The Definitive Guide to Living in the Capital , Cairo , Egypt

وظيفة
ناقد الطعام ممكن تكون أمتع وظيفة في الدنيا، بـ تأكل بره طوال الأسبوع وتأخذ فلوس
الأكل اللي أكلته، وتكتب مقالات من 400 لـ 600 كلمة عن اللي المطاعم اللي بـ
تجربها وكمان أصحابك يحبوك علشان بـ تعزمهم في أماكن مختلفة والموضوع يبدو ظريف
جدًا. لكن المرة دي كانت حالة فريدة مش بـ تعدي علينا كثير، تقريبًا كنا مش لاقيين
كلام نقوله، وده مش علشان الأكل جميل وغير عادي! إنما علشان المطعم كان سيء بجد!

مطعم
«برام» فتح مؤخرًا في الزمالك أمام محل «لا تراتوريا» مباشرة، كان لازم نتوقع حاجة
معينة لما نشوف لوجو المطعم من بره “برام بـ يعمل أكل مصري مش زي أي حد ثاني”
لكن المكان كان شكله شيك ومغري أنك تقعد وتجربه.

ديكور
المكان خليط من تراث مصر القديمة وموديلات مصرية حديثة، أرابيسك كثير بـ يعطي إحساس
شرق أوسطي للمكان، وكنبات وقعدان ملونة بـ تضيف لمسة مرح على الشكل العام. المنيو
مليان أكل مصري بأسعار غالية جدًا، طبق الطحينة بـ 20 جنيه، وقُدمت لنا من غير
عيش، فطلبنا عيش ودفعنا عليه 6 جنيه زيادة، وكمان كان عيش “ريتش بيك”
اللي بـ يتباع في المحلات، وكان ناشف وبايت!

طبق
سمبوسك مشكل بـ 30 جنيه مكون من 6 قطع، والوحيدة اللي قدرنا نأكلها كانت محشوة
بالسبانخ، رغم أن طعمها ما كانش سبانخ خالص. مافيش جبنة في سمبوسك الجبنة، وسمبوسك
اللحمة كانت كارثية، وحتى العجين كان سميك ودهني جدًا.

من
الأطباق الرئيسية اختارنا ميكس جريل (120 جنيه) وطبق المزاليكيا (65 جنيه).
ماقدرناش نميز أنواع اللحوم في طبق المشوبات المشكل، تقريبًا كان فيه حاجة شبه
السمان وحاجة شبه اللحم الضاني بس ما قدرناش نأكلها لأنها كانت دهنية بزيادة، يمكن
السمان كان لذيذ شوية.

المزاليكيا
بـ تبقى عبارة عن خليط من كبدة بقري وكبدة جملي وكبدة ضاني وبـ تتحمر في سمن وثوم
وبهارات، دي بقى كانت أسوأ حاجة طلبناها. إحنا عادة بـ نحب الكبدة بأشكال مختلفة،
لكن طعم الكبدة الجملي كان غريب، وشكل الكبدة في الطبق كان مش لطيف وغير مشجع
خالص، وكانت بـ تشد ومش بـ تتمضغ وحاجة صعبة.

في
الحلويات جربنا المهلبية (28 جنيه) وكانت وحشة برضه!  وواضح فيها طعم ماء الورد وسكرها كثير، وحسب
المكتوب في المنيو كان المفروض يكون معاها مكسرات لكن جاء لنا معاها بالضبط 4
وحدات زبيب فقط.

مشكلة
ثانية نظام التهوية في المكان، سيء جدًا! والدخان جاي من المطبخ لصالة الطعام وخلى
ريحتنا كلها أكل! يعني غير الـ 350 جنيه اللي دفعناها في وجبتنا السيئة، كمان
دفعنا فلوس كثير للدراي كلين علشان ينظف ملابسنا ويطلع منها الرائحة الشديدة.

في
النهاية حاجة واحدة بس هي اللي عجبتنا، وهي التخت الشرقي المكون من شخصين بـ
يلعبوا مزيكا طول ما أنت في المكان، علشان كده بس هـ نقيم المكان بنجمة ونصف.