The Definitive Guide to Living in the Capital , Cairo , Egypt

غادة كريم معروفة على السوشيال ميديا ككاتبة بتكتب للمرأة وعن المرأة، وإن قلمها مميز في الكتابة عن المشاعر الإنسانية والعاطفية.. في كتابها الأول علامات الحب السبعة اتكلمت عن الحب ومراحل الحب المختلفة أما في كتابها الجديد إللي بين إيدينا دلوقتي فغادة قررت تتكلم أكتر بالتفصيل الممل عن المشاعر والمحطات المختلفة إللي معظم الستات بيمروا بيها.

رغم أن الكتاب يبدو إنه موجه للسيدات كشريحة قراء مستهدفة إلى إن غادة بتؤكد في مقدمة كتابها إنها عايزة الرجال كمان يقرأوه: “رسائلي للرجال أيضًا، أليس أكثر سؤال يحير آدم ماذا تريد حواء؟ دائما يزعمون أنهم من كوكب ونحن من كوكب آخر لذلك قررت الهبوط من كوكبي والتحدث لآدم ليعرفني أكثر فيصبح التعامل بيننا أسهل”.

الكتاب عبارة عن 40 مقال أو زي ما غادة بتسميهم 40 رسالة اتمنت إنهم يوصلوها في يوم ما وتقرأهم قبل ما تخوص لوحدها كل التجارب وهي تايهة بتحارب لوحدهاعلى حد قولها على الغلاف الخلفي لكتابها. يحسب للمؤلفة إنها ناقشت تقريبا أهم المحطات إللي بتهتم وبتشغل بال أي ست زي الزواج والعلاقة مع الرجل، والحب والخيانة والحمل والولادة والأمومة والطلاق والعمل وصورة الجسد والاكتئاب. اختيار رقم 40 ليكون عدد رسائل الكتاب ما جاش من فراغ، غادة وضحت إنه رقم أربعين ده رقم مهم لإنه بيربط بين الحياة والموت: ” بعد ولادة الروح ينزف الرحم 40 يومًا وبعد أن تموت روح نعلن الحداد 40 يومًا أيضا”.

من مميزات الكتاب ده أسلوبه البسيط، الكتاب باللهجة العامية الفصيحة وهتحس وإنت بتقرأه وكأنك قاعد بتشرب كوباية شاي وبتدردش مع الكاتبة ومتفاعل معاها وهتحس إنه الكتاب بيسحبك وبيخلص بسلاسة لذلك فهو مناسب لكل أنواع القراء ولكن هو مناسب أكتر للسيدات وخصوصا المتزوجات أو المقبلات على الجواز يمكن البنات في سن المراهقة أو البنات السينجل مش هيلاقوا نفسهم فيه قوي.

رسائل حريمي جدًا كتاب سهل ممتنع بيخبّط بهدوء على  باب المشاعر المحبوسة جوه قلب وعقل كل إمرأة.