The Definitive Guide to Living in the Capital , Cairo , Egypt

ساعات لما الواحد بـ يشوف حاجة جميلة جدًا بـ يبقى نفسه
يشوفها في كل حتة يروحها أو يكون موجود فيها.. وضِيف على كده أنها تكون مختلفة
واستثنائية كمان.. ده نفس الإحساس لما رحنا –وكذا مرة- مطعم وكافيه
“ميلانج”.

الموضوع ممكن يوصل معاك إلى حد الإدمان.. إدمان الراحة
والتميز، ميلانج موجود في الشيخ زايد في مكان متميز جدًا وأمامه كافيه ثاني اسمه “مو – MO”،
الكافيه له منطقتين للجلوس: واحدة فى مكان مغلق واجهته زجاج بـ تطل على المنطقة
الثانية اللي في الهواء الطلق بره، أول ما تدخل هتلاقي القعدة كلها على اليمين
والشمال وبطريقة مبتكرة هـ تلاقي المطبخ في المنتصف بزجاج شفاف فـ بتبقى شايف
الشيف وهو بـ يحضر الأكل وبار ثاني على الجنب للمشروبات، فيه جزء للكنب وقعدة
صالون، وجزء ثاني ترابيزات وكراسي، المكان ألوانه وتفاصيله بسيطة والنجف كلاسيكي مع
فرش مودرن بس متوظفين بـ شياكة.

الجرسونات هناك لطاف جدًا وبعضهم
له حس فكاهة عالي وتلاقيه مبتسم وبـ يهزر معاك بأدب، وبـ يحبوا الأطفال ويقعدوا
يشاكسوهم ويحيوهم وهما ماشيين، فيه 2 منيو: واحدة خاصة بالأكل بأنواعه: مقبلات،
شوربة، أطباق رئيسية، بيتزا، ساندوتشات، مكرونة، أكل بحري.. إلخ، والمنيو الثانية
خاصة بالتحلية والآيس كريم والمشروبات الساخنة والباردة.

جربنا أصناف كثيرة فى زياراتنا
المتفرقة: ساندوتش كانتري تشيكن كلوب (24.99 جنيه)، وسلاطة تشيكن سيزر (29.99)، وميلانج تشيكن باستا
(39.99)، كل حاجة فريش سواء الأصناف أو الخضار والمميز جدًا عندهم أنهم بينزلوا لك
–قبل ما الأوردر يجهز- سلة عيش وباتون ساليه وبقسماط وأنواع مختلفة من المخبوزات ومعاها
طبق صغير فيه قطع زبدة على شكل فيونكات، وبجد السلة دى رائعة هـ تستمتع باكتشاف
طعم أكثر من 5 أصناف لأنك هتلاقي اختيارات من اللي بالجبنة أو الينسون أو السمسم
وحبة البركة وغيرها، والطبق ده طلع فى الآخر بـ (2 جنيه) بس! وده قليل أوى على
جودتها وطعامتها. بس خلي بالك أوعى تملأ بطنك قبل ما يجيلك الأكل.  

السندوتشات بينزل معاها بطاطس –مقرمشة
ولذيذة جدًا- وسلاطة كول سلو، والأطباق بـ ينزل معاها اختيارين لك من: خضار سوتيه،
أو بطاطس مهروسة، أو أرز، أو بطاطس محمرة أو مكرونة، أغرب وألطف حاجة –فى نفس
الوقت- شكل السيرفيس على الترابيزة هناك، الشوك والسكاكين لها شكل غريب مبتكر
والأطباق فيه منها على شكل رغيف عيش مثني طرفه، وده كان موجود لما طلبنا ساندوتش
الفاهيتا (24.99 جنيه)، كمان الجرسونات بيسألوك كل شخص طلب إيه لما بـ يجهزوا
الترابيزة بحيث ما يزحموهاش بسيرفيس كثير، لأنهم بـ يحطوا الشوك والسكاكين
المناسبة لكل طلب.

بالنسبة للمشروبات الاختيارات
مافيش أكثر منها، جربنا فى المشروبات الباردة –واللي بـ يتميزوا بها- أوريو شيك
(25 جنيه)، شوكو مارس (28 جنيه)، ليون هارت (28 جنيه) والواحد منهم لذيذ جدًا وغني
بالشوكولاته وهـ يقفل معاك، كل مشروب وجبة كافية لوحده مش هتقدر تأكل حاجة بعدها،
ولا تكمله لو أكلت حاجة قبله.

أما التحلية اسم على مسمى، جربنا
البانانا بوت (23.99 جنيه) وهي عبارة عن 3 اختيارات لك من الأيس كريم معاها موز و3
أنواع صوص عليها وكانت رائعة، ولو حابب تروح الصبح عندهم برضه منيو للفطار.

ولو أنت عندك مناسبة زى عيد ميلاد
ممكن تعمله هناك، لو أنت جبت التورتة معاك من بره بـ تدفع بس 50 جنيه سيرفيس
للترابيزة، أما لو جبتها من عندهم (فيه تشكيلة كبيرة) بيتراوح سعر الحجم الصغير
(من 150 إلى 160 جنيه) ولو أكبر سعرها (550 جنيه)! وهما لطاف جدًا بيهيئوا لك مناخ
حلو حتى لما بيقدموا التورتة بيشغلوا مزيكا عيد ميلاد وبيقدموا لك الأطباق
وبيسألوك عايز تحط كام شمعة.. بجد لطاف جدًا ومتعاونين يهمهم راحتك وأنك تكون
مبسوط، بس لازم تحجز قبلها بعدد الأشخاص وخاصة لو في ويك إند علشان الزحمة.

ميلانج لهم فرع ثاني فى داندي مول
عند مدخل السينما، والكافيه بـ يقدم كمان خدمة Catering وأنت بتختار سواء من المنيوهات
اللي هما محددينها أو على حسب ما تحب بس يفضل تتفق معاهم قبلها بوقت كافي.