The Definitive Guide to Living in the Capital , Cairo , Egypt

ناس كثير بـ توصم الحضارة الفرعونية بصفات مش فيها، ويمكن أشهر مثال على ده كلمة “الفرعنة” اللي بـ تُقال على حد مفتري، وكأن صفات الافتراء والتجبر كانت واحدة من الصفات المصرية القديمة، وبعض الناس بـ تختذل تاريخ مصر كله في كلمة فرعون، لكن الحقيقة غير كده، ممكن نعرفها من كتاب مهم اسمه “الأخلاق في الفكر المصري القديم” للدكتورة شاهيناز زهران.
وإحنا صغيرين بـ يفضلوا أهلنا يعلمونا الصح والغلط، ويحاولوا يوصلوا لنا مكارم الأخلاق طوال الوقت، ولما بـ نكبر، ساعات بـ نكون محتاجين من وقت للثاني أن حد ينصحنا أو يقول لنا نتصرف إزاي في موقف معين، وفي اعتقادنا مافيش أحسن من جدودنا الفراعنة يقولوا لنا النصيحة ويقدموا لنا حلول لكثير من المشاكل اللي بـ نقابلها يوميًا من خلال النصوص الهيروغليفية اللي سابوها لنا على ورق البردي، واللي بـ توثق لأخلاقيات ونصائح قالها حكماء الفراعنة، يعني مثلاً فيه نص بـ يقول: “لا تكن جشعًا، إياك أن تغتصب أي شيء من يد غيرك، الرجل العظيم يعطي من بجواره، الإنسان الفاضل هو الإنسان الحليم الرزين”.

الأخلاق في الفكر المصري القديم كانت سبب أساسي من أسباب عظمة الحضارة الفرعونية، لأنه لولا قيم زي الأمانة واحترام العلم والصدق والمثابرة والتفاني والصدق عمر ما كانت الدولة المصرية القديمة هـ تقوم لها قومة أبدًا، وعلينا كلنا أننا نفخر بالنصوص دي، وبالحضارة دي ككل ويكفي أننا نقول أن فلاسفة اليونان زي أرسطو وسقراط وأفلاطون تأثروا بشكل مباشر بالفكر الأخلاقي في مصر القديمة، فمثلاً هـ نشوف أن فكرة زي فكرة العدالة أول مرة تم الحديث عنها، كان في عهد الفراعنة، بعدين ظهرت في كتابات “أفلاطون” بعد زيارته لمصر، كمان فضيلة “ضبط النفس” اللي كانت واحدة من الأسس الفكرية اللي قامت عليها فلسفة أفلاطون، وغيره كثير من فلاسفة اليونان، ده غير أفكار ثانية كثير استمرت لحد النهارده زي عقيدة خلود الروح، وقيمة العمل، والعدالة، وحرية الإرادة الإنسانية، وغيرها من الأفكار المهمة.