The Definitive Guide to Living in the Capital , Cairo , Egypt

على عكس السائد في الساحة الأدبية. كل شعراء الفصحى أو أغلبهم شعرهم صعب ومش مفهوم. وعلى عكس طل علينا الشاعر الفلسطيني الكبير مريد البرغوثي بكتاب فيه قصائد لم تنشر من قبل. قصائد تم طبعها ونشرها بعد وفاة زوجته الروائية الكبيرة رضوى عاشور.

الكتاب بشكل عام عبارة عن قصيدة واحدة طويلة في حب رضوى عاشور. وأغلبها كانت مسودات قصائد مكتوبة من زمان أعاد مريد النظر فيها ونشر بعضها.

 [جمال المرأة لا يُرى

إنه يُكتشف]

القصيدة اللي فاتت بعنوان [جمال] وفي 6 كلمات اختصر مريد العلاقة بينه وبين حبيبة عمره. ويمكن ده جوهر علاقته بكل الجمال اللي في العالم. والقصائد القصيرة في الكتاب أجمل بكثير من القصائد الطويلة اللي ظهرت مرتبكة لسبب مش مفهوم.

مسيرة مريد البرغوثي طويلة، لكنه مش مشهور زي شعراء تانيين كثير، ويمكن شهرة ابنه تميم البرغوثي أوسع من شهرته. لكنه طول الوقت مش مهتم بالشهرة أبدا. طول الوقت مهتم إنه يكتب الشعر بالطريقة اللي بيحبها.

مريد بيكتب الشعر بنبرة هادية بعيدا عن الشعر اللي كله صراخ. استخدم لغة بسيطة جدا وسهلة عشان يعبر عن خيال جامح. وبيحاول طول الوقت انه يخلي القصائد بعيدة عن لغة الشعر. بيحاول يخلي الشعر أقرب للكلام العادي. لكنه أنيق أغلب الوقت.

مريد طول الوقت مشغول برضوى. ومشغول بتجديد العلاقة بين الرجل والمرأة، بحثا عن شكل العلاقة الأفضل.

وفي قصيدة [الروض العاطر] اللي بتعتبر من أجمل قصائد الديوان هنشوف ازاي بيعبر عن وجهة نظره في التعامل مع المرأة.

 [قالت لي السيدة المُجربة:

ثمرات التين قشرها

عناقيد العنب المسها بشفتيك أولا

القهوة خذها ساخنة

الزوابع دع وقارك جانبا وهي تلوب وتصيح

الزيارة اجعلها مرحة

الشمس اقترب منها بمقدار وابتعد بمقدار

القصيدة لا تنزعج من غموضها

اللوحة لا تدقق كثيرا في تفاصيلها

المسرحية لا تغادرها قبل النهاية

الكلمة لا تحاول استعادتها اذا ذهبت

المرأة اصنع معها ذلك كله]

هنلاقيه قال كل شيء بكلمات قليلة، وعامة ده مقياس لجودة الشاعر أو الأديب بشكل عام. انه يعبر عن كل اللي عايز يقوله باقل عدد ممكن من الكلمات. وده واضح جدا عند مريد البرغوثي. القصائد طول الوقت مختصرة. مفيش كلمة زيادة. مريد طول الوقت متمرد على القوانين وعلى القوالب. مش مهتم بكتابة قصيدة تشبه الشعر السائد. لكنه مهتم يكتب شعر يخصه وحده.

الكتاب نقدر نعتبره مدخل كويس لأي حد ميعرفش شعر مريد البرغوثي. وده ممكن يبقى مدخل كويس لقراءة شعره بعد كده.