The Definitive Guide to Living in the Capital , Cairo , Egypt

كل عشاق القهوة بيكون نفسهم في مكان يحقق لهم أحلامهم في القهوة طعم مظبوط وإضافات متنوعة ومكان هادي يشتغلوا فيه وسط الأشجار وكل ده متوفر في القهوة خان.

وسط أشجار المعادي فيه مكان مخفي إلا عن عشاق المزاج والقهوة، وهتلاقوا جنبه مكان للفنانين وأصحاب التجارب المختلفة اسمه Places des arts واللي بيقدم ورش في كل أنواع الفنون اللي تتخيلوها.

المكان اللي بنتكلم عنه هو القهوة خان، واللي فيه جزء مفتوح وسط الأشجار وفيه مكان جوه للتركيز والبعد عن ريحة السجاير، الديكورات متميزة وفيه منها أمثال شعبية مرسومة على الكراسي  الملونة من فوق.

طلبنا مكياتو عادي بـ 21 جنيه، وسموزي عصير ليمون بالنعناع بالعسل بـ 26 جنيه، وسيزر سلاد بـ 38 جنيه.

القهوة كانت تقيلة ومركزة ولا يُعلى عليها مزجتنا جدًا خاصة إن نوع البن اللي بيستخدموه مميز،  كمان سموزي عصير الليمون كان تحفة وماحسيناش بفرق إنه بعسل وقدر ينعشنا وسط يوم حر متعب.

لاحظنا إن مافيش ساندويتشات أو سلاطات كتيرة في المنيو وده يمكن لأنهم مركزين في القهوة بس فأختيارتنا كانت ما بين سلاطة تونة أو سلاطة مكرونة أو ساندوتيش روز بيف أو دجاج مشوي، فقلنا نجرب حظنا مع سيزر سلاد ويارتنا ما جربنا.

السلاطة عبارة عن خس وجبنة بارميزان وقطع دجاج محروقة بايتة ناشفة ما تتكلش، حاولنا نتغاضى عن إن فيه محتويات كتيرة ناقصة من السلاطة وقلنا يمكن الطعم يعوض لكن لأسف لاقينا نفسنا بناكل خس بس وجبنة حتى الصوص معلب مش هم اللي بيعملوه. فكان إحباط جامد لينا برغم طعم القهوة التحفة والحلويات.

تجربتنا مع الأكل كانت محبطة! نتمنى إنهم يحسنوا من نفسهم ويقدموا لنا مكان كامل نقدر نقضي فيه اليوم ونشتغل بمزاج وناكل بمزاج برضه.