The Definitive Guide to Living in the Capital , Cairo , Egypt

رنا شرف

الفتوش والتبولة والشيش براك وغيرها من الأكلات اللي عشاق الأكل اللبناني عارفينها كويس وعاشقين تفاصيلها. مؤخرًا عدينا على مكان مميز من حيث الشكل والفخامة في القاهرة الجديدة، علشان نستمتع بالأكل اللبناني الأصلي.

تعالوا نحكي لكم أكثر عن تجربتنا في المكان.

الحلاب مشهور ومعروف مش بس في مصر في مدن تانية كمان زي دبي. المكان موجود في التجمع الخامس، وهتعرفوه بسهولة لأن شكله مميز، يمكن يكون مش مناسب قوي للخروجات العائلية لأنه رسمي أكثر، لكن في عزومات العمل والخروجات الرومانسية هيكون مناسب جدًا.

بمجرد ما تدخلوا المكان هتحسوا أنكم داخل فندق مش مطعم! المكان كبير جدًا وديكوراته فخمة، وهو مكون من طابقين، والمساحات متقسمة حلو، والنظافة واضحة في كل التفاصيل، وكمان فيه أسانسير.

الدور الأول حلو، بس فضلنا نطلع الدور التاني علشان الفيو فوق أحلي، ولاحظنا إن المكان فيه زاوية صغيرة مخصوصة للصلاة.

اتفضلوا معانا

نيجي بقى للأطباق، أكيد مش هنكون في مطعم لبناني ومانجربش أغلب السلاطات المشهورة زى الفتوش، ونزل لنا معاها حبات رمان، وكانت فريش وشهية، ودي سعرها 125 جنيه.

تاني نوع جربناه من المقبلات كان بطاطا حارة، وكانت حلوة ونازلة ساخنة جدًا، ودي كان سعرها 115 جنيه، جربنا كمان شوربة العدس وكانت وهمية، وعجبتنا جدًا، ودي سعرها 75 جنيه.

حبينا إن الطبق الرئيسي يبقى مختلف شوية، طلبنا إسكالوب بانيه فراخ، ورغم إنها أكلة عالمية أكثر، لكن حبينا نشوف الطريقة اللبنانية في صناعتها، وللأسف الطبق ماكنش مبهر، نقدر نقول كان عادي، وضايقنا إن البانيه كان ناشف شوية، لكن ممكن نديله 6 من 10. سعر الطبق 375 جنيه.

التجربة في المجمل –لو تغاضينا عن الطبق الرئيسي- كانت حلوة، وممكن نكررها تاني بس مع أكل لبناني فقط مش عالمي.

عنوان المطعم: مبني 24، منطقة النوادي، امتداد شارع التسعين، التجمع الخامس.

الخط الساخن: 17060.