The Definitive Guide to Living in the Capital , Cairo , Egypt

إحنا بـ نحب منطقة الكرمة مول فى الشيخ زايد، يمكن لأنها منطقة هادئة جدًا وروحها حلوة، وكمان كان فيها مطاعم ارتبطنا بها نفسيًا، لدرجة أننا حافظين تاريخ المطاعم والكافيهات اللى فتحت فى المكان ده، أول مطاعم فتحت فيه كان “ميلانج – Melange” وده أكثر مطعم حزننا عليه لأنه كان أكثر من رائع، وكان أمامه على طول “كافيه مو – Café Mo“، بعدين اتغير الحال وبقى بدل ميلانج مطعم “الكبابجي” اللى قعد فترة وبعدين قفل ومافيش حاجة فتحت مكانه لحد وقت كتابتنا للمقال ده، وبدل كافيه مو فتح “لافا ستون – Lava Stone” اللى حقق نجاح كبير وقعد فترة شغال بجودة عالية، بس برضه قفل (مش فاهمين فيه إيه) وفتح دلوقت مطعم “بيانو” اللى هـ نحكي لكم عليه دلوقت.

سيبكم من الخلفية التاريخية دي، المطعم وقت ما رحناه كان لسه Soft Opening وما كانش فيه غيرنا بس فى المكان، استغربنا أشمعنى اسم “بيانو” بس شوية وفهمنا، كل يوم بـ يكون فيه عروض حية لعزف البيانو (ده الأساسي) وفيه أيام ثانية فيه دى جى أو عزف على الجيتار ماعدا يومين الاثنين والثلاثاء، ممكن تراجع معاهم بالتليفون قبل ما تروح علشان تعرف البرنامج.

وقت لما تبقى لوحدك فى مكان لسه فاتح جديد كمية الاهتمام بك بـ تكون خرافية، بس فيه شعرة بين الاهتمام المعقول والاهتمام لدرجة الضيق، حسينا بكده فى لحظات، لكن إحنا اتدلعنا الصراحة جدًا وقدموا لنا حاجات كثيرة Complimentary من المكان، الجرسونات مهذبين وفيه جزء من الطاقم أجنبي، الديكور بسيط وأنيق وفيه شاشات فى كل مكان بـ تعرض حفلات موسيقية لفنانين عالميين كثير زي سيلين ديون، المنيو كانت لسه عبارة عن ورق أبيض مطبوع عليه الأصناف لأنها لسه بـ تتعمل.

طلبنا سلامون ستيك (145 جنيه)، وشوربة البصل (25 جنيه)، وسيراليون ستيك (130 جنيه) وده عبارة عن ستيك عليه صوص بلو تشيز مع عين الجمل، كل الأطباق الرئيسية بـ ينزل معاها طلبين جانبيين، وكمان نزلوا لنا طبقين مقبلات هدية من المكان، الأول كان عبارة عن عيش محمص معاه 3 أنواع من الـ Dipping، والأطباق الثانية كانت كبد فراخ بصوص الباربكيو، والثاني سجق شرقى معمول بطريقة مبتكرة، الصراحة إحنا مش من محبي كبد الفراخ والسجق أوى بس طعمهم كان حلو جدًا، طريقة التسوية والصوص فى الكبد كان رائع.

شوربة البصل نزلت لنا فى نفس التوقيت، كانت سخنة جدًا، لازم نعترف أن دي أول مرة نذوقها وعجبتنا جدًا، كنا دائمًا نستغرب إزاى شوربة بصل لكن طلعت حلوة أوى، خاصة أن طريقة عملها بـ يوضع فيها على وش الشوربة قطعة عيش محمص عليه جبنة سايحة، لما تذوب فى حرارة الشوربة بـ يكونوا مع بعض طعم رائع.. بداية موفقة.

أول حاجة نزلت لنا السلامون ستيك، السلامون كان مستوي حلو جدًا وطري يذوب فى الفم، لكن للأسف السيراليون ستيك ما كانش مستوى حلو أوى وفيه قطع دهن، زائد أنهم غلطوا فى الأوردر مرتين، أول مرة لما جابوه لنا بأرز وإحنا طالبين بطاطس بيوريه، والمرة الثانية جابوه بصوص جريفى مع العين الجمل، ولما اعتذروا وغيروه جابوا صوص البلو تشيز من غير العين جمل! بس أكلناه وخلاص علشان زهقنا وكمان كنا جعانين أوى، بس هما كانوا كرماء جدًا وجابوا لنا نوعين الصوص علشان نجربهم.

فى التحلية طلبنا تشيز كيك بالشوكولاتة، جاءت لنا حاجة بعيدة خالص عن التشيز كيك، عبارة عن تارت موس شوكولاتة بثلاث طبقات، ولما عرف مدير المكان كده شاله من الـ Receipt وما حاسبناش عليه، بس هو كان طعمه خفيف جدًا وSpongy.

طاقم العمل كان مهتم بالتفاصيل وكان بـ يأخذ رأينا أول بأول علشان تحسين المستوى، وكمان أخذوا تليفوناتنا علشان نعرف كل جديد عن المكان، المعاملة كانت حلوة والمكان طبعًا بـ نحبه، بس فيه شوية تضبيطات لازم تتعمل علشان ما تبقاش الطبخة باظت على حبة ملح.