The Definitive Guide to Living in the Capital , Cairo , Egypt

مش كتيرة هي الأماكن المريحة اللي تقدر تاكل فيها وأنت حاسس بسعادة وبهجة، والحقيقة إن أسماك الشامي نجح يخلينا نحس بحالة كبيرة من السعادة والراحة النفسية.

كنا ماشيين بالصدفة في وسط البلد، وبالتحديد في باب اللوق، لقينا مكان صغير وديكوراته مبهرة، ألوان مبهجة، كراسي من الخشب، صور على الحوائط لأهم نجوم زمن الفن الجميل زي سعاد حسني، أنور وجدي، فريد شوقي، أم كلثوم، وغيرهم من نجومنا اللي حياتنا بأعمالهم أجمل.

قررنا ندخل المكان، الموظف استقبلنا بابتسامة جميلة، لوهلة حسينا إننا داخلين بيت حد نعرفه مش مجرد مطعم بيقدم أكل، في وشنا على طول لاحظنا وجود لوحة مكتوب عليها خطوة عزيزة، وأغلب ديكورات المكان عبارة عن إعادة تصنيع أو ريسايكلينج، وإحنا في كايرو 360 بنحترم قوي الأفكار اللي بتحافظ على البيئة.

المكان بيقدم تشكيلة كبيرة من السمك، والمكان نفسه حجمه صغير قوي، وعدد الترابيزات فيه مش كبير، حوالي خمس ترابيزات بس، رغم كده القعدة مريحة جدًا، بمجرد ما قعدنا الموظف جاب لنا المنيو، لقينا الاختيارات كتير قوي، ما بين أسماك وطواجن، وباستا وشوربة، ومقبلات.

كنا مترددين نطلب حاجات كتير لأننا ماجربناش المكان قبل كده ، والحقيقة كنا خايفين الأكل مايكونش حلو، فقررنا نكتفي بطلب مكرونة بالجمبري والمشروم، وبتتقدم بصوص أبيض أو طماطم.

اخترناها بالصوص الأبيض، وطلبنا تكون سبايسي شوية، بعد حوالي عشر دقائق نزلت لنا، من أول ما دوقناها وقعنا في غرامها.

خلونا نتفق إن فيه كتير من المطاعم فاكرة إن صوص أبيض معناه صوص تقيل يتعب المعدة، الصوص الأبيض في الطلب بتاعنا كان خفيف وطعمه جميل وتاكله كده وأنت مرتاح. كمان نسبة الطعم الحار كانت زي ما طلبناها بالظبط، بسيطة.

الجميل إن الأسعار في المكان رخيصة جدًا مقارنة بمطاعم الأسماك في القاهرة، يعني الطبق اللي طلبناه ثمنه 50 جنيه بس رغم إن الكمية كبيرة وفعلًا ممكن يخليك تقوم وأنت شبعان.

استمتاعنا بالأكل كوم واستمتاعنا بالمكان كوم تاني، لدرجة إننا كنا مهتمين نتصور ونوثق التجربة الجميلة دي من كتر ما دكورات المكان كانت بسيطة وجميلة في نفس الوقت.

أكيد هنروح المكان ده تاني وتالت ورابع وخامس وسادس وسابع إلخ إلخ إلخ..