The Definitive Guide to Living in the Capital , Cairo , Egypt

مطاعم
بيسترو 10 – Bistro No. 10

بيسترو 10: ساندويتشات بطعم مطرقع في المعادي

تم التقييم بواسطة
Ramy Soliman
قيم
قيم الآن
بيسترو 10: ساندويتشات بطعم مطرقع في المعادي

الساندويتشات التقليدية البسيطة تعتبر أكل هايل، بس مش كل أكيلة القاهرة بيرضوا بالأمر الواقع. افتكروا معايا كم مرة جربنا ساندويتشات العيش بتاعها مفتفت ومش حلو ومليان خس كتير جدًا وبقية مكوناته صعب تشوفها بالعين المجردة. الفكرة هنا إن في مطعم جديد فتح في المعادي وهو “بيسترو 10-Bistro No. 10” قبل التحدي وقرر يعمل ساندويتشات مختلفة.

مدخل المكان عبارة عن بوابة سوداء حواليها ورد وخضرة وبتدخل منه لممر حواليه ترابيزات على الجانبين. منطقة الآوت دوور هناك مريحة وهادية، والمطعم نفسه هادي جدًا جدًا بديكوراته اللي كلها باللون الأبيض. اللي عجبنا هناك فعلًا إن بين الترابيزات البيضاء هتلاقي مسافة فيها حصى وآصص زرع بتضيف لمسة جمالية للمكان.

نروح للأكل ونشوف المنيو اللي فيها أطباق شوربة وساندويتشات وحلويات وشوية مشروبات بسيطة، لكن المميز واللي شد انتباهنا كان الساندويتشات.

أول ساندويتش من الأربعة اللي جربناهم هو الراسبيري روست بيف (88 جنيه) في عيش بانيني بنّي طازة – أيوه يا جماعة، تقدروا تختاروا العيش على مزاجكم. الساندويتش عبارة عن طبقات روست بيف طرية رفيعة ممسوحة بصوص الراسبيري ومعاها بلو تشيز وبصل مكرمل وجرجير طازة، والتركيبة دي عملت خلطة مالهاش حل بين الطعم القوي والتوازن بين النكهة المسكرة والحادقة. عجبنا كمان نكهة البلو تشيز القوي مع البصل المكرمل اللي عملوا دويتو هايل مع الروست بيف.

تاني حاجة معانا كانت تاي ساتاي تشيكن (62 جنيه)، عبارة عن مكعبات فراخ طرية عليها صوص فول سوداني بنكهة حليب جوز الهند، وتحس إنك بجد بتأكل فول سوداني. أما الطماطم المجففة فأضافت النكهة القوية للأكل، وقطع الفول السوداني المحمصة عملت طعم مميز والجرجير كان مسك الختام للساندويتش المعمول بعيش التورتيلا. أكيد ساندويتش مميز وكمية الفراخ فيه كويسة جدًا.

نروح لساندويتش كافيه دو باريس (92 جنيه) اللي فكرته مستوحاة من طبق الفرينش ستيك، وبصراحة كان من أجمد الساندويتشات اللي جربناها من فترة طويلة. الساندويتش مافيش فيه اختلاف كبير عن الطبق، يعني محشي شرائح ستيك حلوة وغرقانة صوص زبدة بالتوابل. صعب أثنين يختلفوا على جمال ساندويتش ستيك بالزبدة مالهوش حل.   

  

للأسف طبق بودينج بذور الشيا ماكانش متاح يومها، بس رابع ساندويتش معانا وهو بري جريلد تشيز Brie Grilled Cheese  (58 جنيه) ممكن تعتبره طبق حلو. هو ببساطة عبارة عن توست أبيض محشي جبنة بري غنية بالزبدة والكريمة مع مربى مشمش وبيف بيكون، وبيتحمص كويس علشان يطلع مقرمش شوية. يمكن البيف بيكون كان محتاج يكون مقرمش شوية، لكن هنفضل مبهورين بطعمه المبتكر ونكهاته المتوازنة.

أكيد كلكم لاحظتوا إن كلمة “نكهة” تكررت كتير معانا في المقال، وده أكبر دليل إن بيسترو 10 بيهتم بطعم الأكل. كل ساندويتش جربناه عند بيسترو 10 بجد خلانا نفكر كتير في واحد أو أكتر من مكوناته، بس المهم إن في الأخر كل حاجة طلعت زي الكتاب ما بيقول. المكان هنا بسيط ولطيف، بس الأكل حكاية ومعمول بمزاج عالي. الخدمة كمان كانت هايلة، لدرجة إن واحد من أصحاب المكان كان بيكتب طلباتنا بنفسه وتقدر تشوف فيه الحماس وحبه لشغله من طريقة شرحه للساندويتشات. أكيد أهل المعادي الكرام هيكونوا مبسوطين بمطعم هايل زي بيسترو 10، خصوصًا إن عندهم خدمة توصيل للبيوت.

نصيحة 360

كل الأكل اللي جربناه من المنيو المبتكرة كان هايل، لكن الروست بيف والكافيه دو باريس كانوا النجوم بدون منازع.

أحسن حاجة

كل الأكل اللي جربناه من المنيو المبتكرة كان هايل، لكن الروست بيف والكافيه دو باريس كانوا النجوم بدون منازع.

أسوأ حاجة

شكل تقديم الأكل بسيط جدًا زي المكان نفسه.، يمكن بسيط بزيادة. مفيش كلام إن طريقة تقديم الأكل المبهرة عنصر مهم في الأكل.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح