The Definitive Guide to Living in the Capital , Cairo , Egypt

بيسو لما بـ يتكلم لازم يعوج فمه لدرجة أنك ممكن تعتقد أنه مصاب بالشلل أو ده عيب خلقى لكنه برضه لزوم التمييز.. وهو كمان بـ يحب المشاركة الوجدانية فلما يكلمك لازم يبص لواحد ثانى، ولو بـ يتكلم فى أتوبيس بـ يخلى كل الركاب يشاركوه.. حتى لو واحد جنبه مش مهتم يخبطه فى كتفه ويقول له: “واخد بالك معايا يا بشمهندس”.. طبعًا ده غير هدومه اللى عبارة عن جنينة ورد متعددة الألوان مالهاش علاقة ببعض.. وله كمان مجتمعه الخاص “حمو، أنح، روما، الكنو، الضانى، وحبيبته البنت “حلاوة”.

(وجه الشرس)
شخصيتنا “بيسو”… أو أى حد ثانى.. ممكن يكون شرس جدًا ويغلط فى الناس لأتفه الأسباب ويفرج على اللى بـ يتخانق معاه أمة لا إله إلا الله، إلا فى حالتين: الأولى أنه الشيخ رمضان يتدخل وبيسو بـ يعمل له ألف حساب.. أو أن اللى بـ يتخانق معاه يطلع ضابط أو “حكومة” زى ما بـ يحب يسميهم وساعتها الحال بـ يبقى غير الحال.

(وجه الرومانسى)
وده حضرتك ممكن تلاقيه فى السينما وهو قاعد جنب البنوتة اللى اختارها بعناية (عروسة مولد متنكرة فى شكل بنت) وبرضه الطقم العجيب اللى لابسه وقافل كل أزرار قميصه واختاره بعناية.. وممكن تكون دى المرة الـ 4 اللى يشوف فيها الفيلم علشان يحكى لحبيبته كل اللى هـ يحصل أول بأول.

(وجه “المسكف” مش المثقف)
بيسو المسكف هو “محمد جرنان” اللى شغال فى مكتبة ما من مكتبات مصر وجرنان، خلص الإعدادية بجدارة واشتغل فى مهنة المكتبات دى من زمان وهو بـ يحب القراءة جدًا بـ يقرأ أى حاجة جرائد، مجلات، ورقة مرمية على الأرض.. وبـ يمسك الجرنان من الجلدة للجلدة حتى الإعلانات المبوبة بـ يقرأها والناس كلها بـ تسأله لو قرأ حاجة عن شغل لابنه أو قريبه.. ومن هنا جاءت شهرته “محمد جرنان” واللى لازم قبل ما يتكلم يقول لك: “النظرية يا بشمهندس هى” ويبدأ يخش فى الموضوع.. هو بـ يحب النشرة جدًا وبـ يحب كمان التحليل جدًا أول ما تخلص النشرة يقعد يكلمك عن الرياضة والعلوم والفكر والسياسة، أصله بـ يفهم فى كل حاجة.

(وجه أخير)
الكتاب ممتع وفيه تصوير لشخصيات كثير ممكن نلاقيها فى أى حتة فى مصر.. ممكن يؤخذ على الكاتب بس تكرار بعض الأوصاف فى كثير من الشخصيات اللى بـ يحكى عليها، وبعض الألفاظ الخارجة (مع أنها مش خارجة قوى) بس برضه تؤخذ على الكاتب.. الخلاصة أن قدرى نوار عاوز يقول لك تعرف على بيسو وبص فى اللى حولك كويس.