The Definitive Guide to Living in the Capital , Cairo , Egypt

بعد ما أخذنا مكاننا على أحد الترابيزات اللي بـ تطل على شارع النزهة الرئيسي وبدأنا نتأمل المحل من الداخل عجبنا أنه هادئ والخدمة فيه محترفة رغم قلة عدد العاملين فيه –تقريبًا واحد أو اثنين– وشاشات بـ تعرض كليبات عربية وأجنبية وفيه ثلاجة عرض بـ تعرض بعض الحلويات والعصائر والمثلجات، والنظافة ظاهرة في كل تفاصيل المكان. بدأنا نستعرض المنيو الورقي المطبوع مخصوص للتيك آواي وما كانش فيه منيو أقيم من كده لصالة الطعام من الداخل! المهم قررنا نجرب من الساندويتشات جمبري أستيري جريل الكومبو (32 جنيه) للحجم الكبير، وكانت أول ملاحظة أنه شبه ساندويتش الجمبري بتاع كوك دوور لحد كبير، وهو مشوي بخلطة بصل وفلفل ومسطردة العسل والمشروم وصوص التارتار، الحقيقة أنه كان طعمه حلو، والبطاطس المحمرة اللي قُدمت معاه كانت مش فارم فريتس، كانت أشبه ببطاطس بيتي عادية محمرة، بس برضه كانت لذيذة ومختلفة. كده «بيستو» براءة في الساندويتشات والكومبو، مع أن 32 جنيه مبلغ مش قليل بالنسبة لحجم الساندويتش، وفيه خدعة هـ تقابلك وهي أنه كاتب على زجاج المحل والمنيو “أرخص من أرخص كومبو في مصر” وكاتب أسعار الساندويتشات بطريقة توحي أنها أسعار الكومبو، ورقم 15.99 جنيه متكرر أكثر من مرة على المحل والمنيو، لكن الحقيقة أن أرخص كومبو هنا مش هـ يقل عن 20 جنيه. وما عجبناش أنه كاتب “جديد.. شاورما وكفتة في عيش بوري” مش عارفين هو قصده جديد بالنسبة للمحل ولا جديد في عالم الساندويتشات!
من منيو الأطباق بدأنا بطبق مقبلات ميكس (15 جنيه) فيه حلقات بصل مقرمشة وبافلو وينجز معقولة وأصابع موتزاريلا نصفها مستوي ونصفها مثلج، وصوص تارتار علشان نغمس فيه كل الحاجات دي، الطبق ما كانش روعة بصراحة. بعد كده جربنا الدجاج الكرسبي مع المشروم (45 جنيه) من ترشيحات الجرسون اللي كان معانا، وهو عبارة عن صدور دجاج مقرمشة مغطاة بالمشروم والموتزاريلا واختارنا معاه باستا فيتوتشيني بالصوص الأبيض. طبق كويس والكمية فيه كبيرة مافيش كلام، عجبنا الطعم لكن حسينا أن الصنعة ينقصها بعض الخبرة، يعني هـ تأكل وتشبع بس مش هـ تنبهر، وإحنا بـ نحب ننبهر بصراحة. لذلك أعلنا أن «بيستو» مثالي للساندويتشات والكومبوهات السريعة، لكن موضوع الأطباق الرئيسية وخاصة الفيليه والريب آي عاوزة شوية مذاكرة علشان يقدروا ينافسوا المطاعم الثانية المتخصصة.
ممكن بعد الأكل تشرب ميلك شيك أو عصير فريش (10 جنيه) بس وقت زيارتنا ما كانش فيه غير ليمون، فطلبنا ليمون ومن نفسهم أضافوا عليه شوية لبن، ما اعترضناش وشربناه لكن موضوع أنه كان دلِع وناقص سكر ده ما قدرناش نستحمله. كان نفسنا نجرب أي من أطباق الحلويات زي الآبل باي أو براوني الآيس كريم أو الأوريو مادنس (14 جنيه) لكن الليمون الماسخ خلانا مش متحمسين لوقت أطول في المحل.
مافيش مانع خالص أننا نعدي على «بيستو» ونأخذ ساندويتش وحاجة ساقعة، أو وجبة أطفال معاها لعبة، الأسعار جيدة والخدمة سريعة وده المهم. لكن تجربة العشاء داخل المطعم بشكل كلاسيكي ما كانتش الأفضل بالنسبة لنا، وبسهولة هـ نفضل أماكن ثانية عنه.