The Definitive Guide to Living in the Capital , Cairo , Egypt

الزمالك ليها رونق وخصوصية من بين كل مناطق القاهرة، والقعدة في مطاعمها وكافيهاتها مميزة، ومش مهم أنت قاعد فين فيها، الأهم إنك هتحس بروح مبانيها القديمة وشوارعها العظيمة. ومؤخرًا فتح مطعم وكافيه “أولديش” فرع جديد في الزمالك، والمطعم ده مشهور بديكوراته الكلاسيكية المبهجة، واللي بتنقلكم من عالم لعالم تاني، إحنا زرنا “أولديش” الزمالك بعد افتتاحه، وفي السطور الجاية هنقول لكم تفاصيل تجربتنا.

المكان كعادة ديكورات أولديش كلاسيكي وفيه نمط عصري، وبيميز المكان ديكور البلكونة اللي موجود في كل فروعهم، وفرع الزمالك مكون من دورين؛ الأرضي بترابيزات وكراسي كتير وهو للمدخنين، والعلوي اللي عدد ترابيزاته ومساحاته أقل وهو مناسب لغير المدخنين، وعندهم فريق عمل مميز ومبتسم وطول الوقت بيساعدوك في أي حاجة حتى من غير ما تطلب.

في أول تجربتنا طلبنا شوربة فراخ بالكريمة، وسعرها 48 جنيه، وكانت حلوة والكريمة لباني متخدم عليها كويس، وكمان طلبنا طبق أولديش مكس بسعر 84 جنيه، وده كان عبارة عن “سمبوسك – فونزريلا – تشيكن كرسبي”، وخلينا نقول إن طبق المكس ده ماتنخدعوش فيه لأنه ينفع يكون وجبة كاملة لشخص يكون مش أكيل، ولكن طعمه متوسط، رغم أن المكونات كويسة، لكن مافيهوش أي علامة تميزه وتخلينا نقول إنه طبق متميز جدًا.

كمان طلبنا من أولديش طاجن كباب حلة بسعر 109 جنيه، وبيكون معاه طبق أرز، وهو مش كباب حلة تقليدي زي اللي كلنا عارفينه وبنحبه، هو كان عبارة عن قطع لحم كانت محتاجة تسوية أكتر، والصوص اللي معمول بيه ماكنش صوص كباب الحلة اللي اتربينا عليه، ولكن كانت خلطة بتتعمل من عصارة اللحمة، ورغم ان الصوص لطيف لكن ده ماكنش توقعنا اللي كان أكبر من كده بكتير.

جربنا كمان فراخ أولديش بصوص المسطردة، بسعر 108 جنيه، وهي عبارة عن صدور دجاج متبلة ومشوية بصوص بيكون من اختيارك واحنا اخترنا المسطردة، وكانت لطيفة مش وحشة، بس صوص المستردة كان مضيع طعم الفراخ.

طلبنا كمان وجبة تشيكن مونتيري بسعر 108 جنيه، وكانت عبارة عن صدور فراخ متبلة ومشوية في صوص الباربكيو مع لحم بقري مدخن وجبنة شيدر، ودي كانت أفضل وجبة جربناها  في المطعم الحقيقة.

أما طبق بنا تشيكين بيستو فسعره كان 75 جنيه، ورغم أنه متقدم صح ومتخدم عليه بشكل كبير لكن الطعم النهائي كان محتاج شوية تظبيط علشان يبقى الطبق الواو.

خلصنا مرحلة الأكل وقررنا نجرب بقى المشاريب، واحنا حقيقي مش هنبطل نروح نشرب عندهم هناك، لأن القهوة التركي بـ26 جنيه، وطعمها حلو ونوعية البن كويسة والفنجان بيتعمل زي ما قال الكتاب، أما الكابتشيتو اللي سعره 47 جنيه، فكان عظمة وتقديمه كان حلو بالرسمة الجميلة اللي بتترسم عليه.

جربنا كمان تشوكليت فرابيه وسعره 56 جنيه، وإحنا مش هنبالغ لو قلنا أنه أحلى طعم دوقناه الفترة الأخيرة، رغم تجاربنا الكتير، وبننصح بيه جدًا.

تقدروا تعرفوا عن أولديش الزمالك أكتر من خلال زيارة صفحة الفيسبوك من هنا.