The Definitive Guide to Living in the Capital , Cairo , Egypt

أول فرع كان الموجود قريب من كلية البنات في مصر الجديدة
وفاكرين لما كانت كل خروجاتنا أيام ثانوي في المنطقة دي وكان مكاننا المفضل هو «بريجو
– Prego» لعدة أسباب؛ السرعة في تجهيز
الطلب والجودة والنظافة في المأكولات والأهم بالنسبة لنا ساعتها كان الأسعار اللي
على القد!

المطعم زي مطاعم تيك آواي كثير منتشرة في كل حتة في
القاهرة، لكن المحل واخد ستايل مطاعم «مؤمن» شوية من حيث المنيو وطريقة تقديم
الساندويتشات.

جربنا المرة دي دليفري من فرع المحل في المهندسين الموجود
في شارع السودان، ما خذلناش وجاء لنا أسرع من أماكن ثانية كثير من اللي بـ يوصلوا
طلبات في منطقة المهندسين والدقي والعجوزة.

التركيز الأكبر في المنيو على الساندويتشات، كل أنواع
الساندويتشات اللي ممكن تلاقيها في كل محلات الأكلات السريعة: فراخ بانيه، شيش
طاووق، كفتة مشوية، فراخ كرانشي، جمبري بانيه، سي فوود وبرجر وكبدة إسكندراني، كل
الساندويتشات في عيش فرنساوي، وفيه حجمين هم الوسط والكبير، والأسعار للحجم الوسط
بـ تكون بين 13 و 15 جنيه، والحجم الكبير من 17 لـ 22 جنيه. وممكن تضيف الكولا
والبطاطس (الكومبو) لأي ساندويتش بـ 9 جنيه زيادة. من الساندويتشات المميزة للمطعم
“تشيكن لاماما” وسعره 20 جنيه، وهي صدور دجاج محشوة بالموتزاريلا وهي
شبه كثير الكوردون بلو.

الأوردر وصلنا ساخن ومتغلف بمنتهى الشياكة، فيه علب
بلاستيك بـ تحتفظ بالحرارة، وخدمة التوصيل كانت 6 جنيه فقط. من منيو المشهيات
طلبنا أجنحة الدجاج المشوية الحارة مع صوص الباربكيو (9 جنيه) وكانت معقولة لكن
فيه أماكن ثانية كثير بـ تعملها أحسن من كده، وطبعًا محتاج معاها جبل مناديل علشان
هـ تبهدل نفسك وأنت بـ تأكلها.

في قائمة الوجبات اللي تعتبر مش كبيرة خالص، فيها 4
وجبات فقط: ميكس جريل (38 جنيه) وميكس بريجو الأصغر حجمًا (30 جنيه) ودجاج مشوي
بدون عظم (32 جنيه) ودجاج بانيه (30 جنيه) وكل الوجبات بـ يبقى معاها أرز وبطاطس
وثومية وعيش. فيه وجبة دايت عبارة عن 5 قطع صدور دجاج مشوية وسلاطة خضراء وعيش
تورتيا دايت وكوكاكولا دايت وصوص باربكيو. جربنا الوجبة الأخيرة وكان الملفت فيها
أن كمية الفراخ كانت كثير ومعاها خس، والسلاطة كانت مثالية بحبات الطماطم الشيري وكابوتشا
حمراء ومعاها صوص الخل اللي أعطى لها طعم رائع، وطلبنا سلاطة الطحينة (1.5 جنيه)
كان قوامها كويس لكن كميتها صغيرة.

من الأكلات المميزة في «بريجو» أطباق الأرز البسمتي
بإضافات زي الفراخ بالخضروات على الطريقة المكسيكية (15 جنيه) وأرز بريجو بشرائح
اللحمة والمشروم والصوص البني (17 جنيه) وده إحنا جربناه وكان لذيذ وزودنا صوص
ومشروم ودفعنا 3 جنيه زيادة، ما عجبناش فقط أن اللحمة كان فيها قطع دهن كثير، لكن
الطبق ككل كان ممتع فعلًا، بالذات مع سلاطة الكول سلو (4 جنيه) والكوكا والبطاطس
اللي طلبناها معاه، كانت وجبة متكاملة ومشبعة.

فيه وجبات للأطفال زي الناجتس والهوت دوج والبرجر كلها
بسعر 16 جنيه، وممكن تشتري الطلبات بالكيلو أو بالقطعة، يعني مثلًا كيلو الشيش
طاووق بـ 86 جنيه، والكفتة بـ 70 جنيه، وكيلو الصدور المشوية بـ 88 جنيه.

المطعم مثالي لأكلات سريعة ونظيفة وطعمها حلو، تجربتنا
في أكثر من فرع أثبتت أنهم عارفين هم بـ يعملوا إيه.