The Definitive Guide to Living in the Capital , Cairo , Egypt

سيتي ستارز لا يخلو من أماكن
الأكل والراحة، أكيد بعد يوم طويل من المشي والتسوق هـ تكون محتاج تقعد في مكان
تستريح فيه ويا سلام لو المكان ده مفتوح وفيه هواء وهاديء. فيه مطعمين في سيتي
ستارز موجودين أعلى المول وفي مكان مفتوح هما «كاسبر أند جامبينيز – Casper & Gambini’s» و«أروما لاونج – Aroma Lounge» والاثنين بـ يطلوا وبـ يجاوروا
الأهرامات المشهورة على سطح سيتي ستارز، والمكان الثاني ده كان هدفنا يوم ما رحنا.

“أروما لاونج” مطعم واخد
ركن في الدور الثالث فى المرحلة الأولى، أول ما تدخل هـ تلاقي قعدة بالداخل فيها
كنب كثير وترابيزات منخفضة وتحس أنها مناسبة أكثر أنها تكون كافيه تأخذ فيه قهوتك
أو الأسبريسو، لكن اللي كان جاذبنا أكثر أننا نقعد فيه المكان اللي بره واللي بـ
يفصله عن المكان اللي جوه كام سلمة في مستوى أعلى.

المكان اللي بره أوسع بكثير، فيه
كذا قعدة، ترابيزات وكراسي عالية وفيه زيها منخفضة، وفيه كمان قعدات كنب وفوقك
حاجة زي الخيمة، وقعدة فى المنتصف ترابيزات داخل مربع كبير خشب وله ستائر مشمع
شفاف، وحول المربع ده فيه قعدات ثانية، اختارنا نقعد وراء المربع الشفاف ده لأنه
أهدأ المناطق وكمان بـ يطل على بيسين فندق “أنتركونيننتال سيتي ستارز”
الرائع بمساحاته الخضراء الواسعة.

كنا هـ نقع من الجوع، فكرنا نفتح
نِفسنا (رغم أنها كانت مفتوحة أصلاً) بالمقبلات، طلبنا  Potato
Skins أو جاكيت البطاطس زي ما بـ يسموها (25 جنيه) وهي عبارة
عن رقائق بطاطس محشوة بنوعين من الجبنة واللحم البقري المدخن، ومعاها كريمة جبنة
وسلطة البيكو المكسيكية الحارة. كانت أكثر من رائعة.. حلوة جدًا، رغم أنهم كانوا
أربع قطع لكن زعلنا لما خلصوا من حلاوتهم.

ندخل بقى على الثقيل.. الأطباق الرئيسية، طلبنا طبقين: تشيكن
كوردون بلو (60 جنيه) وهو عبارة عن فيليه الدجاج محشو بخلطة الجبن والريحان واللحم
البقري المدخن بـ يقدم معاها بطاطس مهروسة وخضار سوتيه. وكمان أورينتال ميكس جريل
(110 جنيه) وهو تشكيلة من مشويات الكباب، الريش، الكفتة والشيش طاووق بجانب الأرز
بالخلطة (خلطة خضروات مش مكسرات) جاءت لنا على شواية نحاس بستاند معاها عيش أنطاكى
تركي.

الميكس جريل كان عالمي، المشويات
مستوية كويس قوي والطعم والرائحة تحفة، الأرز بالخضار كان كويس والعيش التركي ده
كان جواه حاجة زي صلصة ببصل بس كان كويس، أما الكوردون بلو كان عادي، الفراخ بس
معمولة بطريقة مبتكرة تحس أنها مضغوطة وجواها المحتويات لكن قليلة والطعم حلو لكن
فيه اللي أفضل منه، والخضار حلو بس ممكن يستوي كمان لكن البطاطس المهروسة كانت جامدة.

الطلب نزل معاه زجاجة مياه صغيرة
(7 جنيه)، وبعد شوية طلبنا من الجرسون يجيب لنا منيو المشروبات، المكان اللي كنا
فيه كان ممره ضيق شوية وكان كل شوية الجرسونات يعدوا من عندنا لأن المطبخ في الخلف
وكانت حاجة تضايق، وكمان لأن مكان جلوسنا كان بعيد ومتطرَف شوية ما كانش الجرسونات
مهتمين به لدرجة أننا طلبنا منيو الحلويات مرتين وأبدينا استياءنا أن مافيش حد
مهتم، وأخيرًا.. جاءت واختارنا مشروب أبل آنجيل (28 جنيه) وهو عبارة عن آيس كريم
مضروب مع عصير تفاح ومرشوش عليه قرفة وفيه قطع تفاح من فوق، وكمان طلبنا موخيتو (25
جنيه) وهو المشروب الكوبي الشهير وعليه صودا وفروع نعناع، الأخير كان طعمه غريب
وثقيل علينا شوية لكن بعد شوية أول ما بدأنا نتعود على طعمه خلص! كان عامل زي
السفن آب بالنعناع بس لاذع بزيادة، وبرضه الآبل أنجيل كان طعمه ثقيل شوية وعيب
الاثنين أن طعم القرفة والنعناع كان بزيادة علشان كده ما كناش متقبلينه في الأول!

ختمنا القعدة بالتحلية.. شريحة
بلاك فورست (29 جنيه) وعليها إضافة بولة آيس كريم فانيليا (8 جنيه) وداخلها كريز
ممزوج في العجينة وكانت ناعمة وسكرها مضبوط والكيك طرية والكريز اللي جوه أعطاها مزازة،
لكن الآيس كريم ما كانش طعمه مميز.

أضيف على الطلب بتاعنا 12% خدمة
و10% ضريبة (67.75 جنيه) وده كثير شوية، الإضاءة في المكان كانت حلوة بالليل، لكن
المشكلة الوحيدة أنها خافتة قوي لدرجة ما كناش عارفين نقرأ المنيو بتاعة المشروبات
والتحلية وكنا بـ ننور بكشاف الموبايل بتاعنا! وفيه شيشة هناك لكن إحنا مالناش
فيها.

المكان لطيف وأكله حلو جدًا
والمنظر من فوق جامد يستحق الزيارة، لكن الجرسونات محتاجين يركزوا شوية ويتعاملوا باحترافية
أكثر.