The Definitive Guide to Living in the Capital , Cairo , Egypt

مزيكا
روبابيكيا

وسط البلد: روبابيكيا

  • وسط البلد
  • ريجيمنوعات...
  • من الآن
  • مستقل
  • موقع الفريق على الإنترنت http://www.wustelbaladband.com ومواقع أخرى
تم التقييم بواسطة
Bassem Abou Arab
قيم
قيم الآن
وسط البلد: روبابيكيا

وأخيراً تم إصدار الألبوم الثاني لفريق وسط البلد بعد طول إنتظار، الألبوم
اسمه «روبابيكيا» و فيه 10 اغنيات.

الألبوم اتعمله حفل إصدار مخصوص فى حديقة الأزهر في ديسمبر 2010 ، ولعب فى
الحفلة دى فرق كتيرة زي كايروكي وسيتي باند وقص و لزق وعشرة غربي على شرف وسط
البلد، ومن اللطيف أن وسط البلد قرروا طرح الألبوم للجمهور مجانا من خلال الموقع
بتاعهم و دة إحتفالا بنجاح الثورة!

«روبابيكيا» هي أول اغنية فى الألبوم بمشاركة فرقة Y-Crew ،
ألحان وتوزيعات مميزة اللي اتعودنا عليها من وسط البلد مع ايقاع اليكتروني ماشي مع
الجزء الراب فى الأغنية و كلمات بـ تنتقد أفكار السلبية فى المجتمع  وبـ تشبهها  بالروبابيكيا اللي جار عليها الزمن!

بعد كدة أغنية «كل يوم»، رغم ان كلامها بـ يوصف حالة حزينة وكئيبة لشخص أيامه
شبه بعضها الا انها عجبت ناس كتير وأثرت فيهم بكلامها الواقعي الملموس فى الحياة
اليومية وطبعا آداء هاني عادل الرائع على الموسيقى والايقاعات اللاتيني.

وعلى طريقة الفلكلور الصعيدي بـ تيجي اغنية «على حسب ودادك»، طبعا كتير من
الناس بـ تميل للون ده اللي فيه غزل للحبيبة على نغمات المزمار وإيقاع المقسوم
خصوصا لو كانت  بتوزيعات فيها جيتار!

و بعد الفلكلور الصعيدي بـ نطير لمكان بعيد فى أغنية «سؤال واحد» اللي
تعتبر روك زي بتاع الثمانينيات (برضه مع نغمات خفيفة لعود أحمد عمران عشان ماننساش
ان دول وسط البلد)، كلمات الأغنية حالة حيرة وأسئلة كتير يمكن كئيبة شوية لكن فى
النهاية بـ توصل للمستمع  خصوصاً لو كان من
محبين الروك و ده عشان التوزيع الرائع للأغنية.

بعدها بـ نرجع تانى لوسط البلد فى أغنية «من جوة القاهرة»، شرقي خالصة
بالتوزيع و المقامات و إحساس أدهم فى الغناء، كلمات منتصر حجازي في الأغنية فلسفية
شوية وغير مباشرة بس نجح انه يأثر فى جمهور وسط البلد اللي اتعود عليه من كذا سنة.

بعدها بـ تيجي باللهجة الصحراوية أغنية «علي» بموسيقى الراي والإيقاع
الساخن بعد كذا اغنية حزية، والملفت فيها طريقة هاني عادل واللهجة اللي بـ يغني
بيها.

«يا جزيرة الاحلام» أغنية بلون جديد على المستمع من ناحية المزيكا وتوزيعاتها
اللي شبه موسيقى الجناوة
Gnawa الموجودة
فى بلاد المغرب العربي، برضه بنفس اللهجة الصحراوية الا انها تتفهم، الاغنية ككل
موود ظريف وغير معتاد للمستمع العادي واللي ساعد فى ده توزيعها بحرفية عالية.

«عانقيني» هي أغنية تألق فيها الشاعر ميدو زهير اللي كتب كلماتها بأسلوب
غير التقليدي بالمرة و بمفردات غير متوقعة! الأغنية  ممكن تتصنف على انها “بلوز شرقي”،
الأصوات الخلفية
Back Vocals فيها
ظريف، وصولو الجيتار جميل، الأغنية فى الآخر بـ تقلب ريجي ستايل بس مش مشكلة!

أما عن أقوى اغنية فى الألبوم هي «الجارية والسلطان» فـ الكلام ممكن يطول
وده عشان كذا حاجة؛ الكلمات اللي كتبها وليد عبد المنعم  ببراعة و بـ تحكي قصة فى زمن قديم عن السلطان
اللي وقع فى حب جارية من أول نظرة و إشتراها وفي الآخر بـ يحصل اللي ماكانش متوقع!
واللحن مع الإيقاع والتوزيع خلاها أقرب للإسكتشات اللي بـ تحكي قصة، توليفة جامدة
نجحوا وسط البلد فى عملها وكانت النتيجة انها عجبت الجماهير جداً في حفلة إصدار
الألبوم اللي قلنا عليها.

آخر أغنية فى الألبوم هي «لي حبيب» ألحان أحمد عمران، مزيج بين العربية
الفصحى والإنجليزي، الأغنية بإيقاع وطابع أفريقي مميز.

وسط البلد سعوا لتعريف المستمع  بأنواع مختلفة من الموسيقى من خلالهم إعتمادا
منهم على ان المسمتع خلاص وثق فيهم، وساعد فى ده توزيعات معمولة بعناية تأدي
الغرض التجاري من غير ما تداري شخصية الفرقة.

يمكن بس يتاخد عليهم ان جرعة الأغاني الحزينة كانت زايدة شوية عكس طابع
حفلاتهم اللي بـ تكون ساخنة ومليانة بهجة وتنطيط.

عجبك ؟ جرب

بلاك تيما، سلالم، هاني عادل، عشرة غربي، كايروكي

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح