بعد 13 سنة من رحيله.. نجيب محفوظ رجع لنا بمجموعة قصصية جديدة
أخبار الأدب أولاد حارتنا ابن الحارة الحرافيش السهم العمر لعبة بيروت توحيده دار الساقي دعاء الشيخ قاف محمد شعير مطاردة نبوءة نملة نجيب محفوظ نصف الدنيا همس النجومOmar Abd-elmaqsoud
بعد 13 سنة على رحيل أمير الرواية العربية الأديب المصري “نجيب محفوظ” وبعد سنين طويلة من أولاد حارتنا والحرافيش وغيرهم، وبعد قصص عن الحارة والقهوة والشخصيات المهمشة، قررت دار الساقي في بيروت إنها تكشف عن مجموعة قصصية جديدة من روائع الأدب لـ “نجيب محفوظ” بتُنشر لأول مرة.
الحكاية من البداية كانت أشبه بحكايات الأفلام، لما “محمد شعير” الصحفي المصري في جريدة (أخبار الأدب) قابل “أم كلثوم” بنت نجيب محفوظ، باعتباره المسؤول عن ملف نجيب محفوظ في (أخبار الأدب) واديته “أم كلثوم” صندوق صغير فيه أوراق تخص محفوظ، وكان من ضمن الأوراق دي ملف كامل، فيه مجموعة قصة قصيرة، لكن ما اتُنشرتش في كتب قبل كده.
قرر “شعير” إنه ينشر الكنز ده، واللي سماه (نجيب محفوظ.. همس النجوم) وصدر عن “دار الساقي” في بيروت، واللي بيضم مجموعة من قصص نشرها محفوظ في تسعينيات القرن اللي فات في مجلة (نصف الدنيا) لكن ما أتجمعتش في أي كتاب، مضاف ليهم قصة جديدة من الكنز الأدبي اللي لقاه شعير.
ولإن فيه ناس كتير أوي شككت أو هتشكك في مصداقية وصحة القصص دي، قرر “شعير” إنه يحط صورة من أصول القصص دي بخط إيد “محفوظ”، ده غير إنه خلي عناوين الأعمال زي ما هي بدون تغيير، زي ما سماها “محفوظ”.
القصص عناوينها: (مطاردة) و(توحيدة) و(ابن الحارة) و(نبوءة نملة) و(أبونا عجوة) و(السهم) و(همس النجوم) و(العمر لعبة) و(دعاء الشيخ قاف) وغيرها من الأسماء اللي عبر ووصف بيها “محفوظ” عن البيئة الشعبية المصرية.
تقدروا تشتروا الكتاب من مكتبات القاهرة أو من اللينك ده.