The Definitive Guide to Living in the Capital , Cairo , Egypt

الصحيان بدري مش من هوايات معظم أهل القاهرة، بس مع زيادة المطاعم اللي بتقدم قسم مخصوص للفطار في المنيو وكمان بيقدموا وجبة برانش في الأجازات واضح إن موضوع الفطار\البرانش هو الموضة الجديدة. من هنا قررنا نطلع على “أنجيز بليس –Angie’s Place” ونجرب منيو الفطار اللي شغالة عندهم طول اليوم.

من غير تفكير كتير طلبنا ستاكد هاش براون (42 جنيه) وهاوس سبيشال (34 جنيه). نبتدي مع الستاكد هاش براون اللي بيتكون من طبقة بطاطس عليها شرائح سوسيس وبيض مقلي وجبنة وبصل أخضر وصوص أيولي، وكل دول بين قطعتين توست.

يا سلام على صفار البيض مع السوسيس المستوي كويس، بحد حاجة تفتح النفس، بس المشكلة إن كمية صوص “الأيولي” كانت كتيرة جدًا ومافيهاش أي طعم للثوم وطغت على باقي مكونات الأكلة. المشكة الأكبر إن البطاطس – اللي المفروض تكون نجم الطبق – كانت أقل من المتوقع ومش مقرمشة خالص، دي على العكس كانت رفيعة ومش مستوية كويس.

الهاوس سبيشال عانى برضه من التنفيذ. الساندويتش بيتقدم هو كمان في عيش توست وفيه مكعبات بطاطس مشوية مش مستوية كويس، مع أومليت المفرووض إنه معمول بالريحان وطماطم شيري مستوية في الفرن وموتزاريلا طازة، بس الواقع إنه أومليت ناشف من غير توابل ومحروق من الأطراف. جايز الكلام يكون حلو على الورق، بس الريحان خرج ولم يعد والشيري طماطم كانوا خمسة بالعدد ومفيش أي وجود للموتزاريلا في الموضوع.

نروح للحلويات ونطلب كرانشي فرينش توست (42 جنيه). الفرينش توست كان متغطي كورن فليكس مطحون عمل طعم جميل وماشي مع نكهة الفراولة.الفكرة هنا إن العيش كان تخين بزيادة وبالتالي طلع ناشف، وكمان كريمة الفانيليا كانت سايحة وملهاش طعم.

جربنا كمان البان كيكس بالتفاح (48 جنيه). البان كيك الخفيفة المنفوخة وعليها شرائح تفاح بالقرفة كانت روعة ومعاها بولة آيس كريم لذيذة. الطبق ده للأسف محتاج طعم مسكر ونكهة أقوى من كده، وكمان البان كيك طاغي عليها طعم البيض بشكل مش طبيعي.

من الغريب إننا نلاقي كل العيوب اللي قابلتنا في الأكل خصوصًا مع مكان متخصص وبيقدم منيو فطار طول اليوم، وبصراحة مشينا وإحنا زعلانين. الأطباق جايز تفتح النفس على الورق، بس أنجيز محتاجين شغل كتير، خصوصًا إن المنيو مش كبيرة للدرجة دي. طبعًا من الغريب كمان إن المنيو مفيهاش eggs Benedict!