The Definitive Guide to Living in the Capital , Cairo , Egypt

مطاعم
المدينة

المدينة: مطعم كبدة وكلاوي وطواجن في لاظوغلي

تم التقييم بواسطة
Waleed Abuarab
قيم
قيم الآن
المدينة: مطعم كبدة وكلاوي وطواجن في لاظوغلي

رشحه لنا صديق “أكَّيل” بـ يتفنن في اكتشاف
المطاعم من النوع ده اللي بـ تقدم الكبدة والكلاوي والسجق والعكاوي، أصناف لها
شعبية كبيرة عند ناس ومالهاش أي لازمة بالنسبة لناس ثانية ممكن تنفر من مجرد سماع
السيرة، كوارع ونخاع ومخاصي وقلب! بصراحة الأسماء نفسها تخض. لكن مقالنا هنا
للأكيلة اللي مش بـ يهمهم وبـ يدوسوا في أي حاجة –مادام نظيفة وآمنة طبعًا– ورغم
أن كاتب المقال مش بـ يعتبر نفسه من الأبطال دول، وماقدرش يأكل أصناف بعينها في
المطعم، إلا أنه جرب بعض الحاجات اللي أكيد بـ تدل على مستوى المطبخ هناك، وممكن
بالقياس نعرف قد إيه هو متميز في باقي الأصناف.

مطعم «المدينة» موجود في شارع خيرت في وسط البلد، قريب
جدًا من ميدان لاظوغلي ومبنى وزارة الداخلية، مشهور بين الناس باسم “المدينة
المنورة” أو “أولاد سعودي”، وواضح أن السعودية لها علاقة بالموضوع
علشان المحل من الداخل والمنيو الخاص به عليه رسومات النخيل والسيوف المستوحاة من
الثقافة السعودية، رغم أن الأكلات مصرية خالصة. المطعم له قعدة بالخارج على الرصيف
أمامه، لكن داخل المكان شئ مختلف تمامًا، ومكتوب على البوابة على شاشة رقمية
“خدمة مميزة”، وفعلًا المكان شيك جدًا من الداخل، والحوائط رخامية
والترابيزات خشبية أنيقة، والجو هادئ جدًا، وكأنك دخلت محل ثاني غير اللي أنت شفته
وأنت في الشارع.

المنيو بـ يفكرنا كثير بمطعم «البرنس» اللي كنا كتبنا
عنه قبل كده، ركن المحمرات فيه كبدة وسجق وكفتة ولحمة جريل ونخاع بالتبولة وكلاوي،
الطلب بـ يبقى عبارة عن ربع مشكل بـ 20 جنيه فيه كل الأصناف اللي فاتت دي، وممكن
تطلب ربع مشكل فيه كبدة وسجق وكفتة محمرة بس لو ما لكش في الحاجات الثانية (17.5
جنيه)، وده اللي إحنا جربناه وعجبنا جدًا طعم الكبدة اللي مش شبه أي مطعم ثاني ولا
حتى البرنس، كبدة وسجق وكرات كفتة محمرة في صوص بالبصل والفلفل وطعمها لذيذ ومش
حراق زي ما كنا متوقعين. ركن الأرز والطوجن فيه أرز بالكلاوي ومكرونة بالبشاميل
وطواجن فريك وتورلي ولسان عصفور وبامية وبطاطس وعكاوي وكلها معاها لحمة كندوز بلدي،
أسعار كل الطواجن 20 جنيه، ماعدا العكاوي بـ 25 جنيه، الأرز والمكرونة والشوربات
بـ 5 جنيه، جربنا الفريك باللحمة، وعيبه الوحيد أنه ما كانش مُقدم في طاجن فخار، لكن
الطعم كان حكاية رغم أن اللحمة كانت دسمة حبتين. أخذنا طلب مشكل صغير (10 جنيه)
فيه كل الحبشتكانات الثانية في المحل علشان يبقى اسمنا جربنا الأكلة المميزة
للمطعم، والحق يقال أن كل حاجة كان طعمها تحفة ومستوية كويس، يعني حتى اللي مالوش
في الأكلات دي ممكن يجربها وتعجبه في «المدينة»، واللي مش هـ يقدر يجرب الطواجن
العادية والحواوشي هـ يعجبوه، والسلاطات ممتازة وهـ تخلصها وتطلب ثاني.

فيه مشروبات ساخنة وباردة بأسعار بسيطة، والخدمة سريعة
ومتخصصة، الجرسونات فاهمين مكونات وصنعة كل الأكلات في المحل لو حبيت تستفسر عن
حاجة.

بـ نرشح المحل بقوة لأي حد غاوي الأكلات الدسمة دي، وهـ
تتفاجئوا من شياكة المطعم لو قعدتوا في الجزء الداخلي منه، والأسعار أقل بكثير مما
يوحي به المكان.

نصيحة 360

فيه توصيل طلبات للمنازل في منطقة وسط البلد والسيدة زينب وما حولها، وحاول تروح وقت المغرب علشان الزحمة بـ تبقى أقل.

أحسن حاجة

الأسعار مقارنة بجودة الأكل والخدمة.

أسوأ حاجة

الكميات قليلة جدًا في الطواجن، مش مشبعة لفرد واحد.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح