The Definitive Guide to Living in the Capital , Cairo , Egypt

النقيب طارق رمّاح بيتعرف على إيفيت بنت الملياردير المكسيكي كوزمان ديلابينا أثناء دراستها في مصر للحضارات القديمة، بيحبها وبيتجوزها رفض أبوها ورفض أهله. بيعيشوا حياة مستقرة وبيخلف منها بنت، الملياردير المكسيكي –تاجر المخدرات- بيخطف إيفيت وبنتها ماريان، ويتحفظ عليهم تحت حراسة مشددة في قصره الرهيب في المكسيك.

طارق بطل الرواية بيستعين بقاتل أمريكي مأجور علشان يرجع مراته وبنته، بينجح جاك السفاح المأجور في مهمته، وبيقتل كوزمان ديلابينا، ومن هنا بتساوم الحكومة الأمريكية من خلال سفيرها في القاهرة، طارق وإيفيت على ثروة الأب الملوثة، لتسوية القضية، لأن إيفيت متهمة في قضية قتل والدها، وبيوافق طارق –اللي أزمته الوحيدة في الدنيا هي الفلوس- وبيورث 30 مليون دولار أمريكي. ولحد هنا هنكتفي عشان منحرقش الأحداث.

عادة عالم البحث الجنائي وكواليس اللي بيحصل في وزارة الداخلية جذابة للقاريء، لوجود التشويق والإثارة، ولأن ده عالم بعيد جدًا عن القارئ العادي، ونجح الكاتب إنه يبرز التفاصيل الخفية في البحث الجنائي وممرات وزارة الداخلية، بحكم عمله كضابط شرطة.

 اختار عمر عويس الكتابة بعدة أشكال، ضمير المتكلم من جهة طارق وزوجته إيفيت، وهنلاقي الحديث موجه أغلب الوقت لشخص يُدعى [بافوميت] هنعرف مين هو ومين اللي بيكلمه قرب نهاية الرواية. وعامة الجزء ده كويس، وبالذات الحرص على إخفاء مين هو بافوميت ومين اللي بيكلمه، واللعبة في نهاية الرواية جيدة جدا.

التسلسل المنطقي للأحداث صحيح إلى حد كبير –ماعدا بعض الأخطاء البسيطة بالنسبة لرواية أولى للكاتب- لكن هنلاحظ مثلا إن قصة الحب، أو العلاقة بين طارق وبين إيفيت تمت بسرعة، ومعرفناش عنها أي تفاصيل، وهيظهر بعد كده إن القصة دي ما هي إلا (كوبري) علشان ندخل في خط الرواية الرئيسي.

جمل الحوار رغم إنها كانت طويلة إلا إنها كانت طبيعية في الغالب، وأدت وظيفتها في دفع الأحداث للأمام. تحليل الشخصيات وتفاصيلها جيد، وإن كان القارئ محتاج يقرب أكثر من إيفيت علشان يتعاطف معاها لأنها بطلة الرواية. وشخصية طارق هي الأفضل على الإطلاق، بما فيها من تقلبات وصراعات، وحتى وجهة نظره في الحياة مكتوبة كويس، وكان فيها لمحات وتشبيهات حلوة، زي مشهد الرشوة في بداية الرواية، ووصف السجن.

تأثير أحمد خالد توفيق واضح، وكمان تأثير السينما، ده مش عيب طبعًا، بالعكس أضاف للرواية جمال بصري، لكن محاولة التقرب من السينما أقحمت جُمَل وصف طويلة وكثيرة أثرت على الإيقاع، وطوّلت الرواية إلى حد ما.

بشكل عام الرواية جيدة كرواية أولى، وفيها وجهة نظر مختلفة وتعبيرات وتشبيهات جيدة جدًا، تقول إن الكاتب عنده كتير يقدر يقدمه لو اكتسب خبرة وقرأ أكثر.