The Definitive Guide to Living in the Capital , Cairo , Egypt

الباستا بأنواعها من الأكلات اللي الواحد ممكن ياكلها في أي وقت، وإحنا شخصيًا مقتنعين أننا ممكن نأكلها كل يوم من غير ما نمل منها، وبالرغم من أن الباستا على اختلاف أنواعها من الأطباق السهلة اللي مش محتاجة احتراف في طبخها –بدليل أنك لو سألت أي حد بـ تعرف تطبخ إيه هـ يقول لك باستا- إلا أننا اكتشفنا مكان جديد في الزمالك أثبت أن فيه تفاصيل صغيرة ممكن تحول الباستا من "كويسة" لـ "ممتازة"، المكان الجديد ده هو أوز باستا – O’s Pasta.  

في شارع هادئ متفرع من شارع 26 يوليو في الزمالك، مش هـ تلاقي أي حاجة تدل على وجود مطعم إلا باب أزرق بـ تنزله بسلالم، مافيش أي شبابيك أو أي حاجة تدل على أن المكان مفتوح ماعدا يافطة مكتوب عليها بالإنجليزي "أيوه، إحنا فاتحين"، بالرغم من أن المكان صغير جدًا، إلا أننا ما حسيناش أننا مخنوقين، حتى والمطبخ مفتوح على صالة الطعام المكونة من 5 ترابيزات، الديكور العام بسيط ولكن بـ يعتمد على ألوان كثيرة: الحوائط لونها أخضر زاهي ومليئة بالصور والإطارات الملونة، أما الفرش فالترابيزات والكراسي الخشبية ملونة بالأحمر والأزرق والأصفر، أما السقف الأبيض فعليه مجموعة من الإطارات الأنتيك اللي بداخلها مرايا.

المنيو ما يقلش بساطة عن الديكور بمجموعة أطباق الباستا المختلفة –واللي لاحظنا أن بالرغم من عددها القليل، إلا أنها بعيدة عن أطباق الباستا التقليدية اللي ممكن تلاقيها في أي مكان ثاني زي البولونيز مثلًا- ومعاهم صنفين شوربة وصنفين حلو وطبقين مقبلات، أول ما قعدنا رحب بنا جرسون لطيف ووضح لنا أن فيه أطباق مش موجودة في المنيو ولكن مكتوبة على السبورة –اللي هي عبارة عن ورق أسود مقوى متركب على باب ثلاجة كوكاكولا على يمينك وأنت داخل المحل- بالإضافة لمشروبات جديدة زي الكركديه بالزنجبيل والليمون بالريحان.

أول حاجة طلبناها كانت شوربة المشروم البيتي (21 جنيه)، واللي وصلت لنا بسرعة، بعكس أماكن كثير بـ تعتمد على المرقة والكريمة كأساس للشوربة مع وجود قطع من المشروم، أوز باستا بـ يقدم الشوربة بنفس الأساس ولكن مع المشروم المفروم والمضروب مع بقية المكونات، في الأول كنا مستغربين الشوربة لأنها كانت المرة الأولى اللي نأكلها بالصورة دي، إلا أننا ما نقدرش ننكر أنها كانت ممتعة وكميتها مناسبة وخصوصًا أن بالطريقة دي كمية المشروم تضاعفت وبالتالي طعمه كان واضح.

من الباستا، اختارنا روزماري، وهي عبارة عن باستا بالصوص الأبيض وقطع المشروم والفراخ مع الروزماري أكيد (55 جنيه)، وباستا لا في أن روز La Vie en Rose، وهي عبارة عن باستا بالصوص الأحمر مع الريحان والبصل والجمبري (63 جنيه).

بالرغم من أننا ما انبهرناش بالطبقين لدرجة أننا ممكن نطلق عليهم "أحسن باستا أكلناها في حياتنا" لأن فيه أماكن ثانية بـ تعملها بنفس الجودة، إلا أننا أخذنا بالنا أن الشيف عارف هو بـ يعمل إيه، لأنه كان مهتم بتفاصيل بسيطة جدًا خلت الباستا اللي أكلناها مميزة، يعني مثلًا في الطبق الأول أخذنا بالنا أن المشروم مقطع قطع كبيرة، وتسويته مضبوطة: متشوّح تشويحة بسيطة جدًا تحتفظ بنكهته البسيطة من غير ما تخليه يذبل، ودي حاجة إحنا ما شوفناهاش في مكان ثاني، الصوص كان كريمي وقطع الفراخ كانت وفيرة وتسويتها مضبوطة ومشبعة بالصوص، ولكن نصيحة مننا لو مالكش في الروزماري حاول تختار "بيكانستا" وهو بنفس المكونات زائد البيكان، لأن الطبق الأول نكهة الروزماري هي الأقوى بين نكهات المكونات الثانية.

أما في الطبق الثاني، فأكثر حاجة عجبتنا هي أن الصوص الأحمر معمول بطماطم طبيعية مش معلبة، وده كان فارق جدًا في الطعم ولون الصوص –اللي كان لونه أقرب للوردي منه للون الأحمر- ده غير أن كان طعمه مسكر، أما بالنسبة للجمبري متوسط الحجم فكانت كميته وفيرة وتسويته كانت ممتازة، لأنها كانت سريعة فاحتفظت بقرمشته من غير ما تجلده، الطبق ككل النكهات كانت فيه متوازنة ومضبوطة.

بعد الطبقين دول اختارنا بار الليمون (27 جنيه)، واللي بـ يقدم عليه رشة سكر، طبقة الليمون كانت ممتازة وسميكة أكثر من طبقة البسكويت وبالتالي كانت معمولة زي ما بـ نحبها بالضبط، كان نفسنا البار يكون أكبر من كده ولكن حجمه في المجمل ممتاز بعد الأكل اللي أكلناه.

مع الحلو طلبنا الكركديه بالجنزبيل (18 جنيه)، واللي كان بالنسبة لنا غريب، لأننا ما قدرناش نحدد هو حلو ولا حادق، في أول الطعم هـ تحس بنكهة الكركديه والسكر الموجود فيه ولكن في الآخر نكهة الجنزبيل القوية واللي نوعًا ما حراقة هـ تفضل مستمرة.

في النهاية رأينا أن أوز باستا كان تجربة ممتعة، سواء في الجو العام والخدمة، أو حتى في الأطباق اللي كانت معمولة بدقة واهتمام بالتفاصيل مش سهل أنك تلاقيها في أي مكان ثاني، ننصحكم تجربوه.