The Definitive Guide to Living in the Capital , Cairo , Egypt

شاعر متميز بيكتب من قلبه، روحه عالقة في السما السابعة، بيحب ياسمين، وخلاها أسطورة في عالم الشعر..

الشاعر أكرم حسن، كتب ديوانه الأول بعد فترة طويلة من الكتابة والجهد في المنتديات الثقافية المختلفة، قرر أخيرًا إنه يكتب، ويخلي تجربته توصل للناس، تجربة من العيار التقيل، مع إنه بيكتب عن الحب، لكنها كتابة مختلفة وتعالوا مع بعض نشوف..

ياسمين:

مش مجرد اسم حطه أكرم علشان هي حبيبته، هو اسم له دلالته بيوديك ناحية العشق الصافي، والحب الطفولي البرئ، ياسمين الزهر الجميل، الشايل كل فكرة البياض والإنسانية والحب والود، ياسمين لغة الورد اللي بتغازل القلوب، ياسمين اختيار موفق جدًا، سواء كان اسم حبيبته فعلًا، أو اختيار موفق منه، لتحويله لأسطورة جديدة في عالم الحب بيقول:

بحبك أقوى م الأحاسيس

ووجد جديد

بيضحك لسه في الكواليس

وواحدة بعد ست سنين

قالولها جنين

وفرحة بنت في التلاتين

وجالها عريس

بحبك طفل تاه ف زحام

وبعد ايام لمح أمه

بحبك قد كل دموع

وفرحه وهي بتضمه

الاستدعاء:

الشاعر بيستدعي كل صورة حلوة ممكن تعبر عن حالة الفرح والحزن والقرب والبعد والهججر واللقا والاشتياق، علشان يحكي قصته مع ياسمين بيقول:

ياسمين

هنا كان فيهيا دوب إنسان.. وبني آدمين

بواقي نزاربتكتب شعر يوم حطين

فؤاد حداد..

قال النص قبل جاهين

وكأنه بيستدعي أرواح الشعرا الكبار اللي كتبوا في الحب، علشان يمدوه بقوة الكتابة، ويكتب عنها، ويقول كل الكلام الجميل والصورة الهادية المتركبة من لحم ودم، الصورة عند أكرم بتنطق من فيض المشاعر والأحاسيس اللي طالعة من جواه.

البناء:

البناء واضح إنه متماسك جدًا من أول الغلاف اللي اختار ليه شكل وردة الياسمين، وتنسيق النصوص جوه الديوان، اللي خلاهم عبارة عن نص واحد طويل بيحكي حدوتة أكرم مع ياسمين، ومش أي حدوتة، هي حكاية بتحكي قصة عاشق مع حبيبته، وبيدخل فيها تفاصيل الحياة واستدعاء موتيفات من الموروث، ومتابعة للواقع واللي بيحصل فيها، والثورة واللي حصل فيها، كل ده في بنا واحد متصل ورا بعضه، فكأنك بتسمع حكاية طويلة كلها مسمعة مع بعضها، وبتوصل في النهاية لخاتمة جديدة، مش هانحرقها.

بلاد دينجا:

بلاد دينجا هي حكاية جوه الحكاية، بيحكي عن بلاد في عالم  أسطوري مختلف منعرفش عنه حاجة، لكن لما نقرا عنه هانفهم إنه عالم موازي لينا فيه كل الناس مش زينا، وبرضه زينا في نفس الوقت في تركيبة جديدة ورايقة بيقول:

ياسمين

كان ياما كان

ف توتة وبيت وضلاية

وقصة حاسسها جوايا

بلاد واسعة على الآخر

ونهر طويل ماله نهاية

بلاد دينجا

أميرها كان ديمقراطي.

الديوان حمال لمعاني كتير مختلفة وجديدة، وبتتماس مع واقعنا، ومع الأسطورة، ومع التراث ومع الحب، يعني نقدر نقول توليفة صعب تلاقيها في مكان تاني.. اقروه وانبسطوا.