The Definitive Guide to Living in the Capital , Cairo , Egypt

في طريقك وأنت داخل لمدينة الشيخ
زايد بعد ما تسيب «هيبر ماركت – Hyper
market» على إيدك الشمال هـ تفضل ماشي على طول لحد ما يقابلك بعد مسافة.
هـ يشد انتباهك بالحيونات الضخمة المجسمة اللي موجودة عند المدخل وصف العربيات
الطويل اللي راكنة بالطول وشاغلة مساحة من الطريق. هـ تلاقي يافطة كبيرة عليها اسم
«أفريكانو –  Africano».

“أفريكانو” مطعم
وكافيه، لكن المفاجأة اللي لقيناها أول ما دخلنا من على الجسر اللي موجود في المدخل
لقينا جو ريفي أو أشبه بالغابة، الديكور بسيط جدًا ومش متكلف كثير والمكان عبارة
عن ممرات وجسور صغيرة بـ تؤدي من طريق إلى طريق ثاني والقعدة عاملة زي مستطيل كبير
القعدات على أطرافها وكمان فيه قعدات فى المنتصف حول البحيرة الصناعية اللي بـ
تشتغل فيها نافورة بالليل، ده غير تماثيل الحيوانات المجسمة اللي بالداخل برضه، لكن
مش هي دي المفاجأة، المفاجأة أننا لقينا حيوانات وطيور في المكان مع الناس بدون
أقفاص! ده بجد.. نسناس وبجعة بيضاء وسيسي وطيور ألوانها مختلفة منها البغبغان
ألوانه جميلة جدًا والناس عمالة تلعب معاهم وتتصور كمان.

المكان مناسب أكثر للعائلات وده
اللي لاحظناه لما رحنا هناك، المكان بـ يقدم شيشة وبالليل النافورة بـ تشتغل اللي
في البحيرة، عيب البحيرة بس أن لون المياه أخضر ورائحتها كانت مكتومة شوية وقت
زيارتنا، كمان بالليل الإضاءة بـ تكون خافتة كثير لدرجة أنك ممكن ما تشوفش المنيو
إلا بالعافية، لكن عامة المكان ظريف وفيه راجل مسؤول عن السيسي بـ يركب الأطفال ويعمل
لهم جولة في المكان. وكمان كان فيه شغل وبناء لجزء علوي في المكان شكله هـ يتعمل جزء
برجولا مقفولة لأن كل المكان مفتوح ودور واحد فقط.

قعدنا في مكان باصص على البحيرة، المنيو
عليها أشكال حيوانات كرتونية تحس أنه منيو أطفال بس لطيف، وكان فيه صعوبة في قراءة
الكلام من عند كعب المنيو لأنه متاكل، طلبنا في البداية شوربة كريمة بالفراخ (8.95
جنيه) كانت حلوة جدًا وقطع الفراخ كانت مستوية كويس والكريمة كان قوامها معقول
ولذيذة، بعدها طلبنا طبق “بيتي دي بولو” (49.95 جنيه) وده عبارة عن قطع
فراخ مشوية بالخضروات ومعاها أرز بالخضار، غيرنا الأرز واختارنا بدل منه البطاطس
البيوريه، الغريب أن الطبق جاء لنا من غير خضروات رغم أن مكتوب كده في المنيو، ورد
الجرسون أن لأ الخضار مخلوط بالأرز بس! المهم الفراخ كانت كويسة وطرية والصوص
بتاعها وبتاع البطاطس كان طعمه حلو، الغريب في الطبق كان فيه شرائح على الطرف
كتزيين افتكرناها فلفل أحمر وأصفر لكن لما ذقناها كان طعمها جيلاتيني زي “الجيلى
كولا”!

جربنا طبق ثاني اسمه “ميديلون
فيلتو” (54.95 جنيه) عبارة عن لحم مع صوص وبـ ينزل معاه أرز وبطاطس محمرة،
الطبق كان طعمه حلو، اللحم مستوي لكن ممكن يستوي أكثر، البطاطس المحمرة كانت عادية
ومش مقرمشة.

بعد شوية طلبنا للتحلية كريب
بالفواكة وعليه صوص شوكولاتة (25.95 جنيه) وللأسف إحنا كنا مجبرين عليه لأن مافيش
غيره وقتها، بصراحة إحنا كانت عنينا على “التيراميسو” لكن ما كانش موجود
للأسف.

الطلب عقبال ما جاء لنا استغرق
ساعة! والجرسون كان بـ يتفادى يحتك بنا ولما الكريب جاء لنا اعتذر الجرسون أن حصل
لخبطة في الطلب! المهم الكريب كان طعمه حلو قوي والفاكهة كانت فريش عوضت التأخير
شوية.

ختمنا زيارتنا للمكان بشرب
مشروبات ساخنة لأن الجو كان بارد جدًا خاصة أنه مفتوح وفي مكان يعتبر صحراوي،
أخذنا “هوت تشوكلت” (12.95 جنيه) كان خفيف بس طعمه كويس، وكمان طلبنا
موكا كوفي (14.95 جنيه) وكان حلو لكن كميته كانت كبيرة بالنسبة لنا.

على الرغم من بساطة المكان ممكن
تتوقع أن الحمامات تكون بنفس الروح لكن طلعت نظيفة وشيك. في الآخر هـ تدفع ثمن
الحاجات اللي أخذتها مضاف عليها خدمة (20.72 جنيه) ومافيش ضريبة ولا حد أدنى
للطلبات. “أفريكانو” مكان مختلف عن أى مطعم أو كافيه دخلناه في حياتنا،
وعلى الرغم أن فيه مشاكل واجهتنا لكن اتبسطنا وكان يوم ممتع.