The Definitive Guide to Living in the Capital , Cairo , Egypt

مطاعم
صبحي كابر الساحل – Sobhy Kaber

بالصور: مطعم صبحي كابر الجديد.. مكان أكبر بس جودة أقل

تم التقييم بواسطة
Mohammed Sabry
قيم
قيم الآن
بالصور: مطعم صبحي كابر الجديد.. مكان أكبر بس جودة أقل

من فترة عملنا لكم ريفيو لمطعم صبحي كابر في روض الفرج. وكان تقييمه مننا عالي، لأن الأكل كان فعلًا يستاهل. ولما صبحي كابر نقل لمكانه الجديد. عند كوبري الساحل في شبرا. قولنا نروح نجربه تاني، ونشوفه لسه على وضعه ولا إيه النظام.

في البداية كنا فاكرينه فرع جديد، والقديم لسه موجود. بس لما سألنا طلع إنه نقل للمكان الجديد، وخلاص القديم مابقاش موجود. وصلنا المطعم وحظنا كان حلو أول ما وصلنا إن ماكنش في ناس كتيرة مستنية قبلنا. وده لأن المطعم كالعادة بيكون عليه زحمة كبيرة. المكان الجديد حقيقي تحفة. واسع جدًا وكبير ومعمول على دورين. وكمان في بارك للسيارات خاص بالمكان.

رغم حظنا الحلو في الزحمة، بس ماكنش حلو مع الناس اللي بتنظم دخول الزبائن. لأن كل واحد كان بيبعتنا لحد، ونطلع الدور التاني وحد تاني ينزلنا. ووقفونا عند كذا ترابيزة قبل ما نستقر على واحدة منهم.

لحد هنا مش مشكلة، قولنا نخش في المهم ونطلب الأكل. طلبنا ربع كباب (65 جنيه)، واللي كان المرة اللي فاتت ثمنه (60 جنيه). بس المرة دي ماعجبناش بسبب طعمه أولًا، ولأنه كان مش مستوي كويس وبيشد ثانيًا. وده كان غير المرة اللي فاتت تمامًا.

طلبنا كمان ربع كبدة جريل، بس العامل اللي بيجيب الأكل جاب بداله ربع كبدة باللية (65 جنيه). هو صحيح نفس الثمن، بس طبعًا دي حاجة ماعجبتناش إنه جاب طلب مختلف. وبيقول إن مفيش كبدة جريل. وطبعًا ده حصل بعد ما استنينا كتير والأكل بدأ ينزل، فمفيش وقت للتبديل. عمومًا كان طعمها مش قد كده خالص. وحتى ما كملناش الطبق.

قولنا نجرب طاجن الفريك (55 جنيه)، وده بييجي وفيه 3 قطع لحمة. الفريك ماكنش حلو أوي. بس اللحمة كانت حلوة جدًا، ومستوية كويس. لدرجة إننا طلعناها وأكلناها لوحدها.

طبعًا مانسيناش طاجن الملوخية اللي كان بياخد العقل المرة اللي فاتت، فطلبنا طاجن ملوخية سادة (20 جنيه) واللي كان المرة اللي فاتت (15 جنيه). المهم إنه المرة دي ماكنش زي أول مرة. وده كان شيء غريب جدًا.

يمكن صبحي كابر زود أسعاره علشان المكان الجديد، أو أي سبب تاني. لكن للأسف الجودة في الأكل مابقتش زي الأول.

نصيحة 360

اتأكدوا إن الأكل اللي انتوا طالبينه موجود، علشان بينزلوا حاجات تانية.

أحسن حاجة

مكانه الجديد أوسع وأنضف، فيه مكان خاص لركن السيارات.

أسوأ حاجة

التنظيم وحش جدًا، والناس اللي شغالين مش بيرتبوا الشغل مع بعض.

Ahmed Soliman

ما قد اعجبني في المطعم علي مدار السنين فقدته في هذه الزياره... فكره ان المطعم في الشارع وسط روح القاهره القديمه وهذا ماكان يبهرني خاصه انه في مكان منغلق علي نفسه كما هو الحال بمطعم الرفاعي بالسيده وهذا كان احد مميزاته غير كبده البرنس مثلا كنت بكون مستاء من وجود سيارات وعوادم وكلكسات من حولي.... المقر الجديد بهرجه بلا زوق سواء في الديكورات او في المعامله... المره اللي رحت كنت رايح متأخر كما تعودت وحسيت وقتها ان عدد العاملين اكبر من عدد الزورار ورغم ذلك انتظرنا مايقرب من ال 10 دقائق و الاكل امامنا حتي يحضروا لنا عيش بايت وساقع غير ان اكلتي المفضله عنده سواء الموزه او الكبده الجريل كانتا دون المستوي المعهود...... ماتت اسطوره صبحي كابر

أكتب تقييم

One thought on “بالصور: مطعم صبحي كابر الجديد.. مكان أكبر بس جودة أقل

  1. ما قد اعجبني في المطعم علي مدار السنين فقدته في هذه الزياره…
    فكره ان المطعم في الشارع وسط روح القاهره القديمه وهذا ماكان يبهرني خاصه انه في مكان منغلق علي نفسه كما هو الحال بمطعم الرفاعي بالسيده وهذا كان احد مميزاته غير كبده البرنس مثلا كنت بكون مستاء من وجود سيارات وعوادم وكلكسات من حولي….
    المقر الجديد بهرجه بلا زوق سواء في الديكورات او في المعامله… المره اللي رحت كنت رايح متأخر كما تعودت وحسيت وقتها ان عدد العاملين اكبر من عدد الزورار ورغم ذلك انتظرنا مايقرب من ال 10 دقائق و الاكل امامنا حتي يحضروا لنا عيش بايت وساقع غير ان اكلتي المفضله عنده سواء الموزه او الكبده الجريل كانتا دون المستوي المعهود……
    ماتت اسطوره صبحي كابر

أضف تعليقاً

يجب أنت تكون مسجل الدخول لتضيف تعليقاً.

مقترح