر لطيفة مغطية الشبابيك. أول ما تدخل هـ تحس بأن المكان مختلف، ولما تركز في تفاصيله هـ تعرف ليه، سقف المكان مثلث الشكل والخشب غالب عليه اللون البيج مع أجزاء حجرية، المكان واسع بأرفف على الجانب اليمين فيه سلات العيش مغطاة بمفارش بمربعات حمراء زي اللى موجودة فى اللوجو بتاعهم واللى للأسف كان بعضها فاضي وتحتها Label باسم أو نوع العيش، وفيه كمان بورد معلقة قبلهم عليها تعليقات أصحابهم على المكان وتهانيهم بالافتتاح مكتوبة على الـ Receipt بتاعهم ودي كانت فكرة لذيذة جدًا. وعلى جانبي المدخل فيه ترابيزتين صغيرين مدورين.

على الجانب الشمال قابلنا “مؤمن” البشوش واقف وراء ثلاجة العرض اللى فيها أنواع مختلفة من المخبوزات والحلويات والساندويتشات وبرضه مكتوب اسمها على Label، يليهم ماكينة عمل كابتشينو وأسبريسو.
فيه منيو صغيرة ممكن تعرف منها اللى بـ يقدموه زي: الكيك، والمافن، والكوكيز، وبار الحلويات، الفطائر المحلاة، الكيش، والـ Buns المحشوة، والمخبوزات، والساندويتشات، والعيش.
المكان قائم على مفهوم “Take it and go” وده تفسير أنهم مش بـ يقدموا الحاجة فى أطباق على الترابيزات، لو هـ تأخذ حاجة بـ يقدموها فى علب المكان بشكلها اللطيف أو فى أكواب بلاستيك، اللوجو واخد من نفس روح الديكور بشعار Taste the Difference.
طلبنا –رغم أنه مش مكتوب فى المنيو- شاي باللبن (8 جنيه)، وللإفطار أخذنا كرواسون بالجبنة (7.50 جنيه) وباتيه بالجبن (7.50 جنيه) وكمان كوكيز شوكولاتة (8 جنيه)، وللتيك آواى أخذنا كالزوني باللحم المفروم (14 جنيه)، وفطيرة بالفواكة حجم صغير (12 جنيه)، وTurkey cheese bun بسعر 10 جنيه. أحلى حاجة عجبتنا فى المخبوزات أنها مش مزيتة، طعمها حلو مختلف عن أماكن ثانية، كوكيز الشوكولاتة كانت وهمية ما كناش عاوزينها تخلص، تارت الفاكهة كان كمان حاجة مميزة للمكان، فى الأول هـ تفتكر أن اللى فيه ده مربى لكن لما تذوقه هـ تحس بقطع فاكهة فى فمك، الكالزونى واللى بالتركي كانوا ما يتخيروش عن اللى قبلهم.

من الحاجات اللى لفتت انتباهنا وما شفناهاش فى مكان ثاني بار الفريسكو نوجة اللى بالمكسرات، بار مربع شكله مغري وشهي ممكن نجربه فى زيارة ثانية لنا هناك، وكمان كيك البلح كان شكلها جذاب جدًا. فى النهاية كل الحاجات اللى طلبناها كانت بـ 75 جنيه، الأسعار لطيفة جدًا مقارنة بأماكن ثانية كثيرة ومافيش خدمة وضريبة.
“فريسكو” لهم مطبخهم الخاص لكنه مش موجود فى نفس المكان، واستعانوا بشيفات من فنادق 5 نجوم، لو حابب تأخذ حاجتك من عندهم فريش العربية بـ تيجي مرتين الساعة 12 و4 الظهر، وده يفسر ليه كان فيه سلال فاضية لما زرناهم بدري، وفيه خطة أن العربيات تيجي مستقبلاً مرة كمان الساعة 7 الصبح وبالليل خالص الساعة حوالي 8 مساءً. وإحنا ماشيين أعطونا خبز شيباتا فرنساوي مجاملة من المكان كان حلو لكن كان نفسنا نذوقه وهو لسه طالع فريش من الفرن.
“فريسكو” لهم صفحة على الفيسبوك ممكن تتابعوا أخبارهم منها، المكان لسه فى البداية وطبيعي أن فيه حاجات عاوزة تتضبط لكننا اتبسطنا بزيارتنا لهم وإن شاء الله ما تكونش آخر مرة.

نصيحة 360

المكان فيه إنترنت Wi-Fi مجانًا.

أحسن حاجة

منتجات طعمها حلو ومش مزيتة وأسعارها معقولة.

أسوأ حاجة

نفسنا الحاجة تيجي طازجة بدري وإحنا رايحين شغلنا، الساعة 12 وقت متأخر قوي.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح