The Definitive Guide to Living in the Capital , Cairo , Egypt

مطاعم
بيسترو تمارا اللبنانى – Tamara Lebanese Bistro

بيسترو تمارا اللبناني: وليمة إفطار غير عادية في سيتي ستارز

  • سيتي ستارز مول - المرحلة الثانية - بالقرب من منطقة السينما الـ VIP
  • لبناني
تم التقييم بواسطة
Waleed Abuarab
قيم
قيم الآن
بيسترو تمارا اللبناني: وليمة إفطار غير عادية في سيتي ستارز

وبعودة الأيام؛ لما بـ نقرر نروح نفطر في مطعم في شهر رمضان بـ يبقى في دماغنا أسئلة كثيرة عن جودة الطعام والتزامهم بتقديم وجبات الإفطار مع صوت المدفع بالضبط، ومستوى الخدمة وصحصحة العاملين في المطعم ومدى تأثير الصيام عليهم، وبـ نفكر كمان في الكميات وإذا كانت مناسبة للسعر اللي هم مخصصينه للوجبات ولا لأ، وإذا كانت القعدة حلوة بعد الإفطار وفيه مكان مخصص للصلاة، وفيه فرصة أنك تتابع برامجك المفضلة في التليفزيون ولا لأ، وعوامل ثانية كثير بـ تتدخل في تقييمنا للمكان اللي بـ نروحه وقت الإفطار في رمضان، ولحسن الحظ البداية كانت موفقة جدًا السنة دي بزيارتنا لمطعم «بيسترو تمارا اللبناني – Tamara Lebanese Bistro» وهو مطبخ لبناني أصيل وله صيت كبير كواحد من أفضل المطاعم اللبنانية في العاصمة، لكن في رمضان هو عامل منيو إفطار متنوع فيه أكلات لبناني ومصري وسعر الفرد فيه 170 جنيه غير شاملة 12 % خدمة. يا ترى ممكن تأخذ إيه قصاد المبلغ ده! هـ نقول لحضراتكم حالًا.

أولًا لازم نقول أن «تمارا» هو واحد من أفضل وأشيك المطاعم اللبنانية في مصر، وفرعه الموجود في سيتي ستارز في الدور الأرضي بالقرب من سينمات الـ VIP شكله ملفت وديكوراته فريدة ومقسم لمستويين وغالب عليه الألوان الأبيض والبنفسجي الفاتح وقعداته فخمة ومريحة جدًا وعدد الويترز كبير بطريقة ملفتة ولهم زي موحد مميز بغطاء رأس شبه الطربوش المغربي، وهـ تحس أول ما تدخل المطعم قبل الإفطار بنصف ساعة أنك في خلية نحل، وكل العاملين بـ يتحركوا في كل اتجاه لتزويد الموائد بالأدوات والمشروبات والمأكولات. ووسط أجواء كلاسيكية أقرب من كونها رمضانية قضينا حوالي 30 دقيقة مستمتعين بكل تفاصيل المكان وفي انتظار لحظة الحقيقة، لحظة نزول الأكل على ترابيزتنا.

الإفطار هنا منيو ثابت أو Set Menu فيه طبق رئيسي من المشويات على الطريقة اللبنانية فيه كفتة مشوية بخلطة طماطم وشيش طاووق وكباب، وتختار بين الأرز الأبيض أو الأرز بالخلطة والقرفة والبهارات، وطواجن خضروات زي البامية باللحمة والملوخية بالأرانب والتورلي باللحمة. وقبل ده كله بـ ينزل أطباق المقبلات اللبنانية الساخنة زي السمبوسك باللحم والجبن والسبانخ والباردة زي الفتوش والحمص والمتبل “بتنجان” والطماطم المخللة واختيارك من شوربة العدس أو لسان العصفور. قبل الوليمة دي بـ تختار بين عصير قمر الدين والتمر هندي وبعد الأكل بـ تختار بين بين الخشاف اللبناني بالمكسرات والقرفة أو القرع العسلي بماء الزهر والقرفة والمغطى بالقشطة.

وليمة بمعنى الكلمة، ولأن وقت زيارتنا كنا فردين فنوعنا بين الأصناف الاختيارية وطلبنا كل حاجة موجودة في منيو الإفطار. مش هـ نطول في شرح التفاصيل لأننا مش هـ نلاقي كلمات إعجاب توصف كل صنف لوحده، الحقيقة «تمارا» أبهرنا بمنيو مصري/لبناني ما حصلش، مشاوي وعيش بوري ما حصلتش وطواجن خضار باللحوم ولا أجدع ست بيت مصرية، ومعجنات ومقبلات رائعة وأخيرًا حلويات غرقانة في العسل والمكسرات بمذاق رمضاني أصيل، وبالتالي أكيد مبلغ الـ 170 جنيه كان مناسب جدًا لكل حاجة في التجربة من أول القعدة الظريفة والمزيكا الحلوة اللي مشغلينها “سعاد ماسي” لحد الأطباق اللي قدموها ومستوى الخدمة الراقي، مع بعض تحفظاتنا على عدم الانتباه بسرعة لإشارتنا وطلباتنا لأن الضغط كان كبير فعلًا والمطعم كان مليان على آخره وقت الإفطار رغم أننا لسه في الأيام الأولي في رمضان اللي الناس المفروض بـ تتجمع فيه في البيوت في حفلات إفطار عائلية أكثر.

بيسترو تمارا اللبناني قدم لنا تجربة إفطار رائعة بـ نرشحها بقوة لأي حد عاوز يجرب منيو شرقي محترم في مكان راقي، وبـ نفكركم أنكم ممكن تستغنوا عن منيو الإفطار الثابت وتطلبوا عادي من منيو «تمارا» التقليدي زي الأيام العادية.. إفطار جميل إن شاء الله.

نصيحة 360

من الساعة 10 مساءً بـ يبدأ منيو السحور في «تمارا» لحد الساعة 1 بالليل، والسعر 120 جنيه للفرد.

أحسن حاجة

مذاق رائع لكل الأكلات والمشروبات والحلويات، تمارا تجربة ما تتنسيش.

أسوأ حاجة

الأكل مش بـ ينزل مرة واحدة، وأكيد هـ تشبع من المقبلات وطواجن الخضار قبل ما ينزل لك المشويات، وغالبًا هـ تضطر تأخذها تيك آواي.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح