The Definitive Guide to Living in the Capital , Cairo , Egypt

مزيكا
بناديك تعالى

عمرو دياب: بناديك تعالى

  • عمرو دياب
  • شرقيموسيقى الكترونية ورقص
  • من الآن
  • روتانا
  • جميع الأماكن
تم التقييم بواسطة
Shahista Sherif
قيم
قيم الآن
عمرو دياب: بناديك تعالى

كالعادة
وزي كل ألبومات عمرو دياب، الناس كانت مستنية ألبوم “بناديك تعالى”
بفارغ الصبر، لكن للأسف (زي ما حصل برضه مع كذا ألبوم قبل كده!) الأغاني كلها اتسربت
وتم تناقلها على الإنترنت قبل نزول الألبوم رسميًا بليلة واحدة فقط. ورغم انتشارها
على الإنترنت إلا أن برضه محبي الفنان عمرو دياب كانوا واقفين طوابير أمام محلات
شرائط الكاسيت منتظرين وصول الألبوم، لدرجة أن أول ما الإصدار الأول نزل مافيش
ساعات وكان خلصان وبعتوا يجيبوا إصدار ثاني.

الألبوم
مكون من 12 أغنية كلهم من توزيع “عادل حقي”، وزي ما مكتوب على غلاف السي
دي: الرؤية الفنية للألبوم وجميع أصوات الكورال لعمرو دياب. أول حاجة حسينا بها
لمّا سمعنا الألبوم أنه معمول للأفراح، ده لأن الأغلبية المسيطرة على الأغاني هي
الدلع والرومانسية والرقص. أول أغنية اللي بـ تحمل اسم الألبوم “بناديك
تعالى” من كلمات تامر حسين، ولو أنها تعتبر مافيهاش كلام أصلاً. الأغنية
من تلحين عمرو دياب، وبـ يمزج فيها العود مع المزيكا الهاوس بطريقة لطيفة، لكن
الكلام قليل جدًا. ثاني أغنية هي “هللا هللا” وهي من تلحين عمرو
مصطفى وكلماتها اللي كتبها تامر حسين بـ تحكي عن حبيبته اللي غيرت دنيته وخلتها
أحلى.

ثالث
أغنية هي أغنية “مقدرش أنا”، وإحنا شايفينها من أهم علامات
الألبوم ده. كلمات الأغنية لتامر حسين وألحانها لعمرو طنطاوي، واللحن فيه إيقاع
شرقي جدًا بـ يفكرنا بأغاني عمرو القديمة. إنما الشىء الغريب كان دخلة الأغنية
اللي كانت شبيهة بدرجة كبيرة جدًا لدخلة أغنية “آه من الفراق” من ألبوم
عمرو دياب اللي فات “وياه”. لكن برضه الأغنية دي من أحلى الأغاني في
الألبوم وهـ تولع أي فرح.

رابع
أغنية هي “ألومك ليه” ما بـ نشوفش من نوعها كثير، لحنها وكلامها
فوق الرائع. ما اتفاجئناش أبدًا لمّا عرفنا أنها من تلحين عمرو دياب نفسه، وكلمات
أيمن بهجت قمر. الأغنية بـ تحكي عن اثنين بـ يسيبوا بعض، وبـ يعترف أنها غلطتهم
هما الاثنين ومش غلطة واحد فيهم بس! خامس أغنية “معاك برتاح” من
كلمات أمير طعيمة، وتلحين مشترك ما بين عمرو دياب وأحمد صلاح حسني، ودي هـ تعجب جدًا
محبي الموسيقى الهاوس وكلماتها بـ تقول: “أنا معاك بـ ارتاح، بـ انسى كل اللي
عدى وراح، وألقى جنبك حياتي براح، وألقى روحي هنا”.

سادس
أغنية هي “يا ريت سنك”، من تلحين عمرو دياب وكلمات بهاء الدين
محمد. إحنا مُعتبرينها أغنية خفيفة، مش وحشة لكن ما حسيناش بالانبهار لمّا
سمعناها. الأغنية بـ توصف حبيبته أنها كاملة لكن سنها صغير، وبـ يقول لها يا ريت
سنك يزيد سنتين من غير ما أي حاجة ثانية فيكي تتغير. سابع أغنية “مالي
عينيا” هي أغنية أفراح جدًا، مع كلمات تامر حسين اللي كلها دلع، وألحان
عمرو دياب المستوحاة من فلكلور ليبي (زي ما مكتوب على السي دي) الأغنية بـ تخلي
الواحد عايز يشغلها ويديها رقص، وإحنا بـ نقول عليها تنفع للأفراح لأنها كمان بـ
تقول “حبيبي مالي عينيا وبلاقي راحتي معاه، الدنيا من حواليا اتغيرت
بلُقاه”.

ثامن
أغنية “هي حياتي” من كلمات مجدي النجار وألحان عمرو دياب، وبـ
تقول “هي حياتي وروحي هي، أجمل حاجة في عمري دائمًا هي”. تاسع أغنية “يوم
ما تقابلنا” من ألحان عمرو دياب برضه وكلمات تامر حسين، ودي أغنية هادئة
ورومانسية وإحساس عمرو وهو بـ يغنيها كان عالي جدًا، كلماتها بـ تقول: “يوم
ما تقابلنا اليوم ده هـ افضل مش ناسيه، أنا اتكتبلي أحلى قصة حب فيه، أول مشاعر
حلوة قلبي حسها، ولهفتي لميعاد أقابلك بعدها”. وإحنا شايفين أنها هـ تبقى
أغنية الرقصة الأولى أو الثانية في الأفراح.

الأغنية
العاشرة “أغلى من عمري” من ألحان عمرو دياب وعادل حقي مع بعض، وكلمات مجدي النجار
بـ تقول: “شفت كثير حوليا ما شفتش زي عينيك، كل ما تيجي في عينيا بـ أقرب
أكثر لك، تبعد عني أنا غصب عني بـ أفكر فيك، ترجع ليا حبيبي بـ أغمض عيني
عليك”.

آخر
أغنيتين هم: “عارف حبيبي” و”تجربة وعدت”.
الأغنيتين من تلحين عمرو دياب، لكن دول كانوا أكثر أغنيتين ما عجبوناش في الألبوم،
يمكن علشان سمعناهم من كام سنة في حفلات Live لعمرو دياب، وكان بـ يغنيهم بطريقة وألحان مختلفة تمامًا. خاصة
أغنية “تجربة وعدت” لأن كلامها مش كثير، والكورس الأساسي فيها اللي بـ
يقول “تجربة وعدت من ضمن تجاربي ورجوعها ما بقاش بالساهل، تجربة وعدت وأنا
قُلت وبـ اتكلم عربي، بالعربي محدش يستاهل”، هو اللي بـ يُعاد كثير جدًا
بطريقة مستفزة زيادة عن اللزوم، والكوبليهين اللي في وسط الأغنية قليلين جدًا ومش
بـ يقولهم غير مرة واحدة فقط.

لو
عاوز الألبوم يوصل لك لغاية البيت ممكن تشتريه من على الموقع الرسمي الخاص بعمرو دياب، افتح الرابط واختار Egypt-COD لو أنت في مصر علشان
يوصل لك لحد البيت وتدفع لمّا تستلمه.

عجبك ؟ جرب

 ألبوم "وياه" لعمرو دياب، ألبوم "حاجة مش طبيعية" لمحمد حماقي.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح