The Definitive Guide to Living in the Capital , Cairo , Egypt

من فترة للثانية بنحب نجرب أماكن جديدة، واكتشفنا بالصدفة وسط محلات الملابس المختلفة في جزيرة العرب مكان مناسب جدًا لهدنة بعد التسوق، وهو قهوة وردة.

المكان ممكن تقعد فيه بره في الهواء الطلق أو جوه، مليان ديكورات بتعبر عن زمان من صور ممثليين وألوان مميزة، حتى كان فيه عربية فول زينة نعتقد لسه موجودة من جو رمضان. لكن أكتر حاجة ضايقتنا إن مافيش مكان لغير المدخنين وكله فيه تدخين وشيشة.

طلبنا فطير وجبنة بـ 35 جنيه، وساندوتش بيض بالبسطرمة بـ 14 جنيه، وساندوتش شيش طاووق بـ 32 جنيه، وسموزي ليمون بالنعناع بـ 37 جنيه.

الفطير كان سخن والجبنة كانت بالطماطم حادقة ولذيذة، لكن  عجينة الفطير نفسها  للأسف ما كنش طازة وكان فيه زيت كتيير.

أما خيبة الأمل الكبيرة كانت في ساندوتش البيض بالبسطرمة لأن العيش كان بايت والبيض كان مفرفت ومالوش طعم في الأغلب الشيف ماحطش البسطرمة قبل البيض وسابهم يستووا سوا فالبيض استوا زيادة عن اللزوم وفرفت.

عزائنا الوحيد كان في ساندوتش الشيش طاووق اللي بالرغم من أن العيش كان بايت برضه إلا أن قطع الشيش طاووق كانت هايلة.

سموزي الليمون بالنعناع كان حلو كمان الصن شاين بـ 40 جنيه، كان كويس بالرغم من أن صوص الرمان المستخدم كان نوع سيء بس ماشي، قلنا نجرب حلو قبل ما نمشي فطلبنا حلو وردة “مقرمشات” بـ 20 جنيه ودي كانت أجمل حاجة أكلناها هناك عبارة عن جلاش مقطع صوابع زي الشبسي وعليه عسل وقرفة كان مقرمش وجميل لا يقاوم في حلاوته.

تجربتنا هناك كانت مختلفة صحيح ناقصها حاجات بس المكان مميز في العصائر وقعدة خفيفة للحلو أكثر من غداء أو فطار.