The Definitive Guide to Living in the Capital , Cairo , Egypt

مطاعم
أوفيو – Ovio

أوفيو: فرع جديد في كايرو فيستيفال سيتي ناقصه شوية تفاصيل

  • بداخل كايرو فيستفيال سيتي مول، القاهرة الجديدة
تم التقييم بواسطة
Omar Yousry
قيم
قيم الآن
أوفيو: فرع جديد في كايرو فيستيفال سيتي ناقصه شوية تفاصيل

من أهم العيوب الموجودة في سلاسل المطاعم الكبيرة في القاهرة صعوبة احتفاظهم بمستوى ثابت. علشان كده أول لما نشوف مكان ناجح ومحبوب بيتوسع فغالبًا الانتشار ده بيحصل على حساب مستواه.

أوفيو من فترة قريبة فتح فرع جديد في كايرو فيستيفال سيتي القاهرة الجديدة، ومن قبله فرعين في المعادي والشيخ زايد، وبكده يكونوا حاضرين وبقوة في أهم وأكبر الأماكن في القاهرة.

أوفيو واخد ركن بيطل على النافورة الراقصة وعندهم قعدة جوه المكان ومكان تاني آوت دوور علشان لو حبيتوا تستمعوا بالفطار في الشمس مع المنظر الجميل أو حتى عشاء لطيف بالليل، وطبعًا ما ننساش مخبوزاتهم الجميلة المتوفرة في كل فروعهم.

بعد ما دخلنا واخترنا ترابيزتنا جوه، قررنا نبتدي الغداء بشوي كابوتشينو (24 جنيه) بصوص بندق (5 جنيه) يضيف طعم مختلف. بعد حوالي عشر دقائق وصل الكابوتشينو بقوامه الغني ونكهة البندق المميزة ومعاه بسكوتة لو حبيت تغمسها فيه.

شوية بسيطة ووصلت سلة عيش متنوعة ومعاها خلطة الزيتون المعروفة وفيها قطع زيتون متقطعة كويس وطعمها روعة وعملت شغل عالي مع العيش.

ثلث ساعة كمان ووصل طبق fried Shrimps entrée  (ثمنه 89 جنيه) وعليه صوص بيستو مايونيز. الجمبري المقرمش من بره ومستوي كويس من جوه كان روعة وله طعم مميز خصوصًا مع صوص البيستو مايونيز اللاذع.

طلبنا كمان طبق بطاطس محمرة (22 جنيه) وشوربة كريمة فونجي (32 جنيه) نفتح بيهم نفسنا على الأكل، وبصراحة البطاطس كانت متحمرة صح الصح، بس مافيش فيها ريحة التوابل أو البهارات، على عكس البطاطس اللي جربناها في فروعهم التانية. أما شوربة الكريمة بالمشروم فكانت ثقيلة ولذيذة ومليانة قطع مشروم أضافت كتير لطعم الشوربة؛ المشكلة الوحيدة إنها كانت مملحة جدًا وده قلل من حلاوة الطبق.

نص ساعة وبدأت الأطباق الرئيسية توصل والبداية مع Fillet Mignon  (ثمنه 138 جنيه) عليه صوص ديمي-جلاس ومعاه خضار سوتيه وبطاطس مهروسة.

قطعية اللحمة المستوية medium well كانت هايلة ومشوية كويس من بره وكمان طرية وعصارية من جوه، أما البطاطس المهروسة فخفيفة وحلوة، والخضار السوتيه يعتبر إضافة هايلة للأكل.

طبقنا التاني كان فوتوتشيني ألفريدو (68 جنيه) – بس الملاحظة إن الباستا الوحيدة المتوفرة يومها كانت البنّا. حظنا الوحش مع الطبق ده بالذات ماخلصش، أصل الباستا اللي عليها قطع مشروم وفراخ مشوية وفوقهم صوص كريمة ماكانتش مستوية كويس والكريمة فيها قليلة جدًا وكمان نسبة المشروم للفراخ مش متساوية.

أما المشروبات فكانت عصير ABC ديتوكس (30 جنيه) ومعاه ريد بيري شيك (38 جنيه)؛ الديتوكس عبارة عن تفاح وبنجر وجزر، والكوكتيل ده منعش بس مافيش أي نكهة حلوة على الرغم إن مكوناته كلها حلوة. أما البيري شيك فواضح فيه طعم التوت المسكر اللي ماشي مع طعم اللبن وعملوا دويتو ماحصلش.

طبعًا الحلو دايمًا هو مسك الختام، وعلشان كده طلبنا Pate a Choux (ثمنه 55 جنيه) عبارة عن ثلاث قطع بروفيترول محشيين آيس كريم فانيليا وعليهم صوص شوكولاتة سخن ولوز محمص. الغريبة إن البروفيترول ماكانش طازة وصعب تقطيعه، بس باقي مكونات الطبق كانت تحفة، خصوصًا لما الشوكولاتة المسكرة تدخل على الآيس كريم مع طعم اللوز.

أوفيو يوم بعد يوم بيثبت إمكانياته وقدرته على إسعاد ضيوفه، بس في ملاحظات بسيطة زي الخدمة – خصوصًا وقت الطويل للتقديم بين كل طبق والتاني – وشوية تعديلات مطلوبة على الأكل لازم الفرع يهتم بيهم.

نصيحة 360

أوفيو بيقدم كل شهر منيو مخصوصة، وشهر فبراير هو شهر الشوكولاتة البلجيكية. اعرفوا أكتر من صفحة أوفيو على فيس بوك.

أحسن حاجة

طبق Shrimps entrée كان تحفة.

أسوأ حاجة

الخدمة بطيئة جدًا، وفي أخطاء نادرًا ما بتحصل.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح