The Definitive Guide to Living in the Capital , Cairo , Egypt

لفت نظرنا وإحنا بـ نتمشى بالعربية
عند سور نادى الزمالك فى شارع جامعة الدول العربية وجود محل عصير جديد بديكورات
مختلفة، ومن أول ما لمحنا أنه محل عصير تحمسنا جدًا لأننا دائمًا بـ ندور على مكان
نشرب فيه عصير حلو غير فرغلى اللى فى آخر جامعة الدول برضه وتوت إكسبريس اللى فى
ميدان فينى لأننا زهقنا من طلب نفس العصير واللى كثير بـ ييجى مش ساقع.

أول مرة قررنا فيها نروح المكان ما
عرفناش ندخله بسبب وجود شبه فرح عند الباب وده كان ثانى يوم من مقتل القذافى لكن إحنا
ما ربطناش أبدًا أن يكون أصحاب المحل ليبيين وبـ يحتفلوا بتحرير ليبيا، كانوا
عاملين مسرح وجايبين دى جي وأراجوز وقالبين الدنيا.

وفى يوم ثانى قررنا نركن العربية
وننزل نكتشف “Havana Juice”،
من أول ما دخلنا اتبسطنا جدًا بالكراسى العالية والديكور الملون المختلف ولفت
نظرنا الرسومات الموجودة على الحائط والكلام المكتوب بخط اليد عن ليبيا والثورة
الليبية وكلام عن أبطال ليبيين غير معروفين لنا كمصريين عاديين.

 أول ما دخلنا لقينا مطبخ أمريكانى واقف وراءه 3
شباب بـ يعملوا العصائر والقهوة وشاب ثالث بـ يعمل كريب، الكاونتر اللى أمامهم
موجود عليه برطمانات شفافة فيها كورن فليكس وحلويات ملونة من اللى بـ تتحط على
الكريب والوافل. للمحل دور ثانى علوى  كبير
بواجهة زجاجية كبيرة جدًا ونظيفة بـ تطل على شارع جامعة الدول وفندق النبيلة، المنظر
كان حلو ومريح للأعصاب بالليل وموجود في الدور العلوى حمام نظيف وشيك مكتوب على
بابه “تحيا الثورة الليبية”.

أخذنا المنيو الملون بألوان أفريقية
زاهية وبصراحة أتلخبطنا جدًا من عدد العصائر والحاجات المكتوبة، الموضوع مقسم لكذا
قسم: أولاً الفرابيه وموجود منه الفراولة، التمر واللوز، الأفوكادو والفستق، والفراولة
وجوز الهند والأسعار بـ تتراوح بين 15 لـ 18 جنيه، قسم سلطة الفواكة موجود فيه
نوعين: واحد بصوص الفخفخينا 18 جنيه وواحد فواكة بدون صوص 22 جنيه.

منيو العصائر الطبيعية كبير ومقسم
لـ 3 أجزاء: الأول للعصائر الطبيعية زى الفراولة، البطيخ، الكنتالوب، الرمان، المانجو
وأسعارهم تتراوح ما بين 9 جنيه (الليمون) لحد 18 جنيه (الرمان)، الجزء الثانى
للعصائر الصحية وده الجزء المبهر والجديد فى المنيو وموجود فيه كوكتيلات مختلفة
وغريبة بأسماء بـ تعبر عن مكوناتها زى مثلاً “كولد فايتر” وده برتقال+ زنجبيل+
خيار، و”سترايت أب” اللى مكوناته جزر+ تفاح+ كمثرى+ مانجو، و”كيدنى
كير” وده أناناس+ تفاح+ بطيخ وموجود كذا كوكتيل بمكونات غريبة ومكتوب تحت أسماؤهم
الفائدة من شربهم. الجزء الثالث من العصائر موجود فيه كوكتيلات غريبة بأسماء بلاد
ومناطق زى مثلاً كوكتيل الأدغال (أناناس+ كيوى+ مانجو) وكوكتيل بونيتو (ريحان
وفراولة).

آخر صفحة فى المنيو موجود فيها
الحلويات زى كريب نوتيلا (13 جنيه) والوافل (15 جنيه) وبان كيك (15 جنيه) وفيه أسعار
لكل إضافة زي مثلاً إضافة آيس كريم 8 جنيه، إضافة لوز 3 جنيه، إضافة فستق 5 جنيه
وكمان فيه إمكانية لإضافة الفواكة 4 جنيه.

عصائر هافانا كمان بـ يعملوا كريب
مالح 15 جنيه مع إمكانية إضافة تونة، مشروم، ذرة حلوة أو زيتون.

إحنا جربنا عصير الكيوى وعصير
فراولة وسلطة فواكة بالصوص فى كاسات طويلة ونظيفة جدًا وطلبنا كريب نوتيلا بإضافة
بندق وجاء لنا سخن ومليان سودانى أكثر من البندق وما عجبناش قوى واللى ضايقنا أننا
دفعنا أكثر من اللى متوقعينه بسبب البندق والسودانى لأنهم حسبوا النوتيلا والبندق
والسودانى كل واحد فيهم إضافة بـ 4 جنيه.