The Definitive Guide to Living in the Capital , Cairo , Egypt

مطاعم
بهاريز – Bahareez

بهاريز: أحلى طاجن “ملوخية” و”أرز معمر” في المهندسين؟

أكل مصري بهاريز مطاعم القاهرة مطاعم المهندسين مطاعم شرقي
  • 20 جامعة الدول العربية - فندق اطلس- المهندسين
  • 10:00 - 23:00
تم التقييم بواسطة
Cairo 360
قيم
قيم الآن
بهاريز: أحلى طاجن “ملوخية” و”أرز معمر” في المهندسين؟

السبب في إننا قررنا نروح مطعم “بهاريز” المهندسين هو أننا سمعنا عنه كتير، فماكنش ينفع نفوت تجربة المكان ده علشان ننقل المغامرة كاملة لكل متابعي كايرو 360، فهل يا ترى المكان كان كويس والأكل كان فعلًا حلو؟

الوصول لـ “بهاريز” كان سهل جدًا، المطعم في شارع جامعة الدول العربية، أمام نادي الزمالك مباشرة، أول ما دخلنا عجبنا جدًا شكل وديكورات المطعم، ويافطته المميزة والأضواء باللون الأحمر، بالنسبة لديكورات المحل عجبتنا جدًا مريحة للعين بشكل كبير من حيث الألوان، عجبنا كمان التابلوهات اللي على الحوائط، وبجانب الترابيزات فيه ركن خاص للعائلات عبارة عن صالون ستيل مدهب.

المطعم مكون من طابقين الدور الأ مخصص للـ تيك أواي، والدور الثانى عبارة عن صالة واسعة جدًا فيها أكثر من ترابيزة بين كل واحدة والثانية مساحة معقولة، يعني القاعدة هناك فيها خصوصية، ولو معاك خطيبتك مثلًا أو عائلتك هتحس باحترام لخصوصيتك.

أما بالنسبة للخدمة في بهاريز فبصراحة فاقت توقعاتنا من حيث السرعة والموظفين المحترفين جدًا في استقبال العملاء، المنيو كمان واضح جدًا ومصمم بطريقة سهلة تخليك فاهم كل حاجة كويس، ده بالإضافة للترحيب والمقابلة اللي تحسسك أنك مش أول مرة تزور المكان.

طلبنا الطبق الرئيسي “موزة محمرة” (سعره 90 جنيه)، والحقيقة اللحمة كانت مستوية قوي وطعمها يجنن، وبجانب الطبق الرئيسي حبينا نجرب ورق العنب الخاص ببهاريز (سعره 30 جنيه) كان طعمه رائع وتوابله مظبوطة جدًا والكمية كبيرة لدرجة أنها ممكن تكفي فردين  .

حبينا نجرب كمان طاجن الأرز المعمر بالفراخ، اللي بيتميز بيه بهاريز وفعلًا كان مميز، عبارة عن طاجن أرز فيه قطع فراخ (سعره 65 جنيه) وجربنا معاه طلب ممبار (سعره 30 جنيه) والحقيقة ماكنتش التوابل مظبوطة قوي وبلغنا الموظف بملاحظتنا ولقينا اهتمام كبير واحترام لرأينا.

طلبنا طاجن ملوخية، وده بقى حكاية لوحده، بنعتبره أحسن طاجن ملوخية جربناه في القاهرة كلها، وسعره مناسب جدًا (15 جنيه).

السلطات كمان كانت مميزة، السلاطة الخضراء كانت طازجة جدًا ونظيفة، وعجبنا كمان سلاطة الباذنجان المخلل، واللي كانت خلطته مميزة ومختلفة.

الحقيقة التجربة كانت موفقة جدًا، وأكيد هنكررها تاني قريب علشان نشوف بهاريز هيحافظ على مستواه على طول ولا لأ.

نصيحة 360

لو معاك فرد تاني كفاية طلب ورق عنب واحد لأن كميته كبيرة.

أحسن حاجة

طاجن الملوخية يا جماعة.. ما يتفوتش!

أسوأ حاجة

الممبار خلطته مش أفضل حاجة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح