شعرية الجسد: تعلم تذوق الشعر ومعانيه المميزة

كتب

شعرية الجسد

- 28/11/2012

شعرية الجسد: تعلم تذوق الشعر ومعانيه المميزة

شوكت نبيل المصري
واقعية
من الآن
عربي عربي
16 جم
فروع الهيئة المصرية العامة للكتاب، وبائعي الكتب

تم التقييم بواسطة

Cairo 360

قيم

قيم الآن

شعرية الجسد: تعلم تذوق الشعر ومعانيه المميزة

لما بـ نسمع كلمة نقد بـ نحس أننا مقبلين على حاجة ثقيلة ورخمة قوي، ورغم أنه من سنين مش كثيرة قوي كانت الناس بـ تقرأ النقد قبل العمل الأدبي، لأن النقد في الحالة دي هو اللي بـ يقول للقارئ إذا كان العمل حلو ولا وحش، وهل المفروض يقرأه ولا بلاش من الكتاب كله على بعضه، طبعًا ده كان بـ يوفر وقت للقارئ لأنه بـ يكون عارف قيمة وقوة العمل، كمان كان فيه أهمية أكبر لوظيفة النقد وهي أنه بـ يقول للقارئ إزاي يستمتع بالعمل الأدبي، نقدر نقول أن النقد هو الخريطة اللي من خلالها القارئ يقدر يتذوق ويفهم العمل ويحط يده على مواطن القوة والتميز فيه.. طبعًا دلوقت كل ده ما عادش موجود، ورحيل نقاد كبار زي رجاء النقاش، وسامي خشبة، وطه حسين، خلى النقاد نفسهم يعترفوا أنه ما عادش حد بـ يقرأ نقد، وده له أسباب كثير يطول شرحها.

زي ما بـ يقول المثل الشهير: “أول الغيث قطرة” نقدر نقول أننا أخيرًا لاقينا كتاب نقدي مش ممل، وينطبق عليه السمات اللي تخلي القارئ العادي يقرأه ويستمتع به، الكتاب اسمه “شعرية الجسد.. دراسة نقدية في أعمال محمد عفيفي مطر الشعرية” للناقد شوكت نبيل المصري.
الكتاب ده مميز في رأينا لسببين: أولاً لأنه مكتوب بلغة وأسلوب ممتعين جدًا ما تخليش الواحد يمل من قراءته أبدًا والسبب الثاني أنه مكتوب بحب شديد نظرًا لصلة القرابة اللي ربطت بين الناقد شوكت المصري والشاعر الكبير محمد عفيفي مطر.
يمكن مش كثير مننا يعرفوا الشاعر ده، لكن نقدر نقول أنه واحد من عباقرة الشعر في مصر، وإذا كان صلاح جاهين وعبد الرحمن الأبنودي تميزوا في العامية، فمحمد عفيفي مطر تميز في الفصحى بشكل كبير، واللي هـ يقرأ للشاعر ده مش هـ يلاقى شعر جميل وبس، لأ وكمان هـ يستمتع برؤية فلسفية خاصة جدًا لكل حاجة في الدنيا لأنه كان معروف عن مطر أنه متصوف وقارئ نهم، نقدر نقول حكيم، قدر يتوصل قبل وفاته لوجهة نظر خاصة جدًا عن الكون والحياة والموت والجسد وكل التفاصيل اللي بـ تشغلنا في يومنا.
كتاب “شعرية الجسد” مش بـ ينقد تجربة محمد عفيفي مطر الشعرية بشكل عام، لكن بـ ينتقد جزء منها وهو “الجسد” اللي دارت عنه أبيات وقصائد، ويمكن الموضوع ده شائك شوية في مصر، رغم أن فيه دراسات كثير جدًا حول العالم عن الجسد، منها الفلسفي، ومنها الحركي، ومنها الأدبي، لكن في مصر صعب تلاقي دراسات عن هذا الجزء، لذلك إحنا شوفنا أن الكتاب ده بـ يعوض جزء مهم جدًا قلما بـ نشوف عنه كتاب.
لقد ولدت ميتًا
ونفخت في صورتي الفصول
وغسلت ملامحي بالجوع والحقول

فجئتكم لكي أقول

أو أموت لو ظللت صامتًا
ده جزء من قصيدة بعنوان “صوت الخيبة” للشاعر محمد عفيفي مطر، هي ومقاطع ثانية كثير موجودة في الكتاب ومعاها نقد، أشبه بالشرح التفصيلي، بصراحة الناقد بذل جهد كبير جدًا في أنه يقدم الكتاب ده، وحسب اللي كتبه في المقدمة فهو بقاله 6 سنين بـ يشتغل على الدراسة دي.
الناس اللي بـ تحب الشعر هـ تستمتع جدًا بالكتاب، واللي عاوزين يقرأوا كتاب مافيهوش أخطاء إملائية قاتلة، ولا لغوية، ومستوى الكتابة والوعي والحب فيه عالي يقدروا يقرأوا الكتاب ده، ويمكن العيب الوحيد اللي شوفناه من وجهة نظرنا أنه كتاب مطروح للقارئ العام، لكنه فيه مصطلحات كثير صعبة على القارئ العادي يفهمها، كان هـ يبقى أفضل كثير لو تبرع المؤلف بتفسيرها وشرحها باختصار في كل صفحة علشان دماغ القارئ ما تتوهش في النص.