The Definitive Guide to Living in the Capital , Cairo , Egypt

بقلم وتصوير: رنا شرف

الأكل المصري الأصلي له عشاق كتير في القاهرة، ما هو يا جماعة مين بيقدر يقاوم الملوخية ولا الحوواشي ولا المكرونة بالبشاميل على الطريقة المصرية؟

ودائمًا الأكل المصري بيبقى عاوز لمة حلوة، ولأنه مرتبط معانا بجو البيوت، فبنبقى عاوزين نحس دائمًا لما نروح مطعم بيقدم النوع ده من الأكل إن القعدة فيه مريحة وشكل قعدة البيت من حيث الدفء والبهجة والراحة النفسية.

علشان كده قررنا نروح مطعم الحضرة، لما سمعنا إن الأكل المصري عنده مميز ويستاهل التجربة.

أول ما هتدخل المكان هتلاقى نفسك في جو صوفي مبهج تفاصيله بتبان في الديكور العربي الأصيل وحتى رائحة البخور اللي لاحظناها في المكان، الحقيقة الديكور فعلًا جميل ومميز.

أول الأطباق اللي جربناها، كان طبق ملوخية أصلي، سعره 34 جنيه، معمول زي ما الكتاب بيقول، مالقيناش في الطبق ولا غلطة، وبصراحة نقدر نقول إنه كان نجم الأطباق اللي جربناها في المكان.

طلبنا كمان طاجن أرز بالشعرية ولحمة محمرة، سعره 120 جنيه، وكان جميل برضه، بس كنا نتمنى الكمية تزيد شوية لإنه عجبنا جدًا لكن الكمية كانت قليلة قوي.

جربنا كمان مشاوي كبدة وكفتة، سعره 197 جنيه، كان طبق جميل ومخدوم بجد.

قولنا كمان نجرب الفراخ المسحب، سعرها 98 جنيه، واكتشفنا إنها رائعة فعلًا وننصحكم تجربوها لو رحتم المكان في يوم.

طبعًا كل الأطباق تقريبًا بتنزل مع أرز بالشعرية والسلاطات المميزة، خاصة البابا غنوج وسلطة الزبادي، رغم إننا كنا نتمنى إن كمية السلاطات تزيد شوية.

عجبنا كمان إنه بينزل بعد الأكل صينية شاي فيها براد شاي ونعناع حسب الرغبة، ودى ضيافة جميلة من المطعم خلتنا نحس إننا فعلًا في بيوت زمان.

قبل ما نمشي قولنا نجرب طبق أم علي، ماكنتش أقوى حاجة لكنها معقولة.

في المجمل تجربتنا في المطعم كانت جميلة وحسينا بجد بمتعة الجو الدافيء، وأكيد هنروح تاني الحضرة في يوم.