The Definitive Guide to Living in the Capital , Cairo , Egypt

معانا رواية مستوحاة من أحداث واقعية، ودي أول جملة نظرك هـ يقع عليها أول ما تمسكها، بس على الرغم من كده عمر عودة بـ يؤكد بالرغم من أنها واقعية لكن برضه لسه فيها خيال، ومحافظة على أهم أسس الرواية وهي الخيال.. وخلوا الخيال يأخذنا بعيد، ونشوف عمر عامل إيه في خياله؟

هو بـ يقدم عشر درجات من الأسود.. لو قعدنا نعد فيها هـ نتعب، لكن عمر قدر يعمل درجات مختلفة منها أسماء أشخاص بـ يمثلوا أدوار محورية في الرواية وهما درجة من درجات السواد اللى عايشينه، ومنهم حاجات ثانية من الدرجات زي اللى بـ يسيب أثر في الحياة من فكر أو حاجة حلوة أو … "دم" ودى درجة مختلفة ومنها شياطين الإنس وهي درجة مهمة من درجات الأسود لأنهم كثير جدًا ومنتشرين حولنا في كل حتة، وعاجبنا هنا كلمته عن شياطين الإنس اللى بـ يقول فيها:

"في طريقك من الشك إلى الإيمان حتمًا ستصل إلى اليقين، ولكن ليس بالضرورة أن تكون نهاية الطريق إيمانًا، فيقينك بالكفر يظل احتمالًا واردًا".

الكاتب عمر عودة له أسلوبه في الكتابة اللى يخليك ما تسيبش الرواية غير لما تخلصها ومع كل جزء في الرواية حاجة بـ تشدك وتخليك عاوز تكمل، والمرة دي مش هـ يتكلم عمرو عودة عن طبيب جشع بـ ياكل لحم زوجته بعد قتلها ليمارس عليها سحر النكرومانسر، ومش هـ يتكلم عن شيطان وغد اسمه لوسيفر بـ يسعى لاحتلال الأرض ولا عن "أبراكسس" اللي حطم أحلامه بخيانته .. المرة دي رواية رعب رواية هـ تخوفك بأسلوبها الشيق وسردها السريع وشخصياتها الكثيرة، المرة دي مش رواية عن الجن والعفاريت وجواز البشر من الجن.

بلاغ.. رواية مستوحاة من الواقع لكشف فساد ما كناش نعرف عنه حاجة… هي رواية عن الرعب لما يكون حولك فيه واقع بـ يهزم شعب ويغتصب أبسط حقوقه في الحياة… رواية بـ تتكلم عن الثورة وما قبلها لكن من منطقة ثانية خالص.. منطقة بـ تتكلم عن النظام السابق، وبـ تدخل بك في عوالم أطفال الشوارع وبـ تخليك تشوف مافيا تجارة الأعضاء… وبـ تحاول تكشف أسرار تجارة الأعضاء في مصر اللي بـ تحتل مركز ثالث عالميًا في تجارة الأعضاء وأول في الشرق الأوسط واستغلال أطفال الشوارع، وفساد رجال الدولة لإنجاز أعمال غير مشروعة ومراكز الحقن المجهري وكمية الكوارث اللي بـ تحصل فيها، لو مستعد تتعرف على واقع مختلف ومرعب أكثر من خيال الروائيين، لو عاوز تفهم كان إيه بـ يحصل ولسه بـ يحصل لحد دلوقت، وبلاغ لكل المسؤولين عن كمية البشر اللى بـ يتم استغلالهم في الحياة.. اقرأ "بلاغ".