The Definitive Guide to Living in the Capital , Cairo , Egypt

طبعًا كلنا سمعنا عن كايرو فيستيفال سيتي وعن كمية المطاعم والكافيهات اللي فتحت هناك، أوليفز مطعم لبناني قرر يفتح فرعه الثالث بعد فرع داون تاون مول وسيتي ستارز في كايرو فيستيفال سيتي عند منطقة النافورة الراقصة.

اختيار المطعم للمكان ده كان ذكي جدًا لأن المنظر الرائع أمام النافورة الراقصة اللي كل ثلث ساعة بـ تلاقيها اشتغلت مع مزيكا عالية بــ تعمل جو جميل جدًا للقعدة والمكان، ده غير طبعًا الهواء الجميل اللي أنت بـ تحس به لو اخترت تقعد في المنطقة المفتوحة من المطعم، إنما لو اخترت تقعد في المطعم نفسه من جوه هــ تحس بهدوء نفسي وجو دافئ.

أول ما وصلنا قررنا نقعد في التراس علشان نستمتع بالهواء الجميل اللي بره، أول ما قعدنا جاء لنا الويتر وعرفنا على نفسه وقال لنا أنه هـ يبقى معانا النهارده في كل الطلبات، أخذنا منه المنيو وبدأنا نتفرج على الأكل اللبناني الكثير اللي فيه، كان موجود جزء خاص بالإفطار ما بين الفول والطعمية والأومليت بكل الأنواع زي السبانيش أومليت والأومليت بالجبنة (11: 23 جنيه) وركن السلاطات كان فيه تشيكن سيزر سلاد وسلاطة الفتوش اللبنانية والتبولة (19: 37 جنيه).

الأطباق الرئيسية تتنوع ما بين أطباق البيف والتشيكن والسيي فوود (42: 79 جنيه)، نخش بقى على الجزء اللبناني شوية زي المناقيش بتاعتهم اللي كانت رائحتها اللذيذة في كل المكان زي منقوشة زعتر، لبنة، تركي، كفتة (15: 27 جنيه)، عندهم كمان جزء ساندويتشات لو عاوزين حاجة سريعة كده (23: 37 جنيه).

قررنا نطلب سلاطة كرسبي تشيكن اللي كانت عبارة عن 4 قطع فراخ كرسبي بـ يقرمشوا تحتهم خس وبهارات وصوص الليمون الخفيف اللي كان طعمه لذيذ جدًا، طلبنا كمان طبق تشيكن مع أعشاب الليمون (47 جنيه) وطبق الجمبري كرسبي (69 جنيه)، الأطباق الرئيسية كلها بـ ينزل معاها خضار سوتيه وإحنا بـ نختار ما بين الأرز العادي أو الأرز بالبهار فــ اختارنا الأرز بالبهار علشان نجربه، التشيكن مع أعشاب الليمون كانت من ألذ ما يكون بطعم الليمون مع الصوص الأبيض اللي كان مغرق التشيكن، أما طبق الجمبري الكرسبي فكمية الجمبري فيه وحجمه حاجة كده من اللي قلبك يحبه، والجمبري كان لونه ذهبي وبـ يقرمش ونزل معاها صوص مسكر كان له طعم هائل مع الجمبري.

بعد ما خلصنا كنا محتاجين نريح شوية من كمية الأكل اللي شبعنا منها أوي لكن برده ما قدرناش نقاوم منيو الحلويات بتاعتهم اللي كان مليان بالوافلز والتشيز كيك وكيك الشوكولاتة بالآيس كريم وأسعارهم كانت من (23: 30 جنيه)، طلبنا تشيز كيك جاء لنا في أقل من 5 دقائق وكان صوص الفراولة مغطيه بطريقة شهية، إنما طعمه كان هـ يبقى أفضل لو كانت البسكويت اللي تحت التشيز مش جامدة بالطريقة دي خلتنا ما نقدرش حتى نكسره بالمعلقة.

“أوليفز” واخد أكثر مكان استراتيجي في كايرو فيستيفال سيتي، الأكل لذيذ وشهي والخدمة هناك كانت ممتازة.. آه نسينا نقول لكم أن الويترز وهما بـ يأخذوا الأوردر ما كانوش بـ يكتبوا وراك، لأ ده كل واحد فيهم كان معاه زي تابلت صغير علشان يعمل الأوردر أسرع.