The Definitive Guide to Living in the Capital , Cairo , Egypt

كلنا عرفنا الشعر الحلمنتيشي
مع عمرو قطامش في البرنامج الشهير “Arabs Got talent”، لكن اللي ما حدش
يعرفه أن رائد الشعر الحلمنتيشي في مصر دلوقتي وخال عمرو قطامش هو ياسر قطامش،
كاتب ساخر وباحث ومهندس وصحفي، رجل متعدد المواهب، له كتب كثير جدًا في الشعر
الحلمنتيشي، والمقامات الحلمنتيشية، والشعر والمقالات الساخرة.

الشعر الحلمنتيشي للي ما يعرفهوش
نوع من أنواع الشعر بـ يخلط ما بين الفصحى والعامية ومش بـ يهتم بقواعد اللغة، وبـ
يميل للفكاهة.

المهندس ياسر قطامش أصدر
كتاب من أيام اسمه «مذكرات ثائر ساخر»، الكتاب دمه خفيف جدًا بـ يعرفنا عن قرب على
شخصية المهندس ياسر قطامش اللي التزم في أيام حظر التجوال بأنه ما ينزلش من البيت
أبدًا رغم أن ما حدش في مصر تقريبًا كان ملتزم بالحظر ده، حتى ولو في نطاق المنطقة
اللي ساكن فيها، وتقريبًا ما حدش حس به، لكن المهندس ياسر قطامش التزم به جدًا،
وبـ يعترف أنه ما شاركش في اللجان الشعبية اللي اتعملت حول البيوت، لأنه ما عندهوش
شومة، وما نزلش من البيت وفي الفترة دي بدأ يراجع أرشيف كتاباته، وشغله قبل
الثورة، ومع متابعته للأحداث بدأ يكتب أكثر وأكثر وفي الآخر جمع مقالاته وأعماله
اللي تنبأ فيها بالثورة، واللي كتبها بعدها وبـ ينتقد فيها النظام والفساد، وبكده
شارك في الثورة مش بشومة، أو مظاهرة، أو أي شكل من الأشكال اللي كلنا عارفينها،
شارك بطريقته وبسلاحه، سلاح السخرية، اللي واجه به كل الناس الفاسدين في النظام
السابق، وكان شعاره دائمًا “لو ما قدرتش تواجه خصمك وتغلبه، اضحك وضحك كل
الناس عليه وعلى خيبته”.

الكتاب دمه خفيف، لو زهقان
وحاسس أنك محتاج تبتسم اقرأه، في الفصل الأول وعنوانه “مقامات حلمنتيشي بطعم
الثورة” هـ تلاقيه بـ يقدم لك الأسباب اللي أدت لقيام الثورة، وبـ يظهر لك من
خلال الصفحات فساد النظام السابق بطريقة ساخرة، كل ده في صورة مقامات حلمنتيشية
دمها خفيف، منها مقامة اسمها “خبر مهم من القرافة دوت كوم”، بـ يقول
فيها: “أذل الله أصحاب الجلالة، وقد ساقوا الرذالة والهبالة، وكم قلنا ونبهنا
كثيرًا، فلم تغن النصيحة والمقالة، ومن يغتر في دنياه يندم، ويصبح كالعبيط
“أبو ريالة”.

في الفصل الثاني من كتابه هـ
نلاقي الكاتب بـ يعرض مقالات ومقامات تم عرض من خلالها قبل الثورة لتزوير
الانتخابات، وفساد رئيس الوزراء أحمد نظيف، والأوبئة اللي كانت عمالة تيجي وراء
بعضها، زي أنفلونزا الطيور والخنازير.