The Definitive Guide to Living in the Capital , Cairo , Egypt

مطاعم
بوسطن برجر – Boston’s burger

بوسطون برجر: معشوق جديد لجمهور البرجر في كايرو

  • • 106 تاون سنتر – بجوار سيتي بنك – متفرع من شارع الـ 90 بالتجمع
تم التقييم بواسطة
Omar Yousry
قيم
قيم الآن
بوسطون برجر: معشوق جديد لجمهور البرجر في كايرو

من أصعب الحاجات في الأكل إنك تقدر تضبط كل مكون مكوناته وتحدد الكمية المناسبة، يعني حاجة بسيطة زي التوابل مثلًا ممكن تعدل طعم الأكلة أو تدمرها. المطاعم القوية بتلعب على الوتر ده، وكل واحد فيهم بيحاول يوصل لدرجة معينة من الكمال، وبصراحة زيارتنا لبوسطن برجر أكدت إن في أماكن قدرت فعلًا تحقق المعادلة الصعبة.

المطعم موجود في القاهرة الجديدة، وفيه قعدتين إن دوور وآوت دوور. المطعم كمان فيه بار سلطات مفتوح وتقدر تختار منه بعد ما تطلب الأكل، وكمان بار صوصات فيه باربيكيو ومايونيز وكاتشب وجبنة سايحة.

بعد ما وصلنا لترابيزتنا وعملنا الأوردر، الجرسون قدم لنا أطباق سلاطة وروحنا بيها على بار السلطات. السلطات تشمل مخلل وبطاطس وبسلة، ومعاهم إضافات للساندويتش زي البصل والطماطم والخس. جربنا منهم سلطة البطاطس وسلطة والبطاطس بالبازلاء وكول سلو، وكلهم كانوا طازة وتتبيلتهم حلوة.

 

 

بعد ربع ساعة وصل أول طبق مقبلات Appetiser Platter (ثمنه 81 جنيه) وفيه بافالو وينجز وتشيز ستيكس وتشيكن ستريبس وحلقات بصل وتشيلي تشيز فرايز. البافالو وينجز كانت حراقة جدًا لدرجة إنها طغت على نكهة الأكلة ما عدا طعم صوص البافالو. شوية ودخلنا على التشيز ستيكس المليانة جبنة وطرية وكمان مقرمشة، أما حلقات البصل فكانت كويسة بس تقليدية. بعد كده جربنا التشيكن ستريبس بتتبيلتها الممتازة وقرمشتها الجميلة، والحلو كمان إن الفراخ نفسها كانت طرية. أخر حاجة معانا هي التشيلي تشيز فرايز ودي بطاطس ويدجز متبلينها كويس وعليها صوص جبنة بلحمة مفرومة مشطشطة طعمها رهيب.

 

 

شوية صغيرين ووصلت ساندويتشات البرجر وهي بوسطن برجر 225 جرام (92 جنيه) وبرجر بايتس 300 جرام (93 جنيه) وفادج برجر 450 جرام (109 جنيه). الساندويتشات كلها فيها حاجة مشتركة وهي توابل اللحمة الكتيرة بزيادة زي الفلفل الأسود والأحمر والبابريكا والثوم.

 

نبتدي مع البوسطن برجر اللي بيرجع أمجاد البرجر الكلاسيكي، عليه جبنة شيدر وبيف بيكون مدخن ومشروم سوتيه، وبصراحة البيكون مع المشروم عملوا دويتو ماحصلش.

 

 

بعدها كان الدور على البرجر بايتس، ودول ستة ميني برج/سلايدر عليهم جبن مختلفة وبيكون أو مشروم، وأخيرًا الفادج برجر كان ساندويتش عملاق عليه بيكون ومشروم وجبنة شيدر، وكمان حتة البيف نفسها محشية جبنة. كل حاجة كانت حلوة، بس توابل اللحمة الكتيرة قللت من حلاوة البرجر.

وهنا نكون وصلنا لنهاية رحلتنا مع بوسطن برجر، اللي جايز لو كان ظبط الساندويتشات – وخصوصًا التوابل المبالغ فيها – مع أجواء المكان الجميلة والخدمة الممتازة كنا ممكن نعتبر بوسطن برجر واحد من أهم مطاعم البرجر في القاهرة الجديدة.

نصيحة 360

بوسطن برجر لهم فرع تاني في القاهرة الجديدة في ميراج مول، وكمان فرع على شارع 9 المعادي.

أحسن حاجة

السلطات كانت طازة والمقبلات تحفة.

أسوأ حاجة

تتبيلة قطع البيف في البرجر أقوى من اللازم.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح