The Definitive Guide to Living in the Capital , Cairo , Egypt

بقى لنا فترة كل شوية يطلع مكان جديد في شارع 9 وبالرغم من إنه بدأ يفقد الرونق بتاعه وسحره إلا أنه لسه بيفتح فيه محلات مختلفة لمطابخ متنوعة. والنهارده شوفنا مطعم جديد بقى له حوالي 6 شهور بس بيفتتح نشاطه في المعادي بعد ما فتح فرعين تانيين في مصر.

المكان صغير بتطلب تحت وتطلع تاخد الطلب بتاعك فوق فيه حواليه 5 طرابيزات، والمنيو فيه حوالي 5 أصناف لساندوتشات البرجر و5 زيهم للدجاج ومقبلات متنوعة ماكنش موجود منها وقت زيارتنا غير نوعين، شرائح البصل المقرمشة وبطاطس في الفرن اخترنا النوع التاني.

إحنا طلبنا ساندوتش دجاج   Chicky cheese  بـ 55 جنيه كمبو، وساندوتش برجي برجر بنفس السعر، وبطاطس مخبوزة في الفرن بـ 18 جنيه. الاكل جيه حوالي بعد نص ساعة وأدونا زي زرار لما الأكل يجهز بيصفر علشان ننزل نجيب الأكل أو الجرسون يجيبه.

ساندوتش الفراخ كان مقرمش والجبنة لذيذة الساندوتش كان عبارة عن صدور فراخ مقرمشة عليه جبة سايحة من اللي قلبك يحبها.

لكن للأسف البرجر واللي كان مكون من مشروم وجبنة وشرائح بصل كان مافيهوش نكهة إطلاقًا وكانت تتبيلة اللحمة نفسها بلا نكهة وما استمتعناش بيها خالص، غير إن البصل نفسه ماكنش مُقرمش ولما سألنا الشيف قال لنا إن اللي خد الطلب فهم أنه يحمره في الزيت بس ما يعملوش  زي الأونيون رينجز (حلقات البصل المقرمشة).

المهم كان عندنا أمل في البطاطس المشوية في الفرن واللي كانت مُقدمة لوحدها مع مايونيز وبابركيو صوص، لكن للأسف برضه طعمها كان أشبه بالمسلوق، وماكنش فيها نكهة مميزة إطلاقًا.

بنتمنى إن زيارتنا الجاية للمكان تبقى أحسن ويكون زود من أصناف الدجاج وحسن خلطة البرجر بتاعته.