The Definitive Guide to Living in the Capital , Cairo , Egypt

اللي شاف مننا أفلام
عن روايات لنجيب محفوظ زي: “ثرثرة فوق النيل”، و”زقاق المدق”،
و”الثلاثية”، ممكن ما يحبش نجيب محفوظ، خلينا نكون صرحاء، إحنا نفسنا
كنا مخنوقين من نجيب محفوظ والهالة اللي حوله قبل ما نقرأ له، لأن معظم الأفلام
اللي مأخوذة عن رواياته مش بـ تشد أوي وبعضها مكلكع ما كناش بـ نفهمه ولا بـ نحبه
وإحنا صغيرين، لكن بجد لما بدأنا نقرأ له اكتشفنا أن اللي بـ يكتبه حاجة، واللي بـ
يطلع على التليفزيون في أفلام له حاجة ثانية خالص، مالهاش علاقة بالروايات الأصلية
وهو نفسه كان بـ يقول بوضوح دي رؤية المخرج والسيناريست مش رؤيتي أنا، رؤيتي
الخاصة واضحة في الرواية نفسها.

المعلومة دي وغيرها كثير
بـ يؤكدها لنا نجيب محفوظ نفسه في كتاب بعنوان “في حضرة نجيب محفوظ” من
إعداد وتحضير الكاتب محمد سلماوي، الكتاب عبارة عن مقابلات متعددة وخطابات وآراء
لنجيب محفوظ، تقدر من خلالها تقرب من الإنسان المميز ده، ويمكن أكبر فائدة تأخذها
من الكتاب أنك هـ تحس أنه بـ يغير في أسلوب حياتك، لأن نجيب محفوظ نفسه كان له نمط
حياة وأسلوب مميز جدًا، ساعده أنه يكون أديب نوبل اللي العالم كله كان بـ يقرب منه
وبـ يحاول يتعلم منه، وهو نمط الحياة اللي خلاه قدر يوزان بين حياته الشخصية
والعامة، ويخلي حوله كم ضخم من الأصدقاء والمحبين والمعجبين، وبشهادة الجميع اللي
قرب من نجيب محفوظ ما قدرش يبعد عنه، والاستفادة هـ تبقى أكبر من الكتاب ده للناس
اللي بـ تحب تكتب لأنه بين السطور بـ يحكي ببساطة شديدة جدًا عن علاقته بالكتابة
وإزاي بدأ معاها، وبـ تمثل له إيه، فبـ يقول مثلاً عن الفكرة دي:

“الكتابة في حد
ذاتها فعل متفائل، كنت أجد سعادتي في الكتابة ذاتها وليس فيما يمكن أن تأتي به،
لذلك ظللت أكتب بلا مقابل لسنوات”.

الكتاب فيه مجهود
كويس، وميزته أنه صدر في آخر سنة 2011 اللي كانت معروفة على أنها مخصصة للاحتفال
بمئوية نجيب محفوظ، يعني لو كان عاش كان هـ يتم 100 سنة، الكتاب عبارة عن أربعة
فصول، ميزته أن اللي كاتبه كان مقرب جدًا من نجيب محفوظ، وكان ملقب أنه وزير
خارجيته، كان بـ يقابله كل يوم سبت علشان يعمل معاه حوار، يُنشر في جريدة الأهرام
بدل  مقالته اللي ما بقاش قادر يكتبها في
سنينه الأخيرة، ومن خلال لقاء كل يوم سبت ولأن سلماوي بـ يتقن اللغتين الفرنسية
والإنجليزية، فكان معه محفوظ في كل لقاءاته مع الأجانب، ولأنه ذكي فهو سجل كل
اللقاءات دي واحتفظ بكل الوثائق والأوراق والتسجيلات اللي وصلت لـ 500 ساعة لعملاق
الرواية العربية الراحل نجيب محفوظ، فرغها وقدمها في الكتاب ده من خلال 400 صفحة،
ولو صح التعبير فهم ثلاثة كتب في كتاب واحد، الباب الأول بـ يقدم  تفاصيل اللقاءات التي تمت بين محفوظ وبعض الشخصيات
المهمة عالميًا وعربيًا من الأدباء ورجال السياسة والشخصيات العامة زي الأديب
العالمي باولو كويللو، وأديبة جنوب أفريقيا الفائزة بجائزة نوبل نادين جورديمر،
والمسرحي الأمريكي الشهير آرثر ميللر وغيرهم، بالإضافة إلى رئيس وزراء أسبانيا
وأحمد زويل ومحمد حسنين هيكل وغيرهم من اللي راحوا بنفسهم علشان يزوروه في المكان
اللي تعود يستقبل فيه زواره، بيته اللي بـ يطل على النيل في العجوزة، وجمعهم كلهم
رغبة واحدة أنهم يكونوا في حضرة نجيب محفوظ.

الكتاب فيه كمان تصريحات وحوارات ومقابلات محفوظ وبعض الصور النادرة له مع بعض
الحاصلين على جائزة نوبل زي نادين جورديمر وأحمد زويل وصورة من حفل تسلمه الدكتوراة
الفخرية من جامعة القاهرة اللي تخرج فيها من قسم الفلسفة بكلية الآداب.