The Definitive Guide to Living in the Capital , Cairo , Egypt

كافيهات
ولعة – Wel3a

ولعة: كافيه شيشة مُبتَكَر في الزمالك

تم التقييم بواسطة
Heba El-Sherif
قيم
قيم الآن
ولعة: كافيه شيشة مُبتَكَر في الزمالك

القهاوي
والكافيهات اللي بـ تقدم شيشة مفيش أكتر منها في البلد ومِنطورة في كل حتة،
وغالباً أي منطقة هـ تبقى فيها هـ تلاقي قريب منك مكان بـ يقدم شيشة، ولو حتى
القهوة اللي عالناصية. لكن الصعب بقى هو إنك تلاقي مكان بـ يقدم شيشة حلوة ومعمرة
وتفضل قاعد ساعتين تِشِد فيها (من غير ما تدفع فيها دم قلبك).

في نص
شارع 26 يوليو، في قلب الزمالك، هـ تلاقي كافيه اسمه «ولعة»، وده بـ يقدم لك كل
اللي إحنا قلناه ده.

المكان
اللي كان هناك قبل «ولعة» كان عبارة عن قهوة بلدي بـ يسهر فيها الناس بالليل ويدخنوا
لهم حجرين. أما «ولعة» فـ هو بـ يصنف نفسه على إنه أول كافيه في كايرو يكون مخصوص
للشيشة. المكان صغير ومفروش بكراسي پلاستيك وكَنَب لونه رمادي، وشوية منهم مرصوصين
برة المحل وعاملين صف كبير على الرصيف وجو عالي جداً.

رغم إن
الكافيه بـ يقدم التوباكو المحلي ماركة “النخلة” (12 جنيه)
و”ميزو” (15 جنيه)، لكن برضه عنده شوية حاجات مستوردة حلوة جداً. نقول
مثلاً التوباكو الأردني “شيش بيش” (22 جنيه) اللي بـ ينفرد بيه «ولعة»،
وده خليط توباكو معمول من العسل الصافي وطعمه بـ يبقى معسل أكتر وأحلى. وفيه كمان
نوع مستورد من أمريكا اسمه بلو ميست Blue Mist وبـ 25 جنيه.

لمّا
رُحنا طلبنا معسل فاخر (18 جنيه). وطبعاً مش محتاجين نقول لكم إنها كانت ليلة
طويلة ومليانة دخان. الشيشة كانت متقدمة مع لي پلاستيك، والويتر كان مركز جداً والولعة
كانت بـ تتغير بانتظام من غير ما نطلب. الشيشة متوفرة عندهم بكل النكهات، وحتى
المعسل كمان.

جرب بقى تتطلب الإختيار المفتوح بتاعهم، وده عبارة عن شوط
مش بـ يخلص من شيشتك المفضلة ومتقدم معاها براد شاي سخن. متوفر في القهوة كل أنواع
التوباكو بأسعار من أول 22 جنيه ولغاية 45 جنيه.

الوجبات الخفيفة في «ولعة» فيها ساندوتشات (ما بين 22
جنيه و26 جنيه)، زي ميكس الجبنة، الروست بيف،  
والتركي (شرايح الديك الرومي). أي ساندوتش من دول بـ ييجي على حسب إختيارك
في عيش متحمص أو متسخن عادي في الميكروويڤ. فيه إختيارات تانية فيها سلاطات، كيش،
أنواع مختلفة من الكيكات (18 جنيه لـ 22 جنيه)، وكمان كاپ كيكس. كيش الجبنة كان
متقدم بارد شوية، بس مزيج الفراخ مع الفلفل الألوان والبصل كان متبل حلو جداً
وكبير.

جنب منيو الشيشة المتنوع جداً، «ولعة» برضه بـ يقدم
تشكيلة مشروبات مثلجة ومشروبات فريش مضروبة في الخلاط «سموذيز – Smoothies ». سموذي الصباح عندهم عبارة عن مشروب منعش وطعمه غني
من خليط الفراولة، الموز، والخوخ، وكلهم معصورين طازة ومضروبين في الخلاط مع الكمية
المظبوطة من التلج.

«ولعة» بـ يقدم أنواع القهوة
السخنة والقهوة المتلجة كمان. يعني من الآخر، أياً كان اللي بـ تحب تاخده مع
الشيشة، سواء قهوة، عصير فواكه، أو حتى وجبة خفيفة، كل ده هـ تلاقيه في «ولعة».

نصيحة 360

« ولعة» بـ يقدم فطار تيك آواي من الساعة 8 صباحاً لغاية 12 ظهراً، تقدر تختار من تشكيلة المافن، الكرواسون، والحلويات بتاعتهم، ده غير القهوة كمان.

أحسن حاجة

الساندوتشات وقطع الكيك عندهم بـ تبقى كبيرة.

أسوأ حاجة

الناموس والدبان بـ يدخل المحل بسهولة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح