The Definitive Guide to Living in the Capital , Cairo , Egypt

الفنان:

هو المسرحى والعبقرى والشاعر والغنائى الكبير “بديع خيرى” واحد من الناس اللى صنعوا النهضة المسرحية في النصف الأول من القرن العشرين، ولد في القاهرة 18 أغسطس 1893، وتوفى في 3 فبراير 1966، أغلب أغانيه غناها ولحنها العبقرى برضه “سيد درويش” يعنى حالة كبيرة من الجمال بين بديع ودرويش لازم تطلع أغانى يخلدها التاريخ والوجدان المصرى والعربى زى.. “قوم يا مصرى”.. “يا واش يا واش يا مرجيحة”، “صبح الصباح فتاح يا عليم”.

 

التصدى:

أنك تتصدى لعمل كبير زى أنك تجمع الأعمال الكاملة للفنان بديع، فده معناه أنك أخذت وقت وجهد كبير جدًا لحد ما قدرت تعمل ده.. وده برضه معناه أنك مخلص للفكرة قوى، وهنا لازم نتكلم عن د. نبيل بهجت الباحث فى التراث المسرحى، واخد الماجيستير عن مسرح بديع خيرى، وبـ يدرس الدراما فى جامعة حلوان.. وصاحب فرقة ومضة للأراجوز وخيال الظل.

 

بديع:

ولد في حى المغربلين واحد من أشهر الأحياء الشعبية بالقاهرة، ودخل الكُتاب وحفظ القرآن وكتب الزجل وهو لسه شاب.. وبدأ بكتابة المونولوج الأول وبعدين كتابة المسرحيات فكانت أول مسرحياته هي “أما حتة ورطة”،وتعرف على نجيب الريحاني عام 1918 وكان أول اشتراك مع بعض رواية “علي كيفك”. كتب بديع خيرى برضه أوبريتات منها أوبريت “العشرة الطيبة”. وسافر بديع ونجيب الريحاني إلى الشام، واكتشفوا بديعة مصابني. ومن الأفلام اللى كتبها بديع:”العزيمة”، “انتصار الشباب”، “ورد الغرام”، “لهاليبو”.

 

أغانيه:

أغانى بديع حالة خاصة قدرت تغوص فى المجتمع المصرى وتصنع حالة من الوعى عن طريق حرفيته الشديدة فى الكتابة، واختياره الكلمات بعناية ونسجها بجمال زى خالدته “قوم يا مصرى”:

قوم يا مصرى مصر دايمًا بتناديك

خد بنصرى نصرى دين واجب عليك

يوم ما سعدى راح هدر قدام عينيك

عد لى مجدى اللى ضيعته أيديك

شوف جدودك فى قبورهم ليل نهار

من جمودك كل عضمة بـ تستجار

صون أثارك ياللى دنست الأثار

دول فاتولك مجد وأنت فوت عار

جيبلي أى بلاد يا مصرى فى الجمال

تيجى زى بلادك اللى ترابها مال

نيلها جى السعد منه حلال بلال

كل حى يفوز برزقه عيشته عال

يوم مبارك تم لك فيه السعود

حب جارك قبل ما تحب تحب الوجود

إيه نصارى ومسلمين قال إيه ويهود

دى العبارة نسل واحد م الجدود

شوفوا هنا جمال العبارة وسهولة ومعالجة قضايا المجتمع، والصور الرائعة اللى رايحة فى سكة الوطن “بلادك اللى ترابها مال” والكشف عن أهمية الوحدة “إيه نصارى ومسلمين” والكلام عن أهمية المصرى ومعدنه الأصيل، كل ده كان فى أغنية واحدة.

 

الأعمال الكاملة:

الكتاب فيه كل أغانى بديع خيرى وكمان فيه دراسة عن حياته وأعماله، وفيه أسماء كل الملحنين والمغنيين اللى غنوا له وتاريخ الأغانى.. وفيه تقسيمة لأشعاره من قصائد سياسية، وقصائد اجتماعية، وقصائد بتوقيع مستعار ومناسبات وعاطفية والحاجات اللى كتبها فى مجلات والإعلانات والأزجال الأغانى المسرحية.. عاوزين تعرفوا بديع؟.. اقرأوا الأعمال الكاملة.