The Definitive Guide to Living in the Capital , Cairo , Egypt

رنا شرف

عشاق ألاكلات السورية كتير في القاهرة، وطبعًا كلنا عارفين شهرة الشاورما السوري بين المصريين في السنين الأخيرة، واللي بقي ليها جمهور كبير بيحبها، ومؤخرًا قررنا نجرب مطعم سوري مشهور في التجمع الخامس، وهو “ابن الشام” واللي تجربتنا فيه كانت إيجابية بدرجة كبيرة. اتفضلوا معانا!

الحقيقة إن المطعم فعلًا مختلف وراقي، وحسينا إنه مطعم عائلي في نفسه، يعني هيعجب كل أفراد الأسرة، وبعيدًا عن الأكل، القعدة في المكان مريحة بدرجة كبيرة.

“ابن الشام” بيقدم طواجن ومقبلات ومعجنات وبيتزا، في اليوم اللي روحنا فيه المطعم لقينا عروض علي الصواني، زي صينية المعلم، وصينية الأكابر.

ولقينا إن صينية المعلم مناسبة لينا أكتر، من حيث الكمية والسعر كمان، الصنية سعرها 499 جنيه، وتعتبر صينية كبيرة فعلًا، أول ما طلبناها نزلت لنا بعد شوية وقت، وعجبنا شكلها وحبينا نكتشف اللي فيها، لقينا فيها فرخة مشوية علي الفحم، وربع كفتة بالصنوبر، وربع كباب شقف، وحاجات أكتر.

الفراخ كانت حلوة، بس كانت محتاجة بهارات أكتر، لإن طعم البهارات فيها ماكنش مميز أو واضح بدرجة كبيرة، الصينية كان فيها كمان محمرة، ودي عبارة عن خبز وله تتبيلة بالفلفل والصلصة والملح والكزبرة ودبس الرمان وبتتقدم مع المشاوي، وبصراحة عجبتنا جدًا وكانت معمولة بمزاج حقيقي.

الصينية بييجي معاها كمان أرز، ونقدر نقول إنه مميز وطعمه مظبوط بدرجة كبيرة.

الصينية فيها كمان كفتة معمولة حلو، واللي عجبنا فيها تتبيلتها، كمان كان فيه كباب شقف، وده كان منتج جديد بالنسبة لنا، وهو نوع من الكباب بتتبيلة خاصة وعرفنا إنه معروف أكتر في سوريا، والأكلة عجبتنا جدًا الصراحة، مشوية حلو، والتتبيلة مميزة ومدية للكباب طعم مختلف.

الصنية بينزل معاها بيبسي وكنافة في طبق صغير، إحنا أختارنا كنافة بالجبنة، وكانت جميلة.

تجربتنا في “ابن الشام” كانت مميزة، والأكل بشكل عام كان جميل وأكيد هنكرر التجربة تاني في مطعم “ابن الشام”.