The Definitive Guide to Living in the Capital , Cairo , Egypt

ساعات بـ يبقى نفسنا
نقرأ كتاب معين شكله بـ يغرينا أننا نمسكه ونشوف بـ يتكلم عن إيه، لكن حجمه أو
عنوانه بـ يصدنا أو حتى مضمونه اللي تلاقيه بـ يتكلم عن جوانب أكاديمية صعبة تخليك
ما تقدرش تكمله رغم أنك ممكن يكون نفسك تعرف عنه أكثر، لكن للأسف النوعية دي من
الكتب مش بـ تناسب إلا المتخصصين فقط.

كتاب “موجز
تاريخ علم الاقتصاد” بـ يحقق المعادلة الصعبة، كتاب ضخم شكله ثري، يغريك أنك
تمسكه وتتصفحه، وفي الوقت نفسه محتواه مش أكاديمي صعب، ممكن تقرأه، ولما هـ تمشي
فيه شوية هـ تلاقيه ممتع، لأن المؤلف كتبه بطريقة أشبه بالرواية، فلما ييجي يحكي لك
عن عالم اقتصاد عمل مدرسة معينة في الاقتصاد، ما يقولش لك الموضوع كده على طول، لأ،
لازم يحكي لك عن صفات وشكل العالم ده، طوله شعره، لبسه، وتفاصيل حياته، بل وأدق
أسراره، فـ يخليك ترتبط بالعالم اللي بـ تقرأ عنه، وتحس أنك عايش في العصر بتاعه،
وفي نفس الوقت يخليك تستوعب الفكرة والجديد اللي قدمه في علم الاقتصاد، فـ يحكي لك
مثلاً عن عالم الاقتصاد اللي جاء له انهيار عصبي من كثر العلم اللي تعلمه، وإزاي
كارل ماركس الشهير كانت هدومه قذرة دائمًا لدرجة أنك مع توالي الصفحات هـ تحس أن
كل علماء الاقتصاد مختلين عقليًا ومش مضبوطين!

الكتاب ده كان من
الكتب الأكثر مبيعًا في الولايات المتحدة الأمريكية، مؤلفه قدر يحقق معادلة صعبة
بين جدية الموضوع، وبين جاذبية العرض وكمان العنوان اللي بـ يقول فيه “موجز
تاريخ علم الاقتصاد: مقاربات جمالية لدراسة العلم الكئيب”، فـ يحسسك أنه هـ يعطيك
معلومات كاملة مكملة عن الاقتصاد من أول ما خُلقت الكلمة لحد دلوقتي، لكن في
الحقيقة هو بس بـ يركز على أهم المدارس الاقتصادية خاصة الكلاسيكية، وبــ يحاول
يسأل سؤال فلسفي شوية هو: يا ترى مين اللي بـ يؤثر على مين؟ الأحداث العامة بـ توجه
دفة الاقتصاد ولا العكس؟! وهل الظروف هي اللي بـ تخلق الإنسان ولا الإنسان هو اللي
بـ يخلق الظروف؟

استخدم الكاتب كل
التوابل اللي تخلي أى قارئ ملول مالوش في المجال ده أنه يكمله، الكتاب بـ يحاول
يقول للقارئ أن علم الاقتصاد ومبادئه بدأت في الغرب مع عالم اسمه آدم سميث، لكن
طبعًا ده ضد الحقيقة وانحياز شديد لأن الواقع بـ يقول غير كده، وعلم الاقتصاد بدأ
في الشرق في كتابات كثير من العلماء العرب زي ابن خلدون، الكتاب جميل جدًا وممتع
وثري، ومش بس علشان المتخصصين في علم الاقتصاد والدارسين فيه، ممكن تقرأه وتفهم
منه قدر كبير ويفيدك.