The Definitive Guide to Living in the Capital , Cairo , Egypt

جميلة هي كتب السفر اللي بتخلينا نسافر لكل دول العالم من غير ما نتحرك من مكاننا.. ومؤخرًا استمتعنا بكتاب أساطير السفر السبعة للمؤلفة والرحالة شيرين عادل.. وفي السطور الجاية هنقولكم على رأينا في الكتاب.

نبدأ بالغلاف واللي عليه صورة بنت بتستريح من تعب السفر في الطريق.. صورة معبرة بتشرح فكرة الكتاب بشكل مباشر ومن غير لف ودوران، يعني مجرد ما تشوف الغلاف هتعرف على طول فكرته، يمكن كنا نتمنى نشوف فكرة إبداعية أكتر في الغلاف لكن بصفة عامة تصميم كريم آدم كان مريح للعين، وحبينا تناسق الألوان، والطريقة اللي مكتوب بيها عنوان الكتاب.

الكتاب بيعتبر فعلًا أول دليل عربي متكامل لكل الناس اللي نفسها تخوض تجربة السفر لأول مرة، من خلال سبع فصول بيشرحوا لك بالتفاصيل أساطير السفر السبعة، والكاتبة تقصد من جملة أساطير السفر، الحكايات اللي كلها كدب واللي بتدور عن السفر، زي مثلًا أن السفر للأغنياء بس، أو أن التأشيرة صعب تخرج للمصريين، وإلخ إلخ.

 الفصل الأول بعنوان أسطورة التخطيط، وده بتتعرف من خلاله على الطريقة اللي تقدر تخطط بيها لرحلتك بطريقة علمية. لكن قبل الفصل ده فيه جزء مهم جدًا عن نماذج من عشاق السفر في العالم وفي مصر، حقيقي جزء مفيد ومكتوب بطريقة هايلة. بنتعرف من خلاله على قصص ناس عشقت السفر بجنون وقررت تلف العالم.

فصول الكتاب مفيدة جدًا، وبتقدملك فعلًا عشرات من النصائح والإرشادات المهمة اللي هتفيدك لو قررت تقوم برحلة لأي دولة من دول العالم بأرخص التكاليف.

الكتاب بيجاوب على أغلب الأسئلة اللي بتشغل بال كل اللي بيرغب في تجربة السفر للمرة الأولى، زي مثلًا إزاي تطلع تأشيرة، وإزاي تحجز رحلة طيران بسعر رخيص جدًا، وإيه وسائل المواصلات اللي تستخدمها وأنت مسافر.

الفصول اللي بيتكون منها الكتاب هي: التخطيط، التأشيرة، الإقامة، المواصلات، اللغة، الأكل، والسلامة.

استمتعنا جدًا بكتاب أساطير السفر السبعة. وبنشرحه للناس اللي نفسها تلف العالم بأقل التكاليف.